Dili-Ministeriu Agrikultra no Peskas (MAP) liu husi Diresaun Jeral Peskas hala’o workshop hodi koalia konaba esbosu konseitu oseanu Dezenvolvimentu Politica Oceano Nasional Timor Leste iha loron Kuinta (16/02) iha Salanu Enkontru MAP Comoro.

Diretor Jeral Peskas Acacio Guterres hateten katak, objetivu Workshop ne’e atu fahe informasaun ba malu oinsa atu bele kuidadu ita nia rekusus iha tasi laran liu-liu husi parte Asean nian.

Nia akresenta, liu husi workshop ne’e atu prepara politika ida oinsa utiliza ita nia area dezenvolvimentu iha area tasi nian, tanba hanesan ita hotu hatene katak iha mundu ou tasi oseanu ne’e iha mós koral 71% iha Mundu, entaun ida ne’e mós hanesan impaktu bo’ot tebes ba iha mudansa klimatika nian.

“Ita servisu hamutuk ho ajensia interligadu sira atu bele prepara ita nia planu ho politika ne’ebé diak atu nune’e aban bai-rua ita halo nia baze legal sira ba ninia implimentasaun ne’ebé diak liu tan” tenik Diretor Jeral Peskas.

Nia sublinha, ba politika ida ne’e ita harmoniza ho instrumentu legal sira ne’ebé iha tiha ona, porezemplu husi ONU ninian no mós politika balun iha Nasional dezenvolve ona atu nune’e hotu hotu iha tasi bele harmoniza malu ho diak.

Iha fatin hanesan Diretór Jeral Meiu Ambiente João Carlos Soares hatutan, workshop ida ne’e importante tebes tanba ita koalia konaba jestaun marina, ita hatene katak tasi ne’e luan tebes, ne’eduni oinsa maka ita atu bele halo jestaun ba rekursus hirak ne’e.

Iha mós organizasaun Internasional ho naran Partnership In Environmental Management Seas of East Asean (PEMSEA) ne’ebé halo jestaun ba Tasi husi parte Leste nian liu-liu iha Asean, ida ne’e mós dezenvolve esbosu hamutuk ho Ministeriu Agrikultura no Peskas.

Iha workshop ne’e partisipa husi liña Ministeriais kompatente, eskola akademika, Polisia Maritima Naval ho mós ONG Nasional no Internasional sira atu bele tau hamutuk hanoin atu esbosu lei ne’e bele sai esbosu Lei hodi bele aprezenta ona preokupasaun sira ne’ebé maka iha durante ne’e.