Maliana –- 28 Maiu 2018, Municipiu Bobonaro. Presidente Autoridade Municipu Bobonaro Sr. Zeferino Soares do Santos, hamutuk ho Diretur Servisu Agrikultura Municipiu Bobonaro Sr. Aderito dos Santos, iha loron Segunda ,28 Maiu 2018 konvoka sorumtutu harmonizasaun ba Parseiru Dezenvolvimentu sira ne’ebé fo apoiu ba dezenvolvimentu setor agrikultura iha Municipio Bobonaro hanesan TOMAK, AVANSA (USAID), WORLD VISION, MERCY CORPS (AUSAID), OHM, JICA, TIMOR AID no HAPAS/SAPIP, iha Salaun Administrasaun Municipiu Bobonaro ho objetivu atu aktualiza progressu aktividades kada parseiru iha trimestre dahuluk tinan 2018 nian.
Iha sorumutu ne’e Presidente Autoridade Municipu Bobonaro Sr. Zeferino Soares do Santos iha ninia lia-fuan abertura hatoo katak ’’buat ida mak hau haree iha area agrikultura nian mak maske la’os hotu maibe produsaun balun hatudu ona rezultadu ne’ebé di’ak. Kestaun mak oinsa atu bele buka dalan hodi halo kontratu ho agensia markadu sira, no oinsa ita mos bele fasilita agensia sira hodi hatene aksesu ba iha produtu agrikultura nebe mak iha ona”. Tamba ne’e liu husi sorumutu ida ne’e hanesan oportunidade ba Parseiru Dezenvolvimentu sira atu fahe informasaun ho Autoridade Municipio progresu servisu to’o iha ne’ebé, obstaklu saida mak infrenta no atu prevene kompetisaun no duplikasaun ka overlapping ba atividades hirak ne’e iha terenu liliu liga ho grupu agrikultor sira ne’ebé sai benefisiairu alvu ba projetu hirak parseiru sira nian.
Sorumutu ne’e ne’ebé fasilita husi Sr. Aderito dos Santos, Diretur Servisu Agrikultura Municipiu Bobonaro fo oportunidade ba kada reprezentante husi projetu parseiru dezenvolvimentu hodi aprezenta jeralmente ba sira nia progressu implementasaun servisu. Reprezentante sira halo aprezentasaun no diskusaun ida produtivu no hato’o sira nia kompromisu atu bele koopera liu husi koordenasaun di’ak liu tan iha futuru.
Atu mantein sorumutu harmonizasaun ida ne’e, Autoridade Municipal Bobonaro ho parseiru dezenvolvimentu hamosu formatu ka template ida hanesan meius ida atu aprezenta informasaun konaba progressu servisu parseiru sira iha sorumutu tuir mai. Formatu ida ne’e mak sei sai hanesan baze hodi prepara relatóriu kada tinan mai iha Autoridade Municipal Bobonaro.
Autoridade Municipal Bobonaro ho parseiru dezenvolvimentu sira mos hamosu konkordansia ida atu konvoka sorumutu ida ne’e fulan tolu dala ida (trimestral), atu nune’e karik iha obstaklu ruma hamutuk bele buka solusaun immidiata hodi asegura implementasaun atividades la’o tuir planu defini nanis ona.
Nune’e mos Autoridade Municipal Bobonaro ho parseiru dezenvolvimentu konkorda katak sorumutu hanesan ne’e iha futuru sei fasilita husi kada parseiru dezenvolvimentu sira. Sorumutu ida agora ne’e fasilita ona husi TOMAK no hothotu konkorda indika SAPIP mak sei fasilita sorumutu trimestral tuir mai. Autoridade Municipal Bobonaro liu hosi Diresaun Servisu Agrikultura Municipio sei envia karta pendidu ida mai SAPIP ba asuntu temin iha leten.
Iha enseramentu, Presidente Autoridade Municipio Bobonaro Sr. Zeferino Soares do Santos kongratula parseidu dezenvolvimentu sira hotu ne’ebé hatudu boa bontade hodi halo diskusaun iha sorumutu ida ne’e la’o di’ak no produtivu no espera apoiu sira ne’e sei fo moris di’ak ba povu agrikultor sira iha Municipio Bobonaro.
