Manatuto: Ministério Agrikultura Pekuária Peska no Floresta, (MAPPF) liu husi Sekretario Estadu Floresta (SEF) komemora loron mundial Floresta ho Tema “Ho Espirito komemorasaun loron Mundial Floresta mai hamutuk ita promove Ai-Laran no Ai-Han ba Futuru ne’ebé diak” iha komemorasaun ne’e ofisialmente marka prezensa husi Primeiru Ministru RDTL Kayrala Xanana Gusmão akompaiña husi Ministru MAPPF Marcos “Mameta” da Cruz. Atividade ne’e realiza iha loron (21/03/25) iha Balak Manatuto.
Iha diskursu PM Xanana esplika, Iha kintu Governu ne’e viveirus ne’ebe governu tau iha Maubara ho hanoin katak kada tinan sei kuda ai-hun 1millaun de arvore. “Tinan ida liu ba iha Obrato iha ONG lokál balu konvida PR nomós ha’u mai kuda ai oan balu.” Iha Planeamentu ordenamentu territorial iha kada munisípiu iha fatin barak kapas tebes floresta maka’as tebes, tanba ne’e mak Governu identifika uluk ho PAM, APA, xefe Suku no komunidade sira iha ne’e”.
Primeiru Ministru mós hato’o mensajen ba povu atu kuda ai-oan 1 milliuan de arvore kada tinan no husu ba komunidade sira atu servisu hamutuk ho Autoridade sira. Tanba viveiru iha Dili de’it se ita envolve Autoridade lokál sira hanesan xefe Suku halo viveirus iha kedas Suku, atu udan sira kuda rasik, ida ne’e ita sei aumenta liu tan, ba oin bele ona prezerva ita nia meiu ambiente.
Iha fatin hanesan Ministro Marcos hatutan, Floresta mak bele hamoris fali be matan sira hodi nune’e bele hamoris be ba natar to’os no ba animal sira. Realidade ne’ebé ita haree iha rai ne’e mak problema ho be. iha tempu udan hetan ba barak lori sedimentasaun barak. Ministériu haree buat rua ne’e hanesan Ai-han mak Agrikultura, Pekuária Peska no Floresta buat rua ne’e mak ligadu ba malu, ai-horis bele absorve fali karbonu ne’ebé la diak ba ema, no mós hasa’e fali oxijeniu diak ba ema.
Ministru haktuir, PAM Manatutu mós hatete ona problema balun iha Manatuto mak mota tanba tuir lolos bele lori be mai iha natar sira atu agrikultór sira halo natar, iha fulan Novembru maibé realidade seidauk bel tanba oras ne’e dadauk MAPPF sei esforsu oinsa bele normaliza kanu mota sumasi nian bele lori be ba iha natar ne’e. Tanba ne’e mak Ministériu buka atu konvense nafatin ho agrikultór sira atu iha nafatin vontade hodi servisu iha natar.
Ministru akresenta, área Floresta presiza halo reflorestasaun no proteje fatin sira ne’ebé define ona sai área protejida, Timor iha área protejida ne’e hamutuk 46. 44 ne’e área protejida terestre no rua área protejida mariña. Ida ne’e servisu hamutuk ho Sekretario Estadu Pesca no Sekretariu Estadu Floresta servisu oinsa mak atu bele proteje área protejida hirak ne’e atu nune’e maske iha sidementasaun barak, ita buka atu bele kuda ai hodi bele redus sedementasaun.
“Ami haree katak Floresta ne’e importante ai-han mós importante, ne’e duni ami so bele husu de’it agradese ba ema hotu ne’ebé mak iha ne’e ba lideransa no komunidade sira hotu, husu mós atu iha konsiensia oínsa ita bele servisu hamutuk proteje nafatin área protejida hirak ne’e, nomós halo reflorestasaun kuda ai. dadauk Ministériu viveirus permanente ha’at. Sentru viveirus bo’ot liu mak iha Maubara bele produs ai-horis barak kuaze 250 mill, tanba ne’e ba sentru ne’e Ministériu kria kondisaun diak nafatin, antes ne’e la iha moru no la produs ai-oan barak, ne’eduni MAPPF hadia ona kondisaun instala be no moru hodi bele produs ai -oan barak iha sentru refere.” Tenik Ministro Marcos
Nia realsa, sentru viveirus seluk hanesan iha Lospalos, Viqueque no Manufahi Ministériu koko atu hadia nafatin kondisaun hirak ne’e hodi bele produs ai-oan nune’e bele fahe ba komunidade atu bele kuda iha sira- nia rai.