Likisa- Ministeriu Agrikultura no Peskas liu husi diresaun jeral floresta, kafe no plantas industriais distribui ai oan espesiaes hamutuk 24 ho total ai oan 140 mil iha sentru viverus permanente Ba komunidade iha postu administrativu Maubara Munisipiu Likisa, iha loron sesta-feira 20/1/2017.
Ministru Agrikultura no Peskas Estanislau Aleixo da Silva iha nia diskuru hateten,aktividade ne’e MAP hahu kedas iha tinan kotuk prepara tiha ona no iha tinan ida ne’e ita komesa distribui ai oan ba komunidade iha munisispiu ida ne’e.
Iha tempu agora ita bele kuda ai oan, ita hein katak udan sei mai ho diak, maibe dalaruma udan ne’e para derepenti ida ne’e mos sai difikulta tebes ne’eduni hau hakarak hato’o maluk sira ne’ebe serbisu iha ne’e atu kontribui malu ho diak.
“Hau kontenti tebes bainhira rona estudantes Universidade balun mai halo Estudu ou estagiu iha ne’e, ida ne’e hanesan buat ida ne’ebe mak diak teb-tebes, neduni serbisu hirak ne’e tenke mantein area ne’e ho diak” tenik Estanislau.
Nia sublinna, ohin loron ita infrenta problemas barak mak hanesan mudansa klimatika maibe ho mudansa klimatika ita bele redus bainhira ita kuda ai oan, ita laos kuda ai oan iha tetuk deit maibe ita mos tenke kuda iha foho ne’e bele redus impaktu mudansa klimatika tamba ita bele konserva be’e.
Aleiende ne’e Ministru mos hato’o Parabens ba komunidade sira ne’ebe maka simu ai oan refere, tanba sira nia esforsu hodi kontrubui kuda fali ai oan atu haburas no hamatak fali ita nia rai ida ne’e no ba futuru.
Iha fatin hanesan, Diretór Jeral Floresta Mario Nunes hateten katak, sentru viveirus Maubara ne’e estabelese iha tinan 2005 liu ba Ministeriu Agrikultura servisu hamutuk ho NCBA hodi fornese sira nia tekniku atu estabelese ai oan.
Nia akresenta, Iha fatin ida ne’e mos iha Aikameli lubuk ida neduni estudante fakuldade agrikultura ne’ebe iha ninia Departemento Florestal no Agro Florestal sira sempre haruka sira nia estudante iha tinan-tinan mai halo estagiu iha fatin ida ne’e hodi halo identifikasaun ba espesies ai sira seluk maske sentru ne’e kiik maibe espesies lobuk ida mak iha.
Entretantu tuir Chefe Departamentu Reflorestasaun e konservasaun solo e Agua, Diresaun Nasional Floresta guestão Base geografika e Diresaun Geral Floresta Café e Plantas e Industriais Adelino Rosario hatutan tan katak, sentru viveirus Maubara tinan tinan produs ai oan hodi distribui ba komunidade sira.
Diresaun Jeral floresta plantas e Indutriais tinan ida ne’e produs ai oan 140 mil iha sentru viveirus permanente ne’e, neduni ba komunidade ne’e mak sai benifisiariu ne’e sira hatama proposta sai nudar benifisiario neduni ohin sira bele simu ai oan hirak ne’e hateten, Adelino Rosario.
Produsaun ai oan iha sentru viveirus permanente hamutuk 140 mil ho spesies 24 mak hanesan, Ai kameli, teka, saria, Mahoni, Kakeu, Sengon buto, Flamboyan, Nimba, Teka mutin, Gamal, Lamtoro, Marungi, Nangka, Sabraka, Apokate, Kulumodo, Has, Turi, Ketapang, Ai Portugal, Tebabuia, Camlon, Ai matan dukur inklui Aidila.
