Dili - Komisaun Funsaun Publiku (KFP) hala’o Pre teste konaba lejislasaun Dekretu Lei foun sira ne’ebe maka foin sai ba Funsionariu Ministériu Agrikultura e Peskas sira.
Komisaun Funsaun publiku halo pre teste iha Nasional no mos Munisipiu atu bele hatene katak Funsionariu publiku sira nia koñesementu ba iha lejislasaun to’o iha ne’ebe tanba ne’e maka ami halo pre teste ida ne’e, hateten Sekretaria Ezekutivu da Komisaun Funsaun Publika, Maria de jesus Sarmentu, iha loron Kuinta (17/05) iha Salaun MAP Comoro Dili.
Nia esplika, depois de pre teste sira mos hare karik Funsionariu sira nia koñesementu la dun sufisiente, entaun papel saida maka sira halo atu bele kontinua fo desiminasaun ou halo divulgasaun atu Funsionariu sira bele komprende diak liu.
“Depois ami halo desiminasaun, ami mos sei halo tan post teste ida atu bele hare katak, depois halo desiminasaun ne’ebe ami fo ne’e sira komprende duni ga lae, Ne’e duni sesaun de trabalho desiminasaun, funsaun publika nia papel atu divulga nafatin konaba komprimentu ba iha lei sira ne’ebe maka ita iha ona.” Tenik Maria de Jesus
Nia akresenta, Pre teste ne’e sei halo mos ba Ministériu sira seluk atu hatene konaba desiminasaun, sira hein de’it kualker tempu ne’ebe Ministériu sira bolu, oras ne’e dadauk karta sira hato’o hotu ona ba iha Ministériu sira hotu.
Ami tinan tinan sempre halo diseminasaun ba Ministériu sira, maibe pre teste maka ami foin halo primeira ves atu sukat funsionariu sira nia koñsementu konaba lejislasaun sira ne’ebe maka iha Funsaun publiku liu-liu iha Dekretu Lei foun sira ne’ebe maka foin sai.
Iha fatin hanesan Diretor Nasional Rekursus Humanus, Pedro Barreto hateten ohin loron Komisaun Funsaun Publika hasoru malu ho Diretor Jeral no mos Diretor Nasionais sira iha MAP bazeia ba planu asaun konaba servisu komisaun nian, liu-liu hare liu konaba prosesu disiplina hanesan koalia konaba prosedimentu sira ne’ebe maka ita tenki halo atu bele habelar informasaun ba Funsionariu hotu, Atu bele hatene lalaok konaba Funsaun Publika nia direito no nia dever.
“Ohin ami koalia mos konaba kargu no sefia bazeia ba Dekretu Lei no 25/2016 foin dadauk ne’e konaba prosedimentu prosesu Disiplinar ne’e hanesan atu fo desimina ba Funsionariu Publiku sira hotu atu bele hatene prosedor sira ne’e. Ne’e mos hanesan ami uza etapa por etapa tanba servisu ne’e barak tebes, entaun topiku atu halo desiminasaun ne’e barak.” Pedro Informa
superior sira ne’ebe maka hasoru malu ona ho KFP sira mos tenki hato’o fila fali ba sira nia Funsionariu konaba informasaun sira ne’e. funsionariu publiku hanesan servidor do Estado atu fo atendementu ba publiku ho diak no lalais no disiplina ne’ebe maka iha.(Tyfa)
