Dili- Vice Ministru Agrikultura e Peskas hala’o konferensia da Imprensa hodi klarifika ou halos notisia ne’ebe maka publika husi Jornal Independente iha edisaun Kurta feira (22/02) foin lalais ne’e katak MAP sei hapara Importasaun Manu no ayam potong mai Timor leste meibe ne’e la los.
Tuir deklarasaun husi Vice ministru Deolindo da Silva katak, foin lalais ne’e ekipa ida husi MAP hamutuk ho Ministro Agrikultura ba halo aprezentasaun iha Koselho Ministro hodi koalia konaba ekipa ida ne’ebe MAP haruka ba iha Indonésia hodi analiza konaba risku gripe das aves ou (flu burung). Maibe laos atu hapara importasaun manu moris ou ayam potong husi rai liur ne’e lae. Konferensia Imprensa ne’e hala’o iha loron Kuarta-feira (28/02) iha Gabinete Vice Ministro MAP Comoro Dili.
Nia esplika, durante ne’e ita la iha kooperasaun ho Indonésia konaba oinsa atu importa parente stock na’an manu ou produtu manu sira seluk mai ita nia rai, durante ne’e na’an manu mai barak liu husi Brasil, ho ida ne’e Ministériu hanoin katak oinsa maka haruka ekipa ida ba iha ita Nasaun Vijinho ida para atu loke posibilidade atu hare oinsa ita nia servisu hamutuk konaba parente Stock entre Timor Lesta ho Indonésia.
Nia hatutan, Ita seidauk iha kooperasaun tanba iha tinan 2002 to 2004 nune’e mos iha 2008 iha despaichu konjunta ida entre Ministériu ha’at maka halo hanesan: Ministériu Saude, Ministériu Agrikultura no Peskas, Ministériu Finanças no mos Ministériu Interior halo despaichu ida katak seidauk bele importa parente stock ou na’an manu husi Indonésia tanba sira seidauk halo justifikasaun konaba gripe das aves iha sira nia rai rasik mai ita, tanba ne’e ita seidauk iha kooperasaun no mos seidauk bele hatama na’an manu husi liur.
”Maibe depois de ekipa ne’e ba halo analizasaun konaba risku ida ne’ebe sira aprezenta iha ne’eba iha dia 21 de fevreiru foin dadauk ne’e, maibe laos dehan atu hapara stock ayam potong ou na’an manu husi rai seluk lae. foin lalais ba aprezenta ne’e atu hare hamutuk oinsa iha posibilidade loke tan para oinsa atu aumenta tan, tanba ita hatene katak importasaun ayam potong ne’e lori husi Brasil mai ne’e bele lori to’o fulan ida ou resin, maibe ita ho Indonésia ne’e pais ida ne’ebe maka besik liu tan, maibe laos tanba sira tama ona be ita atu hapara fali sira seluk ne’e maibe ita hare oinsa maka atu bele aumenta tan.” Hateten Deolindo
Tanba ne’e Vice MAP hakarak atu klarifika ka halos deit informasaun katak Governu liu husi Ministériu Agrikultura e Peskas laos atu hapara stock na’an manu husi rai ne’ebe maka koopera ho ita hodi hatama na’an manu mai ita ne’e lae. Maibe Governu liu husi Ministériu Agrikultura e Peskas ne’e buka oportunidade ne’ebe posibilidade oinsa maka ita iha kooperasaun ho Nasaun vijinho sira atu bele hatama ou aumenta tan.(Tyfa)
