Ministerío Agricultura Pecuaria Pesca no Floresta (MAPPF) liu husi Diresaun Nasionál da Agricultura Hortikultura e Proteção das Plantas hamutuk ho resprezentante Governu Brunei Darusalam iha Timor-Leste, realiza atividade koko sabor fos husi hare oin hitu (7) atu bele identifika lolos sabor kompara ho fos sira seluk, komparasaun ne’e ba háre foun ne’ebé foin implementa pilotu fini hare husi Brunei ho variedade (BPH-188 no BDR-5). Atividade ne’e hala’o iha loron Quinta (01/08) Iha Hotel Golgota Comoro.
Iha entrevista Diretór Nasionál da Agricultura Horticultura e Proteção das Plantas, Lucio Romeo Ribeiro esplika, objetivu husi atividade ne’e atu koko fos ne’ebé introduz husi Governu Brunei, rezultadu ikus husi pilotu ne’ebe mak ita implementa. “Fini ne’ebé ita simu husi Governu brunei ituan de’it, ita nafatin fo konfiansa ba sira atu bele expansaun ba iha 5 ektare atu nune’e bele haree- nia progresu ba oin atu bele fo rezultadu ho diak. Husi pilotu ne’ebé mak iha agora ita koko katak BDR 5 mak nia sabor diak, mini, morin, ho ida ne’e mak ita nafatin dezenvolve, alende ita halo expansaun ba hare BDR 5 ne’e ita mós iha hare nakroma ho nakroma 1 ne’ebé mak iha tinan hirak nia laran uza iha Timor-Leste.” Tenik Lucio
Diretór hateten, Ba oin sei halo iha munisípiu hitu ne’ebé iha irrigasaun bo’ot, ita sei koko no diskuti klean kona-ba tékniku sira nian, oinsá atu uza adubu atu bele implementa iha munisípiu sira ne’ebé mak governu investe osan bo’ot ba irrigasaun sira ne’e atu dezenvolve makas liu tan atu bele hasa’e produsaun.
Iha fatin hanesan Representante Governu Brunei Darusalam iha Timor-Leste, Mimi Sunghi hatutan, hanesan Timor oan ida hakarak ajuda joven sira iha Timor laran, agradese ba Governu Brunei tanba bele fo fiar ba Timor hodi implementa atividade agrikultura ho MAPPF. Ho rezultadu husi kolleta nomós agora halo ona teste ba rezultadu ne’ebé mak iha prova katak fini iha kualidade duni no hetan 80%, fini 1 kg kuandu kuda bele hetan fali rezultadu to’o 400 kg.
Nune’e mós ofisial Fini Munisípiu Baucau, Basilio da Silva Pires informa katak, atividade pilotu ne’e implementa iha munisípiu Baucau no Bobonaro hare variedade oin rua mak hanesan BDR5 mai husi nasaun Brunei no PPH 188 mai husi nasaun Indonesia, hahu husi inisiu to’o agora MAPPF kopera diak tebes ho delegasaun husi Brunei hodi halo monitoring ba atividade ne’ebé mak lao iha munisípiu rua ne’e to’o kolleta. Ekipa DMEA
