Ainaro- Ministériu Agríkultura e Peskas liu hosi Projeitu Hapas kontinua asina akordu ho grupu benifisiariu 14 iha suku Suru Craik no Mau Nunu ho totál orsamentu Dolares Amerikanu $. 85,831.50 ne’e atu apoiu grupu sira hodi hala’o atividade iha area Pekuaria hanesan hakiak animal, Hortikultura no Peskas, asina akordu ne’e hala’o iha loron 13-14 fulan Janeiru 2021 iha suku Maununu ho Suru Craik postu administrativu Ainaro.
Hari’I grupu laos de’it atu hala’o atividade kuda modo ka hakiak manu maibé inisiativa hari’I grupu ne’e atu ajuda malu iha parte saída de’it, grupu tenki servisu hamutuk iha parte hotu tanba programa Hapas fó apoiu fundus ki’ik ne’e laos ba atividade ida de’it neduni funsaun hari’I grupu sekundu membru grupu ida hetan susar tenki hamutuk atu ajuda malu hodi hakma’an membru refere, lia hirak ne’e hato’o hosi diretór Projeitu hapas, César José da Cruz banhira asina akordu ho grupu benifisiariu iha suku Maununu.
Nia realsa katak, apoiu fundus ki’ik ne’ebé mak mai iha suku maununu no suku suru craik ne’e laos osan ki’ik neduni husu ba autoridade lokál sira atu tau matan ba grupu sira atu nune’e grupu sira ne’e bele jere orsamentu tuir proposta ne’ebé mak sira hatama tanba liu hosi atividade ne’e atu hadia ekonomia familia idak-idak nian.
Nia hatutan, maske ho situasaun Estrada at no hakur mota hodi lao de’it to’o iha suku hodi hasoru grupu sira atu asina akordu neduni husu ba grupu sira katak tenki halo buat ida ne’ebé mak bele dezenvolve suku maununu no suku suru craik laos atu simu tiha osan ho montante boot depois uja fali ba buat seluk, neduni grupu sira tenki servisu hamutuk no haka’as an atu nune’e atividade ne’ebé mak imi hala’o ne’e susesu iha futuru tanba programa HAPAS ne’e tenki iha sustentabildade.
Iha fatin hanesan, Valenti Ramos Bianco hanesan xefe suku Maununu hateten katak, programa Hapas tama iha suku maununu ne’e ami agradese tebes tanba programa ne’e bele fó benifisiu boot ba komunidade iha suku ida ne’e atu hadia sira nia moris liu hosi atividade hanesan hortikultura, peskas no pekuaria.
Nia husu ba grupu benifisiariu sira tenki badinas servisu no tenki iha kolaborasaun entre membru grupu no autoridade lokál iha suku no aldeia inklui tekniku sira atu nuene’e servisu ne’e bele ba oin tanba osan hosi fundu ki’ik ne’e laos oan ki’ik maibé ne’e osan boot neduni grupu sira tenki jere osan ne’e halo didiak neduni ba oin sei sai buat boot ida iha suku ida ne’e.
Programa Hapas ne’e diak liu kompara ho Ong ka ajensia sira seluk ne’ebé maka durante ne’e tama iha suku maununu fó apoiu ba komunidade iha ne’e, tanba Hapas apoiu komunidade dereta ho orsamentu ne’ebe boot no grupu sira mak jere rasik kompara ho ajensia ka ONG sira seluk ne’e entrega sasan de’it ho kuntidade ne’ebe mak ki’ik neduni kundu programa remata entaun buat hotu sei remata maibé Hapas nia programa sei iha kontinuasaun ba iha future.
Alende ne’e, Luduvinho da Costa hanesan xefe grupu Haburas Suru Craik, agradese tebes no senti kontenti ba programa Hapas tanba ha’u nuda’ar joven ida bele involve dereta iha programa ne’e hodi hetan apoiu atu bele hadia ami nia ekonomia liu hosi atividade hakiak manu.
iha grupu ne’e membru hamutuk 18 kompostu hosi feto 7 no mane 11, grupu ne’e sei atu hakiak manu katak hiak manu laos atu fa’an de’it maibé ami mós bele han atu bele hadia nutrisaun familia idak-idak nian.
Nia ms husu ba mebru grupu sira tenki servisu maka’as no servisu tenki ho ekipa atu nuane’e atividade hakiak manu ne’e ba oin bele susesu tanba liu hosi atividade ne’e sei fó benifisiu ne’ebe mak boot ba ita no atividade ne’e tenki iha nia sustentabilidade.
Nune’e mós xefe grupu Sique iha suku Maununu, Bernadete F. Xavier Corte Real mos senti kontenti tanba bele hetan apoiu fundus ki’ik hosi MAP liu hosi projeitu Hapas ne’e tanba liu hosi atividade hakiak manu ba oin ami bele faan no osan hirak ne’e bele sustensa ami nia uma laran.
Grupu Sique ho nia membru hamutuk 30 kompostu hosi feto 14 no mane 16, ba oin ami sei servisu makas atu nune’e ami nia atividade ne’e bele susesu iha futuru. (E”S)
