Bobonaro-17/03/25 Ministru Agrikultura Pekuária Peska no Floresta Marcos “Mameta” da Cruz akompaña husi Prezidente Komisaun E ne’ebe tarata Asuntu Infraestrutua Marcos Xavier no Membru Parlamentu Nasional (PN) seluk partisipa iha serimonia kuda hare uza makina modernu ne’ebé apoiu husi programa SAPIP ba agrikultór sira iha Suku Meligo Postu Administrativu Cailaco.

Iha entrevista Ministro MAPPF hatete, atividade ida ne’e ita mai ho Prezidente Komisaun E, akompaña mós husi PAM, APA, xefe suku no komunidade sira kuda hare uza makina modernu. ’’Uluk ema kuda hare dala ruma kari de’it entaun maneira ne’e tradisonál liu, tanba ne’e mak agora MAPPF liu husi SAPIP distribui makina kuda hare. Ita la’os de’it kuda hare maibé atu distribui mós makina kuda hare, makina koa hare nomós tratór ki’ik hodi prepara rai. aproveita tempu ne’e ita mós ho Deputadu sira mai haree situasaun real iha ne’e, ami haree irrigasaun balun ne’ebé ita presiza tau atensaun ou hadia atu bele fornese be ba komunidade sira.’’ Dehan Ministro MAPPF

Governante ne mos informa katak, iha natar balu mós sei abandona tanba ne’e hakarak atu aumenta produsaun, primeiru tenki intensifika rai ne’ebé mak funsiona ne’e uza makina fila rai no makina koa hare. Rai ne’ebé mak abandona presiza mós irrigasaun. Irrigasaun naran Marco ne’e Enjineiru no Konsultan sira halo tiha ona dezeñu nune’e mós Halikou maibé Bilimau mak ita sei hare. Portantu totál makina 40 resin mak mai iha Postu Cailaco ne’e kompostu husi makina Kuda hare koa hare inklui tratór.

Ministru akresenta, grupu ida bele kompostu husi ema sanulu to’o ruanulu mak uza ekipamentu hirak ne’e ne’eduni grupu ida simu makina kuda hare rua makina koa hare ida no hand tratór ne’e bele ida ou bele rua. Maibé iha Munisípiu Bobonaro tomak iha makina ho tipu 3 ne’e, hamutuk atus rua resin mak destribui ona, makina sira ne’e hetan apoiu orsamentu husi Banco Mundial liu husi programa SAPIP.

Iha fatin hanesan prezidente Komisaun E, Deputadu Marcos Xavier agradese ba Ministro MAPPF bele konvida hodi partisipa iha atividade ida ne’e, hanesan Bobonaro oan iha PN hakarak hato'o katak atividade ida ne’e ita hare ho matan rasik, oinsa agrikultor hahu kuda uza makina kuda hare moderno ne’e hatudu katak iha mudansa ba Governu hakarak halo mudansa, liu hosi planu  no programa nebe diak tebes. Iha parte seluk membro PN hanesan mos Presidente Komisaun E nebe trata ba asunto Infrastrutura  hato'o opiniaun seluk iha parte Irrigasaun no agradese ba MAPPF tamba iha plano preioride boot knal irrigasaun iha teritorio ’’Ami haree mós irrigasaun barak mak halo ona. Hanesan prezidente Komisaun E hakarak mós haree irrigasaun sira ne’e halo duni ka lae, Ami aprova orsamentu iha PN katak atu halo irrigasaun, tanba ne’e mak agradese ba Ministru MAPPF tanba bele lori ha’u mai hodi haree diretamente kondisaun populasaun sira iha Postu Cailaco nian. Cailaco mós iha natar barak, maibe irrigasaun mak la sufisiente, entaun hanesan membru Deputadu hakarak rekomenda de’it ba Governu oinsa tau prioridade ba iha agrikultua sira liu-liu iha irrigasaun tenki halo atu bele hasa’e produsaun.’’

Nune’e mós Administrador Posto Administrativo (APA) Cailaco, Rodolfo da Cruz, hoto'o mos katak  Irrigasaun kada tinan komunidade sira mak ho inisiativa rasik hodi ke’e be iha mota laran maibé kuandu udan be sobu fila-fali, tanba ne’e ami hato’o hela ba Ministru MAPPF nomós ba PAM Bobonaro atu bele tulun ho ekipamentu pezadu hanesan eskavador atu nune’e karik udan bo’ot bele apoiu ona komunidade sira hodi bele neutraliza be.  Nia hatutan Preokupasaun konaba intek irrigasaun ba iha natar sira ne’ebé lokaliza iha Postu Administrativu Cailaco tanba área agrikultura iha Cailaco liga ho produsaun ne’ebé mak iha dezafiu mak be.

Depoiz de serimonia remata , Ministru MAPPF akompaña husi prezidente Komisaun E  kontinua vizita ba irrigasaun Maliana 2 nebe sei iha faze konstrusaun.Ekipa DMEA