Dili- Ministro Agrikultura e peskas (MAP) Estanislau Aleixo da Silva hamutuk ho Vice Ministro MAP Deolindo da Silva, hala’o enkontru ho Parseiru dezenvolvimentu sira ne’ebe durante ne’e apoiu Ministériu Agrikultura e Peskas ( Segunda (18/06 /2018) iha Salaun MAP Comoro. Iha oportunidade ne’e Ministro MAP hato’o agradesementu ba parseiru sira ne’ebe apoiu ona matenek tomak ba MAP.
Ministro da Agrikultura Estanislau Aleixo da Silva iha nia intrevista katak : Enkontru ne’e, hanesan mos reuniaun de kordenasaun no mos fo agradesimentu ba parseiru sira iha durante tinan tolu nia laran ne’ebe fo ona apoiu ba MAP iha mandatu hau nian nudar Ministro da Agrikultura. kordenadu servisu hamutuk diak tebes, tanba ne’e agradese mos ba sira nia apoiu. hein katak sira sei nafatin apoiu Ministériu Agrikultura, ho matenek no esperiensia sira iha bele dezenvolve Agrikultura ne’ebe maka hanesan baze ekonomia iha rai laran. e mos durante ne’e parseiru sira apoiu ona iha area barak, hanesan Floresta, KOICA estabelese Institutu Nasional de Peskas iha Maubara, Banco Mundial konaba Basias Hidrografikas nian, liu-liu iha area mota ulun hanesan Raumoco Lospalos, Ainaro, Loes no mos iha Oecusse Tono.
e mos JICA servisu hamutuk iha area Irrigasaun ao mesmo tempu iha Agro Comersiu konaba promosaun produtu Agrikolas hanesan hare, fore Mungu no Koto. Austrália ho programa hanaran fini ba moris ne’ebe ohin loron ita hetan ona produsaun fini iha ita nia rai laran. TOMAK husi Europeiu apoiu iha area Floresta, rehabilitasaun. Estrada ho agensia KOICA. Nova zelandia apoio iha are rehabilitasaun kafe, e mos area peskas konaba hakiak ikan tilapia, FAO hanesan parseiru ida nebe kleur ona halo servisu hamutuk ho ministerio de agrikultura, iha programa sira hanesan vasinasaun, programa hakiak karau, melhoramentu animal, no mos SAPIP programa Banku Mundial nebe estabelese labolatoriu sentru de investigasaun agraria no hari labolatoriu nasional ida ba pekuaria, veternaria, quarentena e mos agrikultura.
“Ne’e duni hau hakarak agradese ba sira nia apoio e hau hatene no fiar katak sira sei kontinua apoio nafatin , tamba Timor Leste presiza sira nia apoio barak e hau mos husu bainhira sira fo apoio mai Timor, tenke servisu no koordena didiak ho Ministériu de Agrikultura atu nune’e prosesu labele hela de’it iha dalan klaran, sira ne’ebe diak Ministériu bele hatutan atu nune’e bele lao diak liu tan. Tanba ne’e hau hodi Vice Ministro no mos Secretariu Estadu nia naran hakarak hato’o agradese wain tebes ba parseiru sira.” Tenik Ministro MAP.
