Dili- Ministériu Agrikultura Pecuaria Pesca no Floresta (MAPPF) liu husi Secretariu Estadu Floresta (SEF) realiza workshop Nasionál ne’ebé kolabora ho UNESCO Regional Office iha Jakarta no Komisaun Nasionál Timor Leste ba UNESCO (KNTLU), Workshop ne’e kona-ba nomeasaun Nino Konis Santana hanesan sítiu dezignadu UNESCO no planu asaun ba prezervasaun.

Objetivu husi workshop ne’e atu halo diskusaun kona-ba Parke Nasionál Nino Konis Santana, ne’ebé ita deklara iha tinan 2008 no agora atu eleva ninia nivél rezerva bele nomeia Parke ne’e ba iha UNESCO. Ministro MAPPF Marcos “Mameta” da Cruz, hato’o lia hirak ne’e hafoin partisipa iha Workshop Nasionál ne’ebé hala’o iha loron Quarta (07/08) iha Salaun MENK Pantai Kelapa.

Ministro akresenta, Iha Timor iha Parke Nasionál Nino Konis Santana ne’ebe  deklara iha tinan 2008, nomós iha tan parke Nasionál seluk hanesan Kablake  hanaran Kay Rala Xanana Gusmão maibe seidauk deklara, Parke Nasionál Nino Konis Sanatana UNESCO haree bazeia ba relatoriu no informasaun ba sira , no sira haree katak  bele elava ba iha nivel ida bo’ot liu ou nivel Mundial nian tanba iha Timor deside ona katak area protejida ne’e hamutuk 44 husi 44 ne’e 42 mak tama iha area terestre no rua  tama ba iha marina ou tasi nian. UNESCO mós hare katak Parke Nasionál Nino Konis Santana iha rikeza no Biodiversidade oioin, hanesan Manu Fuik Rusa, iha mos espesies Ai hamutuk 730, iha Parte tasi nian iha mos Corál no ikan ho kores oioin ne’eduni UNESCO eleva fatin ne’e ba patrimoniu Mundo nian.

“Kuandu ita eleva ona Parke sira ne’e sei iha vantajen barak ba ita Timor, vantajen ida mak iha parte ekonomia nian atu bele aumenta reseita ba komunidade lokál no mos ba iha ita nia Estadu, tanba ita promove ona Setór ekonomia, ida ne’ebé ita hanaran Turizmu, tanba ne’e kuandu ita foti ona ita nia parke hanesan Patrimoniu Mundo mak ema komesa hatene, entaun ema komesa mai vizita no hare, ita mos bele fa’an saida no hatudu saida, ita hatudu ita nia viodiversidade sira hanesan Kakatua lorico iha mos Lekirauk ne’ebe ho kor oioin ikan ne’ebe kor oioin.” Tenik Ministro MAPPF

Iha fatin hanesan Secretario Executivo UNESCO, Luis Nivio de F. Soares hatete, UNESCO hanesan parseria ho instituisaun Governu nian iha Ministério Edukasaun (ME) nia okos maíbe ninia funsionamentu ho misaun mak atu apoiu no habelar programa ne’ebe mak UNESCO implementa. Workshop ne’e nia objetivu mak atu bele kria Comitte Nasionál ida ba Man and Biosphere (MAB) nian, nune’e sei hare no diskute hamutuk dokumentus sira ne’ebé mak nesesariu hodi submete Parke ne’e ba UNESCO. Ita mós sei hare ba kriteria no regulamentu, prosedimentu sira oínsa mak bele nomeia Parke ne’e ba iha UNESCO. Hatutan Nivio.

Entretantu PAM Lautém, Melio de Jesus katak, komunidade ne’ebé mak hela iha area Parke Nasionál Nino Konis Santana sei hala’o atividade illegal kontra lei, hanesan tesi ai arbiru oho animal fuik sira ne’ebe partense ba iha Parke nasionál nian, ne’eduni nu’udar autoridade fo ona instrusaun ba parte komponente hanesan PNTL Munisipio Lautém, Gurda Floresta atu komesa hahu kontrolu komunidade sira ne’ebé sei halo atividade krime kontra lei sira ne’ebé iha.

“Ha’u mós koalia ho SEF ba oin ne’e sebele aumenta tan guarda floresta atu nune’e bele kontrola ita ninia Parke Nasionál ne’e ho diak, problema ida mak ita menus rekursu, tanba hanesan ita hatene Parke Nasionál ninia area ne’e luan tebes Hahu husi Iliomar mai to Iha Loré Mupitine tanba ne’e presiza rekursu ne’ebe mak sufisiente atu bele kontolu komunidade ne’ebe mak halo atividade kasa no tesi ai iha Ailaran arbiru.” tenik Nelio

Nomeasaun Parke Nasionál Nino Konis Santana hanesan rezerva biosfera tuir kategoria UNESCO’s Man and Biophere (MAB) ho objetivu hodi eleva estatutu konservasaun no promove envolvimentu komunidade iha konservasaun Biodiversidade.  Rekuñesementu ida ne’e la’os atu hatudu de’it valor ekolojiku no kultural parke nian maibé atu hadi’ak diak liu tan konservsasaun no esforsu ba dezenvolvimentu sustentavel Parke hanesan sítiu dahuluk hetan dezignadu Internasionál iha Timor-Leste.

Worksho Nasionál ne’e partisipa husi Ministro MAPPF, SEF Fernandino Vieira da Costa, SEP Domingos da Conceição, Diretór UNESCO Jakarta Maki Katsuno-Hayashikawa, Koordenador Rezidente ONU Funmi Balogon, Diretór Jeral Floresta Raimundo Mau no mos Diretór Geral Pescas Celestino da Cunha Barreto, Diretór jerál arte no kultura Sr. Gil Paulino dos Santos Oliveira, UNESCO Jakarta, Sr. Ryuichi Fukuhara, PAM Munisípiu sira. Ekipa MDEA