Dili – Ministeriu Agrikultura no Peskas liu husi Diresaun Nasional Administrasaun Finansas konvoka Enkontru jeral ho Diretór no Xefi Departamentu hotu hodi koalia konaba Dekreitu Lei ba Ezekusaun Orsamentu 2017, Loron Kuinta-feira (26/01/2017) iha Salaun Konferensia MAP Comoro.

Vice Ministru Agrikultura no Peskas Marcos da Cruz hateten iha nia entervista katak, enkontru ne’e Diresaun Nasional Administrasaun Finansas maka halo ba Diretor Jeral, Diretór Nasional no mós Xefi Departamentu sira hodi koalia konaba Dekretu Lei ba ezekusaun orsamentu 2017, Tanba iha Dekretu Lei ne’e iha artigu bar-barak ne’ebé presija desemina atu bele komprende.

Marcos relata, Sistema ne’ebé agora dadauk iha la hanesan ho sistema tinan kotuk nian, ne’ebé ita haruka hotu ba iha Ministeriu Finansas, maibé agora prosesu sira ne’e komesa desentraliza iha Ministeriu ida-idak no pagamentu osan maka iha Ministeriu Finansas. Agora mós relatoriu rai iha ne’e de’it, dokumentu eletronika sira mós halo de’it scan para depois Finansas Sentral bele monitoriza, ne’e duni tenke iha kapasidade atu hala’o servisu todan hirak ne’e.

“Enkontru ida ne’e hanesan atu familiariza ba Diretor ou direjente sira ne’ebe nia servisu iha ligasaun ho Administrasaun Finansas konaba Dekretu Lei nian, atu bele komprende didiak saida maka iha Lei ne’e nia laran no sira mos tenki komprende katak ida ne’e hanesan responsavel ida maske ida ne’e todan, tanba ne’e kuandu servisu presiza servisu ho seriedade, rigorozu no dignu”. Tenik Vice Ministru

“Agora mós prosesu sira ne’e sei hetan auditoria husi instituisaun ne’ebé kompetente, tanba ne’e ita presiza halo servisu ne’ebé tuir regra tuir mós Dekretu Lei no estrutura Lei organiku Ministeriu nian, tanba ne’e hotu-hotu tenki kontribui ba malu atu servisu ho diak iha mós linha de kordensaun ne’ebé diak atu bele ezekuta orsamentu Ministeriu ho diak”Afirma Vice MAP.