Ermera- iha loron sabadu ( 14/11/20) Ministru Agrikultra e Peskas Simbolikamente entrega animál hanesan manu no bibi ba grupu benifisiariu hamutuk 6 ne’ebé maka sai alvu ba programa HAPAS ho objetivu hosi hakiak animál bele hasa’e rendimentu familia ka hadia ekonomia familia nian, orsamentu apoiu fundus ki’ik ba grupu 6 ho totál hamutuk $. 26,231 mill dolares amerikanu iha suku Ailelo postu administrativu Hatulia.
Ministru Agrikultura e peskas, Pedro dos Reis depoizde entrega animál ba grupu sira, husu ba grupu sira katak tenki kuidadu didiak tanba Minitériu liu hosi projeitu HAPAS nia- esforsu apoiu grupu sira liu hosi atividade pekuaria, peskas, floresta no hortikultura no program ne’e tenki susesu maibé atu susesu savi iha grupu sira nia liman, tanba oportunidade atu hetan apoiu ne’e laos mai loron-loron maske liu hosi prosesu ne’ebé maka naruk maibé grupu sira ohin bele simu ona apoiu animal neduni grupu sira tenki servisu maka’as atu nune’e ikus mai sei hetan rezultadu ne’ebé mak positivu.
Apoiu grupu sira ne’e hosi programa HAPAS no sei iha mós apoiu sira seluk hosi ajensia seluk maibé tenki haree tanba ajensia sira labele halo programa ne’ebé hanesan sekarik Hapas fahe ona animál hanesan bibi ho manu iha aldeia ida entaun ajensia seluk mai tenki halo buat seluk.
Ho surtu Covid 19 ne’e ita esforsu kuda saida mak ita han no han saida mak ita kuda neduni husu ba inan-aman no grupu sira tenki servisu makas atu hasa’e produsaun iha area agrikultura, pekuaruia no peskas, munispiu Ermera iha tekniku iha area hirak neduni grupu sira hetan problema ruma tenki kontaktu ba diresaun servisu Munispiu neduni iha futuru mai ita-nia moris sei iha mudansa.
Grupu sira ne’ebé maka hakiak animal tenki prosesa hahan animál uja material lokál iha rai laran labele gasta osan atu sosa tan hosi rai liur, material hanesan hare hikis no batar hikis ne’e ajuda fali maluk agrikultór sira seluk ne’ebé maka halai natan no kuda batar buat hotu ne’e iha ligasaun neduni ita espera katak ba oin ita mós bele ona eksporta ba rai liur neduni agrikultór sira koko atu servisu hamutuk tanba vontade servisu ne’e tenki mai hosi agrikulór sira rasik neneik ita mós sei bele atiniji saida mak ita hakarak.Tenik Ministru
Nia hatutan tan, Ministériu liu hosi projeitu HAPAS iha planu sei halo kompetisaun entre grupu benifisiariu sira iha munsipiu ne’ebe maka sai alvu ba basias hidrografika hanesan Basias hidrografika Raumoco, Loes, Be lulik no Tono atu nune’e bele motiva grupu sir a servisu maka’as no sai ezemplu ba grupu ka komunidade seluk atu badinas tanba rezultadu hosi atividade ne’e atu sustensa familia ka grupu sira nian laos atu entrega fila –fali ba guvernu.
Iha fatin hanesan, Presidenti Autoridade Ermera, hanesan mós presidente Basias Hidrografika LOES, José Martinho Dos Santos Soares, esplika katak, postu Hatulia ho nia totál populasaun 44 mill ne’ebé mak boot liu entre postu adminitrativu hotu iha munisipiu Ermere neduni maioria komunidade iha postu ne’e moris hosi vida agrikultura neduni ejije ba governu atu tau matan, tanba guvernu lokál iha munispiu seidauk iha posibilidade atu bele halo buat barak inklui apoiu agrikultór sira neduni ho tulun no apoiu guvernu sentrál nian liu-liu Ministériu Agrikultura ne’ebé maka durante ne’e tau matan ba agrikultór sira liu hosi programa hasa’e produtividade agrikultór sira nian atu nune’e iha tinan ida bele hadia agrikulór sira nia ekonomia hosi baze.
Nia mós husu ba grupu sira tenki haree no kuidadu animal ne’ebé maka simu tanba iha futuru mai ita-boot sira sei hetan benifisiu ne’ebé boot hosi atividade ne’e e liu hosi atividade ne’e sei hadia ekonomia grupu no familian nian, sekarik ita –boot sira nia animal sira moras tenki kontaktu ho pekuaria iha diresaun servisu agrikultura minisipiu atu nune’e bele halo atendementu kona –ba ida ne’e.
Alende ne’e, Xefe suku Ailelo, Lourenco Martins agradese no orgullu ba programa HAPAS ne’ebe mak involve komunidade iha aldeia hat iha suku refere iha programa ne’e tanba liu hosi apoiu ba komunidade iha suku ne’e, sir a bele hadia ona sira nia moris liu hosi atividade hanesan hakiak manu, bibi, ikan, karau no kuda modo ne’e hanesan baut diak id aba grupu sira atu bele hadia ekonimia uma kain ida-idak nian.
Serímonia entrega animal ba grupu banifisiariu ne’e partisipa hosi Presidenti Autoridade Ermera, Diretór jerál floresta, Diretór Jerál Peskas, Diretór Nasionál Pekuaria, Diretór Diresaun Servisu agrikultura Ermera, no xefe departamentu, Diretór Pojeitu HAPAS, autoridade lokál hanesan xefe suku no xefe aldeia, ekipa HAPAS Nasionál inklui grupu benifisiariu sira. (E”S)
