Viqueque - Ministériu Agrikultura no Peskas (MAP) liu husi Diresaun Jeral Floresta lansa primeiru projeitu plantasaun ai industria ho spesies hanesan, Ai-teka, Ai-Saria no Ai-Mahoni, lansamentu ne’e hala’o iha loron Sabadu (18/02) iha Suku Ahik Postu Administrativu Lakluta.

Vice Ministru Marcos da Cruz iha nia Diskursu hateten, prioridade iha diresaun Jeral Floresta nian maka programa plantasaun ai neduni agora dadauk ita halo ona iha fatin rua (2) maka hanesan iha Postu Administrativu Atabae no Postu Adminisatrativu Dilor.

“Programa ida ne’e konsidera katak hanesan programa bo’ot ne’eduni ami mos tau osan bo’ot ba iha Dirasaun ne’e, depois iha mos programa seluk tan, hanesan programa reflorestasaun ne’e mos ami tau hanesan programa ne’ebe mak bo’ot iha Diresaun floresta” tenik Marcos.

Nia hatutan, kuda Ai industria ne’ebe produs ona iha tinan tolu nolu (30), maibe ita kuda mos ai horis seluk ne’ebe bele produs tinan-tinan, hanesan batar, modo no aifuan, hanesan programa agroflorestal kombinasaun entre ai industria ho ai horis sira ne’ebe maka bele produs tinan -tinan.

Ita hatene katak ita nia rai afetadu husi inundasaun iha tempu udan, tanba ne’e ita sei tau Guarda Floresta no tekniku sira atu bele tau matan, no sei iha kordenasaun diak ho lideransa lokal sira hanesan xefe Suku no guarda komunitaria sira atu bele apoiu hodi tau matan ba buat sira ne’e, hau fiar katak sei la hetan estragus.

Nia mos akresenta programa ne’e ita hakarak halo ba Estadu no Estadu sira nia komponente maka povu, tanba ne’e buat sira ne’ebe maka ita halo atu fo benefisiu ba povu no povu sira mos presiza kontribui, se kuandu povu sira kontribui hau espera katak ba futuru sei la iha problema ba iha Ai horis hirak ne’e.

Brigida Correia, Deputada Parlamento Nasional Komisaun D assunto Agrikultura ne’ebé toma konta iha area Agrikultura Peskas no Florestas hateten, Nu’udar deputada ba komisaun D agradese tebes hetan konvite tanba ne’e primeira vez hau mai iha fatin ida ne’e durante tinan 10 sai nudar deputada neduni fatin hirak ne’e potensial no importante teb-tebes atu dezenvolve iha area agrikultura, Agrofloresta.

“Agora dadaun ne’e ami komisaun D iha ona rejime jeral ba Florestas no tenta tinan ida ne’e antes ami nia mandatu remata tenke remata ho votasaun final global ba Lei Rejime ida ne’e. Rejime ne’e importante tamba bele utiliza atu Ministériu Agrikultura bele halo rekerimentus lei oan ne’ebe maka ki’ik liu atu bele dezenvolve ba seitor floresta”tenik Brigida.

Nia salienta, importante maka ita hotu servisu hamutuk atu bele dezenvolve ita nia rai Timor no ita labele dependente ba Mina. Ba futuru ita tenke dezenvolve ita nia riku soin hanesan seitor Agrikultura, seitor ne’ebe maka no 2 iha ita nia Nasaun depoisde Mina i agora dadaun mós iha lei kodiku primeiru ne’ebé maka tama ona iha komisaun D parlamentu no ami mós sei aprova atu bele ezekuta antes ami nia mandatu hotu iha tinan 2017 atu bele sai konselu automatika ba nasaun ida ne’e ita labele hanoin deit katak husi mina ita bele hetan reseita osan ne’ebé maka tama iha ita nia kofre maibé reseitas husi seluk ita nia riku soin ne’ebe iha ita nia rai laran presija mós atu reforsa ita nia orsamentu do estado.

Iha oportunudade ne’e Dedputado Dominggos de Carvalho komisaun D assunto Agrikultura ne’e mos hateten katak Ministeriu Agrikultura kada tinan iha revizaun orsamentu tau osan hodi ba iha konsellu ministru no to’o iha konsellu Parlamentu hodi aprovas, ami iha parlamentu nasional hein hela ita bo’ot sira nia prezensa, ho montante hira mak husi ministeriu lori ba aprezenta ida ne’e maka ami reprezentante povu ami nia kna’r atu vota hodi nune’e bele ezekuta laos atu hodi inpedementu orsamento jeral do estado ne’ebe husi kada ministerio.

Serimonia hanesan ne’e inportante no kapas tebes tanba koalia konaba espesie ai sira hanesan Ai-Saria, Ai-teka no Mahoni, husi parte ami nian sempre rekomenda nafatin ba iha diresaun Floresta iha Ministeriu, atu oinsa maka tinan- tinan atu tau nafatin orsamentu ba iha programa sira hanesan ne’e.

Alende ne’e Xefe Suku Ersilio Soares nudar Lider komunitariu iha Suku Ahik, salienta sira sempre servisu hamutuk ho Ministériu Agrikultura no Peskas liu husi Diresaun Jeral Floresta Tanba ne’e husi nia parte sente kontenti tebes ho programa ne’ebe oras ne’e dadauk implemeta ona iha sira nia suku.