Covalima (4/3/2025), Ministériu Agrikultura Pekuária Peska no Floresta (MAPPF) liu husi Programa SAPIP lansa tan makina kuda hare no distribui ekipamentu agríkola ba grupu benifisiariu sira atu bele hasa’e produsaun hare iha rai laran. Serimonía lansamentu ne’e realiza iha aldeia Belaku suku Raimea Postu Administrativu Zumalae.

Ministru Agrikultura Pekuária Peska no Floresta, Marcos “MAMETA” Da Cruz  esplika, Ministériu hamutuk ho komunidade lansa kuda hare uja makina modernu tanba  antes ne’e agrikultór sira kuda hare uja liman ka kari de’it maibé agora Ministériu fahe ba grupu sira atu bele utiliza  no entrega mós makina tipu tolu ba grupu sira ho totál unidade 110 mak hanesan tratór liman unidade 48, makina kuda hare unidade 44, makina koa hare hamutuk 66  ba grupu 30  ne’ebé mak halo natar ektare kuaze atus tolu resin iha suku Raimea.

Ministru hatutan,totál natar iha suku Raimea ne’e hamutuk 700 ektare maibé natar ne’ebé mak ativu iha 346 ektare tanba ne’e MAPPF distribui makina ne’e ba agrikultór sira atu bele utiliza nune’e bele reduz tempu servisu no kustu iha natar. Orsamentu sosa ekipamentu ne’e husi Banku mundial  liu husi prorama SAPIP no jere liu husi Ministériu Agrikultura. “     Ministru husu ba agrikultór sira atu bele utiliza makina sira ne’e ho diak tanba antes sira uza makina hirak ne’e grupu sira hetan ona treinamentu husi staf tékniku sira atu bele halo operasaun ba makina hirak ne’e tanba ne’e husu ba grupu sira atu bele jestaun ne’ebé diak atu bele uza hodi hasa’e produsaun tanba objetivu Minist’eriu nian ne’e atu hasa’e produsaun hahú husi nivel suku to’o Munisípiu, servisu iha natar ne’e buat todan ida tanba ita tenki tama iha tahu laran no be laran atu bele kuda hare ne’eduni MAPPF fasilita grupu sira liu husi makina hirak ne’e atu nune’e sira bele badinas liu tan tanba Ministériu iha planu katak iha futuru sei halo kontrusaun ba irrigasaun iha área Raimea ne’e. Tenik Ministru.

Iha fatin hanesan, Presidenti Komisaun D Parlamentu Nasionál, Ricardo Baptista iha entrevista katak, komisaun D mai hodi akompaña servisu MAPPF nian iha baze konaba lansamentu kuda hare uza makina modernu no entrega mós ekipamentu agrikola ba grupu benifisiariu sira atu bele hasa’e produsaun iha setór agrikultura, makina hirak ne’e iha tipu tolu mak hanesan makina kuda hare, koa hare no tratór liman tanba ne’e mak Komisaun D mai akompaña programa ministériu nian iha baze nune’e Ministériu hato’o proposta ba parlamentu atu bele hetan aprovasaun iha PN nune’e orsamentu sira ne’e bele uza ba atividade  iha baze. “ Ha’u hakarak fo parabens ba Ministru MAPPF tanba atividade sira ne’ebé mak Ministériu halo ne’e refleta duni ba  nesesidade povu ne’e nian tanba dadaun ne’e ita hasoru problema boot mak menuz ai-han tanba ne’e liu huis apoiu makina sira husi Ministériu liu husi ni parseiru dezenvolvimentu sira ne’e bele hasa’e ona produsaun rai-laran liu-liu hasa’e produsaun iha fatin ida ne’e”.

Nia hatutan, komunidade sir abele utiliza makina hirak ne’e hodi hasa’e produsaun atu nune’e ita labele dependensia demais ba inportasaun maibé komesa hamenus no hodi bele asegura ai-han iha rai-laran.

Alende ne’e Crispin Gonzaga nu’udar xefe grupu hae’e Oan iha suku Raimea hato’o agradese ba governu ida ne’e tanba bele apoiu ekipamentu ne’e mai iha aldeia ida ne’e ho  programa ida ne’ebé mak diak tanba bele apoiu ona ami ho makina modernu sira ne’e bele fasilita tebes ami -nia servisu iha natar maske makina ne’e foun maibe ajuda tebes grupu sira hodi halo natar tanba iha tempu uluk kuda hare ho liman ne’e gasta tempu maibé dadaun ne’e  uza ona makina kuda hare entaun ektare ida bele oras 2 ho balun de’it.

Partisipa iha serimónia ne’e, Presidenti Komisaun D Parlamentu Nasionál, Reprezentante PAM Covalima, Komandante PNTL Zumalae. Diretór Geral Agrikultura Café Plantas Industria, Inspetór Jerál MAPPF, Jerente SAPIP no grupu agrikultór sira iha zumalae. Ekipa DMEA