Ainaro (5/3/2025), Ministériu Agrikultura Pekuária Peska no Floresta (MAPPF) liu husi Programa SAPIP lansa tan makina kuda hare no distribui ekipamentu agríkola ba grupu benifisiariu sira atu bele hasa’e produsaun hare iha rai laran. Serimónia lansamentu ne’e realiza iha aldeia Fatnaru suku Kasa Postu Administrativu Ainaro Vila.
Ministru Agrikultura Pekuaria Peska no Floresta Marcos “MAMETA” Da Cruz iha entrevista hatete, atividade lansamentu kuda hare uza makina modernu no distribuisaun ekipamentu agríkola hodi apoiu agrikultór sira atu halo natar diak liu, ekipamentu mak hanesan tratór liman (hand tractor)unidade 5, makina kuda hare 4.
Ministru realsa, apoiu ekipamentu ne’e ba grupu sira iha hanoin katak bele ona apoiu agrikltór sira reduz tempu servisu no kustu servisu iha natar laran, “ha’u agradese no apresia ba Banku Mundial ajuda ona agrikultór sira ho totál orsamentu $. 21 mill liu husi programa Sustainable Agriculture Productivity Improvement Project (SAPIP) tanba bele ajuda agrikultór sira iha governu anterior no iha IX governu ha’u koalia fali ho reprejentante banku mundial iha Timor -leste hodi aloka fali orsamentu $.7 mill hodi bele sosa ekipamentu agrikola nune’e atu bele aumenta produsaun rai laran”. Tenik Ministru
Ministru mós husu ba agrikultór sira ne’ebé mak hetan ona apoiu ekipamentu agrikola ne’e ho objetivu atu hasa’e produsaun hare ne’eduni makina hirak ne’ebé mak hetan ona ne’e tenki utiliza ho diak no kuidadu tanba halo manutensaun ne’e respozabiliza husi grupu sira nian ne’eduni ho makina sira ne’e bele badinas liu tan.
Iha fatin hanesan Country Representative World Bank iha Timor-Leste, Bernard Harbone senti kontenti tanba hamutuk ho ministru MAPPF hodi lansa kuda hare uza makina modernu no fahe ekipamentu agrikola ba grupu agrikultór sira tanba ne’e husi banku mundial espera katak ho apoiu sira ne’e bele aumenta produsaun kada tinan iha Timor-Leste.
Nune’e mós Presidenti Autoridade Municipal Ainaro Georgina Manuela C. B. Corte Real agradese ba Ministério Agrikultura tanba bele ona apoiu ekipamentu agrikola tanba agrikultura ne’e hanesan área ida ne’ebé mak prioridade ba Munisípiu Ainaro tanba agrikultura mak bele fo han komunidade sira, ne’eduni ho ekipamentu ne’ebé mak agriultór sira simu ne’e bele ajuda no fasilita ona sira ba oin badinas liu tanatu halo natar.
Nia realsa, antes ne’e komunidade sira halo natar ho tradisionál katak agrikultór sira kuda hare ho liman de’it entaun kustu ne’e boot tebes maibé ho makina kuda hare ne’e bele ajuda tebes sira tanba ho tempu badak ho ema ida de’it bele kuda rai ektare ida iha loron ida nia laran katak ne’e bele redus ona tempu servisu no kustu iha natar.
Alende ne’e, Felisberto de Araujo husi grupu haburas hetan apoiu makina agrikola sira ne’e diak tanba bele hakma’an servisu iha natar, antes hetan makina kuda hare ne’e banhira atu kuda hare tenki ema barak mak foin bele kuda hare maibé ho makina ne’e ema ida ka rua bele kuda ektare iha iha loron ida.
Partisipa iha serimónia lansamentu ne’e Presidenti Komisaun D Parlamentu Nasionál, Komdante PNTL Ainaro, Diretór Geral Agrikultura café Plantas e Industria, Inspetor Jerál MAPPF, Diretora Servisu Agrikultura Municipal Ainaro, Jestór SAPIP no grupu agrikultór sira. Ekipa DMEA