Dili; Ministru Agrikultura Pekuária Peska no Floresta (MAPPF) hamutuk ho nia sekretáriu estadu pekuária, peska no floresta hala’o enkontru ho funsionáriu kazuais hamutuk 680 atu haree kontratu no kuñese funsionáriu sira hodi orienta servisu tuir area ida-idak nian ne’ebé Mak iha, hodi hasa’e produsaun iha Timor-Leste tanba ministériu presiza rekursu umanu ba setór agrikultura, pekuária, peska no floresta
“Ita asina ona kontratu nune’e ohin ita enkontru ho funsionáriu kazual hamutuk 680 ho objetivu atu hatene sira no orienta sira nu’udar funsionáriu kazual sira presiza hatene sira nia papel, servisu di’ak tuir matenek ne’ebé sira ida-idak iha tanba ne’e ministériu tékniku iha setór bo’ot haat, agrikultura, pekuária, peska no floresta importante tebes presiza rekursu umanu atu kontinua presta servisu ba ita-nia agrikultór sira hodi ajuda agrikultór sira tuir sira-nia matenek iha área agrikultura, pekuária, peska no Floresta nian hodi hasa’e produsaun iha setór importante ne’e”, dehan Ministru Agrikultura Pekuária Peska no Floresta Marcos “Mameta” da Cruz liu husi entrevista iha resintu edifísiu MAPPF Komoro, Dili segunda, (10/06/2024).
Ministru esplika tán, sira hasoru malu atu orienta funsionáriu sira hasa’e produsaun ba iha setór haat importante iha ministériu, iha área agrikultura aumenta produsaun batar, hare, modo, kafé, iha peska nian hasa’e produsaun ikan liu husi hakiak ikan iha bee midar, tasi ninin no tasi laran tanba ohin loron nia seidauk hare’e ema hakiak iha tasi laran, iha de’it mak ema hakiak ikan tilapia iha bee midar no hakiak boek iha tasi ninin nune’e presiza funsionáriu sira atu akompaña hakiak na’in sira ne’e.
Marcos salienta, iha área pekuária presiza aumenta karau, fahi no manu, iha área floresta mós presiza ema matenek la’os de’it atu presiza guarda floresta atu proteze ema tesi ai arbiru maibé presiza ema matenek halo estensaun esplika ba agrikultór sira oinsá halo viveiru, kuda ai ho di’ak nune’e labele mate.
Nia informa tán, ba funsionáriu kazual sira ne’e, ekipa avaliadór remata ona avaliasaun liu husi despaixu ba diretór jerál ho nasionál sira husi na’in-800 resin, nune’e sira asina ona kontratu depoiz durante fulan neen husi janeiru to’o juñu sira hala’o servisu realidade sira servisu duni neduni ministériu sei prosesu saláriu fulan neen simu dala ida de’it iha fulan janeiru to’o juñu, iha fulan neen mai tán mak sira sei halo avaliasaun fila fali ba funsionáriu kazual sira ne’e, sira ne’ebé servisu di’ak mantein, sira ne’ebé baruk ten la halo servisu sei hapara sira-nia kontratu. DMEA
