Dili, Ministério Agricultura Pecuária Pesca e Floresta (MAPPF) servisu hamutuk ho Secretariu Estado Terras Propriedades halo demonizasasun ba uma komunidade hamutuk 65 ne’ebé durante ne’e okupa rai ministériu, tanba rai refere tempu badak ministeriu sei konstrui edifisiu foun. Atividade demonizasaun ne’e hala’o iha loron tersa-feira (11/06/2024) iha aldeia Moris Foun, suku Komoro.
Iha entrevista diretór jerál servisu korporativa, Rofino Soares Gusmão hatete, objetivu harahun fatin sira ne’ebé durante tinan barak komunidade sira okupa tanba ba oin Ministériu Agrikultura Pekuária Peska no Floresta iha espasu atu hari’i edifísiu foun ne’e hodi utiliza ba servisu ninian tanba ne’e mak ohin atu liberta rai ida ne’e, depoiz sei hadia fatin ida ne’e hodi funsionáriu sira bele servisu.
Rofino hatutan, Totál uma kain hamutuk 65 ministériu halo indeminizasaun ne’e fazeadamente iha etapa tolu, iha tinan 2021 hahú fó indeminizasaun ba 18 família, iha tinan 2022 fó ba 25 familía, ikus maka 22 família nune’e hamutuk 65 familia ne’ebé mak ministeriu liberta. ho osan hamutuk 684.544.00 USD, prosesu sira ne’e ministériu hahú husi 2021 to’o 2024 durante tinan 3 ka 4 nia laran. Nia informa tan, orsamentu ba uma montante orsamentu kada uma kain diferente tanba bazeia ba tékniku sira husi terras propriedades ho liñas ministeriais sira ne’ebé envolve iha ekipa ida ne’e no ekipa ne’e lidera husi diretór jerál terras ropriedades mak sai hanesan prezidente ba komisaun iha prosesu hahu to’o ohin loron, ne’ebé sira fó indeminizasaun ne’e kuaze montante hanesan tanba hare’e bazeia mós tipu uma ne’ebé mak sira halo.
Diretor salienta tan, depoiz harahun fatin ida ne’e ministériu iha planu ona atu konstrui moru uluk, depoiz mak hari’i edifísiu foun ba funsionáriu sira no orsamentu ba moru hamutuk 40.000 USD ba iha moru ne’e de’it maibé la hada bataku uza rede de’it tuir kondisaun ne’ebé iha depoiz kada tinan ministériu sei preve osan hodi halo konstrusaun.
Iha fatin hanesan diretór jerál Terras e Propriedades, Inacio Do Rosario Cabral dehan, Terras e propriedades hanesan instituisaun ida ne’ebé tuir Lei no iha kompetensia kontrola no jere patrimóniu estadu sira, nune’e iha prosesu ida ne’e sira atu hatete de’it katak prosesu ba alargamentu espasu ne’ebé mai husi ministériu agrikultura pekuaria, peska no Floresta prosesu husi 2021 tama iha rohan 2024, prosesu la’os de’it terras maibé involve liña ministerial durante ne’e esforsu tenta hodi apróxima nafatin ho komunidade sira ne’ebé afetadu nune’e to’o ikus instituisaun sira konsege konvense komunidade afetadu sira hodi bele implementa prosesu hari’i edifisiu foun Ministéru MAPPF nian.
Inacio Afirma tan, husi parte diresaun jerál sekretario estado terras propriedade agradese tanba hetan fiar husi VIII governu la’o mai agora hodi hamosu sekretariadu ida ne’ebé lidera diretamente husi diretor jerál terras e propriedades sai prezidente iha sekretariadu ida ne’e ho proativu nafatin tenta halo aproximasaun ba komunidade afetadu sira ho esforsu tomak liu husi governasaun bele muda komunidade sira hodi hahú grande projetu ba interese MAPPF nian.
Nia mós agradese ba parte hotu-hotu nia kolaborasaun liu husi xefi suku Komoro ho komunidade sira, ida ne’e atu dehan katak dezenvolvimentu la’os ba ema seluk, maibe fila fali nafatin ba komunidade sira tanba ne’e agradese tebes ba komunidade sira kontribui rai ida ne’e ho fuan bo’ot ajuda tebes iha parte governu ka estadu.
Iha sorin seluk xefe suku Komoro, Elisio Jose Da Silva Marçal hatutan, planu governu atu halo dezenvolvimentu tan ne’e hanesan suku sira kopera tebes atu bele halo mudansa nune’e komunidade sira hotu kopera bainhira dirijente liña ministerial trata asuntu ne’e hakat mai sira hela fatin iha suku ne’e hamutuk ho OPS mai fatin komunidade afetadu halo aproximasaun to’o ikus komunidade sira prontu atu bele muda fatin hodi entrega fatin ne’e ba iha MAPPF. DMEA
