Dili- Ajensia Ai-com hala’o lansamentu publikasaun ba Ai kameli, lansamentu ne’e sai hanesan mos introdusaun iha ba historia ai kameli nian, tanba Ai-Cameli maka sai hanesan ekolojia no mos rekursu ekonomikamente Timor leste nian.
MAP halo kooperasaun ho Ajensia Ai-Com iha tinan 2002 liu ba, servisu hamutuk mos ho GCCA, UNTL, no mos ICIAR, programa Ai-Com ajuda tebes peskizador sira iha MAP no mos Dosente sira husi UNTL atu bele halo peskiza. Lansamentu ne’e hala’o iha loron Tersa-Feira (12/03) iha Salaun MAP Comoro.
Tuir Koordenador Tekniku Aicom Roberto Wilians, hateten katak, iha nia parte nia senti kontenti tebes tanba nia bele hakerek ona livru ida konaba Ai-Cameli, no liu husi liuvru ne’e ema hotu bele hatene historia Timor Leste nian konaba Ai-Cameli.
Aleinde ne’e Ai-Com servisu hamutuk ho UNTL halo peskiza mos iha area oi-oin hanesan hare kulit, hare latun, no mos aikameli. No sira hatene ona metode diak atu bele hasa’e produsaun iha natar Vemasse.
“Iha vemasse iha produsaun kiik oan tebes, produsaun hare mos menus, ami kobre konaba hare latun, ami hare ema uza hare kulit sunu sorin deit sunu metan depois nia benefisiu diak ba rai no fo benefisiu ba natar no ai-horis sira seluk.” Esplika Roberto Wilians
Iha fatin hanesan Diretora Jeral Agrikultura e Hortikultura Maria Odete do Céu Guterres esplika katak, ita nia kooperasaun serbisu entre Ministériu Agrikultura liu-liu ita nia Diresaun Nasional Peskiza no GCCA, UNTL ne’ebe ita hari’i iha MAP hahu iha tinan 2002 liu ba.
Objetivu husi peskiza ne’e atu hasa’e ita nia produsaun liu husi produtividade nomos diversifidade Ministeriu Agrikultura nian, tanba ne’e ita presiza koreponde ona buat ne’ebe ita istimula iha planu dezenvolvimentu kurtu prazu nian, planu estrateziku Ministériu Agrikultura 2014-2020 ne’ebe iha, atu hasae produsaun no produtividade no asesu ba Mercado.
Nia esplika, Hanesan ita hotu hatene katak iha Timor Leste 75% ita nia populasaun involve iha agrikultura, tanba ne’e maka hau hanoin husi peskiza sira ne’e halo nafatin peskiza atu fo hanoin liu ba sira peskizador sira hodi dezenvolve nafatin teknologia sira ne’ebe mak apropriadu ou adaptabel atu nune’e ita bele implementa iha area rurais sira, liu-liu ba ita nia populasaun sira ne’ebe maka involve iha area Agrikultura.
Odete informa katak, Ai-com nia serbisu hala’o ona iha Covalima no Natarbora, ida ne’e sai hanesan refensia ida ba ita, liuliu ba estensionista sira atu bele hanorin ita nia agrikultor sira hodi bele hala’o ba iha Futuru.
