Dili - Ministeriu Agrikultura no Peskas liu husi Diresaun Jeral Floresta simu formadór husi nasaun Xina hamutuk ema nain 20 ne’ebe sei fo treinamentu konaba oinsa atu tesi ka poda kafe ne’ebe mak idade tuan ona ba agrikultór husi Munisipiu sira inklui funsianariu balu husi diresaun nasional Café Plantas e Industria.

Diretór jeral Floresta Manuel Mendes hateten katak, koopresaun servisu entre MAP ho Guvernu Xina diak liu tanba agora dadaun sira mai atu fo treinamentu oinsa mak kapasita agrikutór no funsionario balun iha area kafé .
Treinamentu ne’e ne’e sei hala’o iha sentru treinamentu Munisipiu Ermera durante fulan ida tanba atu hare liu kona ba oinsa prosesu koilleta kafé no oinsa rehabilitasaun ou poda kafé ne’e lao oinsa, informa Manuel Mendes, iha loron tersa-feira(05/9 ) iha salaun MAP Komoro Dili.

Nia mos realsa, fiar katak durante fulan ida agrkultór no funsionario sira tuir trienamentu bele hetan material ne’ebe mak sira hanorin atu nune’e sira bele transfere sira nia matenek ba fali ema seluk ou agrikultór sira seluk iha Munisipiu ne’e rasik.

Entretantu reprejentante husi Ministeriu Komersiu povu Republikano Xina, DU hateten katak, eventu ne’e hanesan onra boot ida mai ami atu fo treinamentu ba agrikultór no funsionario husi MAP Timor Leste nian konaba koilleta kafé no rehabilita kafé nian.

Hau espera katak treinamentu ne’e sei fo benifisiu ba sira no ajuda sira iha dezenvolvimentu industria kafé Timor Leste no hadia diak liu tan produktividade kafé nian ne’ebe mak sei fo benifisiu boot ba povu Timor Leste, tenik DU.

Iha tinan lima kotuk Xina mos fo treinamentu ba tekniku sira inklui ofisial Ministeriu agrikultura nian no ministeriu sira seluk ne’ebe foka liu konaba area ekonomia, Turismu, Saude no jestaun ba guvernante nian.

Ekipamentus ne’ebe mak treinadór sira uja maka hanesan, livru matadalan, kateri oinsa tesi ka poda kafé no makina oinsa halo kafé atu hemu, iha treianmentu ne’e partisipante sira sei hetan teoria no pratika diretamente iha kampu. (Tyfa)