Ermera-Ministériu Agríkultura e Pescas (MAP) liu hosi Programa Hasa’e Produtividade Agríkultura Sustentável (HAPAS) kolleta manu no ikan be’e midar husi grupu agrikultura sira ne’ebe maka hetan fundus husi HAPAS iha tinan kotuk.
Serimonia kolleta ikan no manu ne’e marka prezensa husi Sekretariu Estadu e Pescas Elidio Araújo prezidenti Autoridade Munisipiu Ermera Eusebio Salsinha, no mos Diretor Jeral sira husi MAP, seremonia kolleta ikan ne’e hala’o iha loron Quinta (16/09) Suku Batumanu Posto Administrativu Atsabe.
Tuir Sekretariu Estadu e Pescas Elidio Araújo hateten iha nia diskursu katak, husu grupu sira Depoisde kolleta tenki iha nia kontinuasaun ita lakoi kolleta hotu para ona iha ne’e, la iha kontinuasaun tanba ne’e maka governu nafatin apoiu grupu Agríkultor sira, no mos grupu sira seluk ne’ebe maka iha inisiativa hakarak atu dezenvolve ikan be’e midar, ita nia governu nafatin fo apoiu.
Governu iha sentru viveirus hira ne’ebe maka iha ita apoiu komunidade sira ne’ebe maka iha hakarak atu dezenvolve ikan be’e midar. tanba ne’e maka governu prontu atu apoiu ita nia povu Agríkultura sira hodi bele hakiak ikan be’e midar, atu nune’e bele dezenvolve ikan be’e midar diak liu tan iha Munisipiu rua ne’e hanesan Ermera no Aileu.
Iha nia parte mós hakarak hato’o Agradese tebes ba programa HAPAS ne’ebe maka servisu hamutuk ho Ministériu Agríkultura hodi fó apóiu ba ita nia komunidade ou maluk hakiak nain sira iha Suku ida ne’e.
“Hanesan membru governu hakarak hato’o ba grupu agríkultura sira katak ita nia programa sira hanesan ne’e labele remata de’it iha ne’e, tenki iha kontinuasaun. osan ne’ebe ita iha, balu ita uza ba ita nia nesidade no balu sosa fila fali ikan no manu atu ita kontinua hakiak fila, atu nune’e tinan oin ita kontinua kolleta fila fali, labele depois de programa SAPIP ne’e remata hotu ona. Hau lakoi ida ne’e atu akontese ba ita bo’ot sira.” Tenik Elidio
Nia akrasenta, husu ba Hakiak nain sira ka agrikultór sira katak, Kuda Saida Mak Ita Han no Han Saida maka Ita Kuda e Hakiak Saida maka Ita Han no Han Saida maka Ita Hakiak tanba ne’e iha Sira ne’eba governu anterior halo kolan bo’ot iha ne’eba entrega ba grupu, to’o ikus diskunfia malu hodi sobu tiha grupu ne’e hodi husik tia de’it kolan ne’e, ita tenki servisu hamutuk.
Atu dezenvolve ikan be’e midar ne’e prioridade liu maka ba Munisipiu rua hanesan Ermera no Aileu tanba Munisipiu rua ne’e tasi la iha, tanba ne’e maka ita tenki dezenvolve aquikultura ikan be’e midar iha Munisipiu rua ne’e.
Hau husu ba Suku ida ne’e atu labele para de’it ho grupu ida ne’e, karik iha ne’e iha be’e ne’ebe maka sufisiente husu atu kontinua forma nafatin grupu atu nune’e kontinua nafatin dezenvolve ikan be’e midar iha Suku ida ne’e.
Iha fatin hanesan Diretora Projeitu SAPIP Ervina Soares Pinto esplika katak, Hanesan ita hatene katak ita nia lansamentu iha tinan ida liu ba ona depois etapa tuir etapa ita bo’ot sira mos haruka proposta ba, no ami hare hodi verifika, atu dehan katak prosesu ida ke’e naruk tebes to’o ohin loron ita kolleta, buat hotu laos fasil, ita hotu tenki tuir kriteria husi Banku Mundial nian. Osan refere husi banku mundial maibe jere husi Ministériu Agríkultura e pescas.
“Tanba ne’e ohin ita kolleta ona ikan ho manu ne’ebe maka durante ne’e ita bo’ot sira hakiak, ho rendimentu ne’ebe ita bo’ot sira hetan bele hadia ekonomia uma laran bele haruka oan sira ba eskola. Husu ba grupu sira uza didiak osan ne’ebe iha atu kontinua nafatin hala’o atividade sira ne’e. Labele ohin ita kolleta hotu ona iha ne’e de’it.” Hateten Ervina
Nune’e mos Prezidenti Autoridade Eusebio Salsinha hatutan Programa sira ne’e hanesan inisiativa ida diak tebes, tanba ne’e husu ba grupu sira ne’e atu halo jestaun ida diak, atu ita bele iha retornu ekonomiku rasik ba ita nia a’an atu nune’e bele kore ita nia a’an husi kiak no mukit.
Ita labele para de’it iha ne’e ita tenki lao ba oin, espera katak ho apoiu sira ne’e bele sai mos benefisiu ba ita ida-idak, husu mos ba Ministériu bele karik halo kontrolu ida rigorozu atu bele kontrola animal sira ne’e labele mate, ita tenki evita atu nune’e
programa ne’ebe iha bele iha retornu ba ita ida-idak. Ou bele mos programa ne’e bele sai mos hanesan programa estafeta ida atu povu hotu-hotu bele hetan benefisiu husi programa ida ne’e.
Entertantu Xefi grupu hametin agríkultura Lorenço de Deus esplika katak, Orsamentu ne’ebe sira hetan husi ajensia SAPIP ba primeiro faze nian hamutuk 1467 dollar, ba segundu faze nian atu sosa ikan oan osan hamutuk 793 dollar fini ikan sira sosa husi ajensia Word Fish, total ikan oan ne’ebe sira 2000 ikan oan husik ba iha kolan ha’at, kolan ida ikan oan 500.
“Problema ne’ebe ami hasoru maka liu-liu ba fatin be’e tanba kolan refere ami ke’e de’it, tanba ne’e presiza be’e barak, maibe iha ne’e be’e menus tebes, tanba ne’e ami husu ba Governu liu-husi Ministériu Agríkultura e Peskas atu bele tau matan mai ami iha parte iha be’e nian. Atividade ne’ebe ami hala’o maka hanesan lor-loron ami mai fo han ikan halo manutensaun ba kolan hatama be’e to’o ohin loron ami kolleta duni, Rezultadu husi kolleta ne’e sai hanesan fundus ki’ik ida ba ami, ami sei rai hela hodi bele jere fila fali ba oin hodi kontinua fali ami nia atividade.” Hateten Lorenço
Nia informa, agora dadauk sira kolleta ona ikan maibe sira nia distansia do’ok tebes husi merkadu, no agora situasaun pandemia Covid-19 halo sira triste tebes tanba sira labele atu asesu ba iha merkadu.
Facebook Social Comments
