Dili- Ministru Agrikultura no Peskas (MAP) hala’o enkontru hamutuk ho Diretór Jeral, Diretór Nasional no mos xefi departamentu sira hodi hahu diskute konaba organigrama foun ne’ebe maka sei hala’o iha tinan lima mai.
Ministériu ne’e ita hotu nian tanba ne’e maka hau lakoi desidi rasik ou deside mesak Organograma Ministériu nian ba iha tinan hirak mai oin, hau koko prepara mos balun ona, maibe hau hakarak liu ita hotu-hotu nia kolaborasaun atu ita tau mos ita nia hanoin no matenek hamutuk hodi hare ba organigrama ne’e, hateten Ministro MAP Joaquim José Gusmão dos Reis Martins, iha nia diskursu loron Quarta (15/08) iha Salaun MAP Comoro Dili.
Ministro MAP hatutan, hau hatene katak ita bot sira maka hatene liu oinsa mak bele fasilita servisu ne’e ba oin, tanba hau hakarak ita hamutuk hare tok ba organograma ida uluk ne’e ita bele dezenvolve organograma foun ida atu bele akumula ita nia servisu hotu para bele halo diak liu tan ba oin. Tanba Ita bot sira iha ne’e kleur ona maka hatene didiak los saida maka Ministeriu ne’e presiza.
“Ida tan maka hau hakarak atu komesa iha tinan 2019 ne’e atu oinsa ita bele iha Diresaun ida ne’ebe bele iha ligasaun no bele fo asistensia diak ba ita ninia setór privadu sira ne’ebe maka agora hakarak investe iha area Agrikultura, laos tamba hau mai husi setór privadu lae, maibe hau hare katak sira mos bele ajuda ita nia servisu, tanba sira nia kna’ar ne’e bo’ot tebes atu bele halao hamutuk ho ita”. Katak Joaquim
Ministériu ne’e hanaran Agrikultura, peskas no floresta tuir lolos iha Ministeriu tolu ka ha’at iha ne’eba Maibe ita nian iha ida deit, Tanba nemak hau nia hanoin tuir lolos iha Ministériu ha’at depois ho estrutura ne’ebe mak iha ita koko atu aperta liu la fo espasu para atu bele servisu didiak, ne’e maka hau iha hanoin atu loke tan.
Entretantu Diretora Jeral Agrikultura Hortikultura, Maria Odete do Céu Guteres nia hato’o nia preokupasaun konaba staff sira ne’ebe maka enkaixa iha Diresaun Jeral, tanba sira iha Diresaun Jeral iha de’it staff 121, 75 pessoa maka iha Diresaun Nasional Agrikultura no Hortikultura e estensaun, no 46 permanente maka iha Diresaun Nasional Irrigasaun.
Wainhira ita iha Departamentu ida minimu tenki iha 20 pessoas, hau hanoin husi Diresaun Jeral Agrikultura Hortikultura e Estensaun atu agrupa fila fali kulturas alimentares ne’e koa tiha, Hortikultura no fini tau hamutuk, no Departamentu sira seluk ne’e mantein nafatin. Irigasaun nia servisu ne’e bo’ot tebes tanba sira fo asistente tranzitoriu tan ne’e sira mantein ho ida ne’e.” tenik DJ Odete
Iha fatin hanesan, Dominggos Gusmão hateten katak husi sira nia Diresaun Nasional sufisiente ona maibe sira hakarak loke tan Departamentu, tanba hanesan Sentru produsaun Animal iha Dotik ne’e presiza kria estatutu ida atu ema ne’ebe responsabiliza ba ne’e nia orsamentu ketak, atu nia mos bele jere iha ne’eba hodi bele proteje fini sira hodi produs barak atu bele fo apoiu ba komunidade sira seluk ne’ebe maka husu apoiu.
konaba matadoru Nasional nian, ami hakarak kria Unidade Nasional ida atu bele halo kontrola diretamente, tanba ita mos hetan taxa husi ne’eba, neduni presiza departamentu ida atu toma konta iha ne’eba atu bele hare hodi evalua katak servisu lao diak ka lae no mos taxa hira maka tama ona ba iha Estadu.
Iha enkontru ne’e Diretor Jeral, Nasional no mos Xefi Departamentu sira barak maka fo sira nia preokupasaun no mos sujestaun konaba rekursus Humanus ne’ebe balun sei menus iha departamentu no mos hakarak atu loke tan Diresaun no Departamentu balun. (Tyfa)
Visita Radio Programa Agrikulturahttps://www.mixcloud.com/elissousa/
