Viqueque-(19-08-2024) Ministerío Agríkultura Pekuaria Peskas no Floresta (MAPPF) liu husi Diresaun Servisu Agricultura Munisípiu Viqueque realiza atividade kolleta hare iha demo area hektares 206 ne’ebe utiliza adubus organiku Poc nasa, super nasa no hormonik ba primeiro epoka iha natar Bebui suku Uaitame postu administrativo Uatulari.
Iha entrevista Ministru Agrikultura Pekuaria Peskas no Floresta Marcos “MAMETA” da Cruz esplika, ohin (rad) segunda ita mai kolleta komunidade sira nia hare ne’ebe mak ho nia rezultadu ne’ebe diak tebes, ho produsaun ne’ebé mak iha bele atinje Estadu nia hakarak atu aumenta produsaun hodi redus importasaun husi rai liur.
Nia hatutan, realidade hatudu duni iha munisipiu viqueque depois kolleta hotu sira bele uza fali natar hodi kuda modo, tanba ita nia orientasaun ba desenvolvimentu agrikultura mak natar tenki utiliza barak, tanba ne’e mak ita tenki promove agrikultór sira hodi utiliza adubus organiku Poc nasa, super nasa no hormonik atu bele aumenta ita nia produsaun iha rai laran.
Ministru mos husu ba agrikultór sira hotu iha Timor laran tomak atu halo to’os no natar atu nune’e bele hasa’e produsaun iha ita nia rai laran liu-liu hare, ohin ita koa hare ho liman deit maibe ba oin ita bele uza makina koa hare ne’ebe mak ita iha hodi bele koa hamos kedas liu-liu iha Uatulari rasik.
“Atu hasae produsaun iha ita nia rai, tenki hadiak infrastrutura baziku no irigasaun sira ne’ebe oras ne’e funsiona hela, hanesan irigasaun Bebui, irigasaun Galata, irigasaun Bluto, irigasaun Oebaba atu bele halo nafatin natar, ita mos iha eskavator atu bele mobiliza hodi funsiona fali rai ne’ebe mak durante ne’e potensial ba natar hodi bele aumenta produsaun iha rai laran, maibe husu agrikultor sira tenki halo kordenasaun diak atu ne’e bele kolabora servisu iha tereno diak liu tan.” Tenik Governante ne’e
Iha fatin hanesan xefe suku Uaitame Marcelino Pinto Alves hateten, rezultado ba tinan ida ne’e diak liu fali tinan sir aba kotuk, tanba tinan ida ne’e produsaun iha Uatulari sae makas tebes tanba uza adubus organiku Poc nassa, super nassa no hormonik, husu mos ba komunidade agrikultór sira atu hari grupu hodi bele kontinua halo nafatin atu bele hasa’e produsaun hare liu-liu iha munisipiu viqueque.
Nune’e mos agrikultór Salvador Fernandes sente kontente tebes ho prezensa Ministru MAPPF nia ne’ebé bele kolleta diretamente sira nia hare, no rezultadu ne’ebe uja adubus organiku Poc nasa, super nasa no hormonik hatudu nia rezultadu diak tebes kompara ho tinan kotuk.
Agrikultór ne’e mos husu ba ministru MAPPF atu kontinua nafatin programa ne’e halo diak liu tan, atu nune’e agrikultór sira bele hetan rezultado ne’ebé diak, nune’e ba futuru sira bele kontinua nafatin halo to’os no natar. DMEA
