Liquisa - Ministério Agríkultura, Pekuária, Peskas no Floresta (MAPPF) liu hosi Diresaun Nasionál Estensaun Agríkola hala’o Engkontru Forum Annual Servisu Estensaun Agrikola (SEA) 2023 hodi haree Progresu no Dezafius Tinan 2023 no Plano Ezekusaun Tinan 2024 hamutuk ho Diretór Nasional, Diretór Agrikultura Munisipiu no Xefe Departementu Estensaun husi munisipiu hotu. Atividade ne’e hala’o iha salaun INPA Maubara, Loron Tersa, 16/01/2023.
Iha entrevista Diretór Nasionál Estensaun Agríkola, Januario Marçal esplika katak, engkontru forum annual servisu estensaun agríkola ho objetivu atu hare lisaun diak no dezafiu sira iha servisu estensaun iha tinan 2023, atu konsolida servisu estensaun ba tinan 2024 no ikus liu maka tau hamutuk komitmentu hodi hasa’e produsaun.
Husi enkontru ne’e espera katak buat balun ne’ebe implementa ona lao ladun diak karik ita hadia no halo diak liu tan iha tinan 2024 atu nune’e servisu hotu-hotu ne’ebe envolve estensionista bele servisu hamutuk no ba diresaun tekniku sira ne’ebe mak implementa atividade iha kampu bele involve ajente estensaun sira ne’e.
Nia hatete, Progresu tinan 2023 maka konsege uniformaliza orsamentu operasional ba ajente estensaun iha munisipiu tuir politika estratejia estensaun nian liu-liu tuir manual estensaun no implemtasaun osan operasional lao diak tanba uniforma tia ona nune’e ajente estensaun sira iha fali espiritu foun atu hala’o sira nia servisu iha kampu.
Planu ba tinan 2024 kontinua konsolida servisu estensaun fokus ba hasa’e produsaun, kontinua tau orsamentu operasional ba ajente estensaun sira, kontinua tau osan ba implementasaun demostrasaun plot no orsamentu ba kontinuasaun FFS iha area irrigasaun sira liu-liu area irrigasaun Bulutu no irrigasaun Maliana.
Iha fatin Hanesan Diretór Servisu Agrikultura Munisipiu Bobonaro, Alberto Gomes Lopes hateten, iha tinan 2023 servisu estensaun nafatin ezerse nia funsaun hodi kontinua fo asistensia tekniku ba natar no to’os nain sira tuir politika ministeriu ne’ebe hakarak hasae produsaun hanesan produsaun alimentasaun, produsaun ortikultura inklui setór seluk.
Rezultadu natar iha tinan 2023 kompara ho tinan kotuk iha mudansa tanba hetan ataka husi peste Karakol, distribusaun fini tarde no prosesu orsamentu iha aprovisionamentu ne’ebe la koresponde ho servisu tekniku hodi prejudika tekniku atu halo servisu ho maximu.
Nia dehan, Dezafiu ne’ebe hasoru maka distribusun fini tarde, distribusaun la kompletu hanesan fini too uluk maibe adubus seidauk too, ba oin distribusaun ne’e tenke pakote kompletu para distribui hotu ita orienta kedas tekniku sira ba tuir atu observa servisu ne’e lao ka lae, maibe esperensia ne’ebe iha distribusaun hirak ne’e balun lao ona balun seidauk. Dezafiu seluk maka trator sira avaria hotu. Ita nia komunidade inklui autoridade lokal mai husu para atu fila ona sira nia rai maibe kondisaun trator grave hotu nune’e ita labele atende,
Nia hatutan, Situasaun ne’ebe presiza resolve iha tinan 2024 maka trator tenke hadia, aimoruk pestisida tenke iha tekniku sira nia liman hodi halo atuasaun ba peste ne’ebe ataka hare no tenke konsidera mos tekniku sira liu husi kria kondisaun para sira bele akompaña natar nain sira husi inisiu prepara rai too iha kolleta, no kustu transporte ne’ebe governu fasilita ho montante osan $25/funsionariu ne’e la sufisiente tanba tekniku la hanesan ho funsionariu ne’ebe servisu iha administrasaun.
Engkontru Forum Annual Servisu Estensaun Agrikola (SEA) tinan 2023 ne’e hetan Partisipasaun masimu hosi Diretór Nasional Agrikultura no Hortikultura, Diretór Nasional Peskiza, Reprezetante Diretór Nasional Irrigasaun. Diretór Servisu Munisipiu hotu, Xefe Departementu Estensaun Munisipiu inklui Funsionariu Diresaun Nasional Estensaun Agríkola//Rn.
