Dili-Ministro Agrikultura Pecuaria Pesca no Floresta (MAPPF) Marcos “Mameta” da Cruz ofisialmente ensera treinamentu ba Tekniku hamutuk 49 ne’ebe mak remata ona sira nia treinamentu iha area agrikultura nian hahu iha loron 27 de Agosto to’o 16 de Setembro iha Munisipio Manatutu. Enseramentu ne’e hala’o iha loron Segunda (16/09) iha Salaun MAPPF Comoro.
Iha diskursu Ministro MAPPF hateten, treinamentu ne’e nia objetivu mak atu iha konhesementu ba tekniku sira nune’e bele transmite fali ba Agrikultór sira atu bele hatene saida mak formandu sira hatene ona hodi bele aumenta produsaun iha rai laran.
“Imi mos esplika katak treinamentu ne’e hahu husi fila rai ba to’o iha rai hahan iha armajenamentu, tanba ne’e hau husu ba formandu sira atu hakerek fila fali konaba treinamentu ne’e hahu husi loron primeiro hanorin husi professor ida ne’ebe, hau hakarak imi komprende didiak buat sira ne’e, tanba imi mak sai fali treinador ba agrikultór sira. Tanba ita atu aumenta produsaun presiza konhesementu husi tekniku sira.” Katak Ministro
Nia mos hato’o parabens ba formandu sira hotu, nia husu atu saida mak formandu sira aprende ona tenki implementa iha ida-idak nia munisipio, atu bele ajuda agikultór sira hodi bele produs aihan iha ita nia rai laran.
Iha fatin hanesan konseleiro Embaixada Xina iha Timor- Leste Zhao Suocheng hato’o nia agradese ba seremonia enseramentu ne’e, uluk nanain nia lori Embaxada China hakarak hato’o obrigada ba parte hotu, ho ita bo’ot sira nia susesu hodi kompleta treinamentu ne’e, no mos hakarak agradese ba MAPPF tanba fasilita ona hodi treinamentu ida ne’e akontese.
Nia hatutan, Treinamentu ida ne’e atu bele fo kapasitasaun ba Recursu Humanu no hanesan dalan pratika kooperasaun ida entre Timor Leste no China. Governo China tau importasia tebes ba iha Agrikultura nia dezenvolvimentu ho fahe esperiensia ida ne’e espera katak partisipante sira bele aprende oinsa mak kuda halo manajementu halo prosesamentu rai no to ba fa’an ho diak no bele aplika ida ne’e iha ita bo’ot sira nia servisu.
“Treinamentu ida ne’e bele lori konhesementu ba ita bo’ot sira atu oinsa bele hasa’e produsaun rai laran hodi bele dezenvolve setór Agrikultura iha Timor Leste espera katak ho treinamentu ida ne’e bele fo dezenvolvimentu ba setór Agrikultura no bele dezenvolve mos setór sira seluk.” Tenik ….
Nune’e mos Formanda Esmenia da Costa Nunes akresenta, Topiku ne’ebe sira hetan husi treinamentu ne’e mak hanesan, manajementu operasaun no mos fila rai hahu husi kuda to ba iha kolleta no mos prosesamentu ba to iha armajenamentu no foka liu ba iha merkadoria nian.
Esmenia hatutan, Durante semana tolu nia laran, formasaun primeiro professor sira fahe ba sira konaba Introdusaun no historia Nasaun China nian, ekonomia China nian ne’ebe durante ne’e sira lao to’o mai agora, politika iha Nasaun China, no mos konaba sira nia kultura ne’ebe sira implementa iha Nasaun China.Ekipa DMEA.
