Baucau- Diresaun Servisu   Ministeriu Agrikultura no Peskas liu husi  Diresaun Nasional Agrikultura Hortikultura, Departamentu Fini  iha  sentru peskiza  Munisipiu Baucau tinan ida ne’e kontinua  produs fini hanesan,  fini hare fundasaun, fini fore rai fundasaun inklui fini hare sertifikadu.

Atividade durante tinan 2017 ne’e iha oin tolu hanesan, produs hare fundasaun hektares ida, fore rai fundasaun hektares ida no hare sertifikadu hektares lima.

Rezultadu total husi fini hare no fore rai oras ne’e dadauk hamutuk toneladas 8,  hateten  ofisial  Fini Munisipiu, Basilio da Silva Pires iha Centru Peskiza Darasula Munisipiu Baucau.

fini  hirak ne’e ami destribui hotu ona ba grupu Asosiasaun iha munisipiu sanolu resin rua la inklui Oecusse, balun mak  ami sei prepara hela seidauk destribui hotu. Iha semana kotuk liu ba ami mos destribui ona tonelada rua ba Vemasse atu nune’e sira kuda iha tinan ida ne’e, Tenik Basilio

Nia hatutan, atividade  tinan ida ne’e sentru peskiza darasula kontinua  produs fini hare. Klase fundasaun prepara hektar ida no fore rai hektar ida. Agora dadauk kontinua hektares lima no produsaun ba tinan 2018 sira presiza 10 toneladas, hare klase sertifikadu no fore rai sei kontinua ba toneladas 6.

“Rajaun ami produs hare sertifikadu ne’e atu bele atende nesesidade agrikultura no mos grupu Asosiasaun ba produs fini komersial, tanba Ministeriu liu husi Diresaun Nasional Agrikultura, Departamentu Fini ho nia  objetivu ikus liu atu hamenus importasaun fini hare, batar no fore rai husi rai liur.

”Atividades sira ne’e maka oras ne’e dadauk ami hala’o hela iha Baucau no ami sempre koopera ho Ajensia sira hotu mos ho Diresaun Agrikultura Munisispiu Baucau no iha tim ida atu halo inspesaun ba atividade refere.” Tenik Basilio

Planu ba tinan ne’e ami kontinua prepara nafatin hare fini ba klase ne’ebe maka diak no kualidade. (Tyfa)