Covalima - Ministeriu Agrikultura no Peskas liu husi Diresaun Nasional Agrikultura no Hortikultura e Estensaun lansa tan fore keli 4 hektares ho objetivu atu produsaun fore keli no aumnta redimentu ekonomiku joven ne’ebe involve iha vida agrikultura.
Fore keli 4 hektares 4 ne’e ofisialmente lansa husi Ministru Agrikultura e Peskas Estanislau Aleixo da Silva, foin lalais ne’e iha Suku Raimea Posto Administrativu Zuamalai Munisipiu Covalima.
“Hau sente kontente tebes tanba grupu ne’ebe maka kuda fore keli ne’e mesak joven de’it ne’e hatudu katak joven sira mos hakarak atu envolve iha area Agrikultura nian, tanba ne’e Ministeriu Agrikultura sei fo apoiu nafatin.”tenik Estanislau Aleixo da Silva.
Nia hatutan, MAP iha programa ida fo ba joven sira tanba ne’e maka atividade sira hanesan ne’e hola parte mos ba iha joven sira, fiar katak Governu foun mai sei iha kompremisiu ou atensaun masimu ba area agrikultura liu-liu ba joven sira oinsa atu kontinua envolve a’an iha vida Agrikultura nian.
“Hau husu ba Agrikultor sira kontinua nafatin hala’o sira nia kna’ar, Governu mos sei hare oinsa maka atu bele fo apoiu ba sira, Governu sei kria kondisaun atu produsaun ne’ebe maka sira hetan ita mos sei hetan iha merkadu, husi parte Ministeriu Agrikultura sei koordena atividade diak ho Centru logistiku atu sira bele sosa produtu lokal wainhira agrupu agrikultor no grupu joven sira produs sira nia produsaun atu sira mos bele hetan rendimentu husi servisu ne’ebe maka sira halo liu husi produsaun ne’ebe maka iha atu bele sustenta ekonomia iha sira nia moris.” tenik Estanislau
Iha fatin hanesan, Diretór Jeral Agrikultura Hortikultura e Estensaun Deolindo da Silva esplika, Diresaun Nasional Agrikultura Hortikultura e estensaun liu-liu Departamentu produsaun Alimentar nia programa ida ne’e oinsa maka atu ultimaliza irrigasaun Oebaba no oinsa maka atu produs fini fore keli bele sai mos hanesan fini fore keli ba iha teritoriu Timor laran tomak.
Deolindo akresenta, Fore keli ne’ebe maka lansa ona ne’e bolu mos ho naran orba, objetivu ba atividades kuda fore keli ne’e iha hanoin ida katak oinsa atu bele uja natar ne’ebe maka mamuk entaun oinsa maka atu bele uza efektividade be’e no rai ne’ebe maka iha, tanba ita nia Agrikultor sira foin maka koa hare entaun ita halo mos rotasaun ba kultiva alimentasaun.
Planu ida ne’e mosu iha tinan 2017 no planu ne’e trasa duni no ida ne’e mos hanesan teste pilotu ida ba Agrikultor sira, fini ne’ebe maka oras dadauk hetan alokasaun husi Nasional nian.
Iha fatin hanesan Diretór MAP Covalima, Jeferino Amaral Guterres hatutan katak, bazeia ba asesmentu no dadus ne’ebe maka tekniku sira halo katak sei kuda fore keli ho luan 75 hektares, maibe ohin hala’o lansamentu ida ne’e sei kuda de’it ho 4 hektares hanesan mos simbolikamente no restu sei kuda to area ne’ebe mak determina ona.
Jeferino sublinha, programa ida ne’e bele halo rotasaun ba aihan ne’ebe maka ita bele utiliza ita nia natar, tanba ne’e politika MAP nian liu husi Diresaun Nasional Agrikultura no Hortikultura ita implementa.
Entretantu xefi Grupu Hametin Juventude Oebaba, Lorenço Ferreira esplika katak wainhira sira halo kolleta hare hotu sira mos hahu bolu malu iha grupu hodi fo hanoin ou idea ba malu atu bele kontinua kuda fore keli iha natar, no ami nia grupu mos konkorda hodi ohin loron halo duni lansamentu ida ne’e.
Grupu ne’e rasik total ema hamutuk sanolu resin lima (15) feto lima (5) no mane sanolu (10) maibe problema ne’ebe sira hasoru mak komunidade sira hasik livre animal ne’ebe mak sira hakiak bele estraga sira nia aihorus ne’ebe sira kuda.
MAP mos durenate ne’e grupu joventude hamutuk 13 iha munisipiu refere, maibe sira mos iha ona diskusaun hodi bele rezolve promblema ne’e.(Tyfa)
