Dili- Ministru Agricultura Pecuária Pesca no Floresta Marcos “Mameta” da Cruz, akompaña husi Secretario Estado Pecuária José Vieira de Araújo no Secretario Estadu Pescas Domingos da Conceição dos Santos “Maucaro” fo despedida ba Estudante hamutuk ema-na’in 140 ne’ebe mai husi Eskola Tékniku Agrikola sira atu bele ba tuir Formasaun iha Arava Internacional Center Of Agriculture Treaning (AICAT) iha Nasaun Israel. Seremónia despedida ne’e hala’o iha loron Kinta (05/09/24) Salaun Uma Adat Comoro.
Iha entrevista Ministru MAPPF esplika, atividade despedida ne’e ba Estudante sira ne’ebé atu ba tuir Formasaun iha área Agrikultura nian iha Nasaun Israel, ita hatene katak dezenvolvimentu iha setór Agrikultura hanesan fatór ida ne’ebé importante hodi dezenvolve Agrikultura tanba ne’e ita servisu hamutuk ho Governu Israel komesa kedas iha V Governu iha tinan 2015 to’o mai agora, ita hamutuk Estudante finalista husi AICAT ne’e ema na’in 548, iha tinan 2023 nian hamutuk ema na’in 50 ne’ebé oras ne’e dadauk tuir hela formasaun iha ne’ebá.
Ministru hatutan, estudante hirak ne’e sei ba aprende iha area oioin hanesan; área Agríkultura, Pekuária, Mekanizasaun no Prosesamentu, oinsa kuida sira-nia produtu nomós estuda kona-ba negósiu, oinsá mak sira bele kalkula hodi hetan lukru ka lae. Estudante sira ne’ebé agora dadauk atu ba mai husi Instituisaun 12 iha nivel edukasaun ne’ebé lahanesan mak, Eskola Tékniku Agrikol Iha Maliana, Natarbora, Fuiloro no mai husi Universidade hanesan UNTL, UNPAZ, UNITAL sira ne’ebe iha relasaun Agrikultura.
Nia informa, Formadu sira ne'ebe mak antes ne’e tuir formasaun iha ne’eba sira barak mak agora dadauk estabelese sira-nia negósiu, iha balu mós hetan servisu iha fatin ruma hanesan NGO ka instituisaun ruma, iha balu mak loke sira nia negósiu hanesan kona-ba kulat iha Ermera produtu tama ona to’o iha merkadu hanesan Lider Supermerkadu, iha Lospalos no Aileu sira balu halo ona produsaun kona-ba órtikultura. Tanba ne’e Ministério esperansa katak sira ne’e hotu fila mai ho sira nia koñesimentu ne’ebe mak sira iha bele implementa iha sira nia rai rasik.
Iha fatin hanesan Estudante Jil Amaral da Costa, agradese ba Governu liu husi MAPPF ne’ebe mak fo oportunidade ba sira atu bele tuir Formasaun iha rai liur. “Liu-liu ami hanesan Estudante ida iha parte ida ami tenki kapasita nafatin ami nia a’an iha area oioin liu-liu ba rai liur sira hanesan ne’e atu bele aumenta tan ami nia koneseimentu, tanba ita hotu hatene katak ita nia rekursu umanu ne’e presiza kualifika liu tan atu bele garantia estadu ida ne’e diak liu tan. Ami nia sentimentu ba oportunidade ida ne’e ami haksolok tebes tanba entre joven lobuk ida ami mak hanesan selesionadu atu ba aprende iha ema nia rai hodi bele estuda liu tan liu-liu iha area Agrikultura. Ami mos preparadu ona entermus de mentalidade fiziku preparadu.”tenik Estudante ne’e
Nia dehan, Israel hanesan nasaun ida ne’ebe mak matenek liu tanba ne’e maske iha situsaun funu maibe fiar katak Maromak sei proteje nafatin sira tanba ekipa balu ne’ebe mak agora dadauk tuir formasaun iha ne’ebá sira diak hela. Ekipa DMEA
