Papua New Guinea - Ministeriu Agricultura e Pescas, partisipa iha Ministerial Meeting ba dala 6, ne’ebe realiza hosi Coral Triangle Initiative (CTI). Objetivu hosi Ministerial Meeting ida ne’e, hodi fo apresiasaun ba agrementu kona ba estabelesementu CTI-CFF sekretariu rejional, hodi adopta resume atividade hosi Senior Official Meeting ba dala 11 no 12, no adopta orsamentu CTI-CFF sekretariu rejional ba periodu tinan 2017 no 2018 no kada ministerial hosi nasaun 6 asina agrementu hamutuk ba planu asaun rejional

Ministru Agricultura e Pescas (MAP) no Ministru Koordenador ba Asuntu Ekonomiku (MECAE), Estanislau Aleixo da Silva, ne’ebe partisipa iha Ministerial Meeting, hato’o apresiasaun official katak governu Republika Demokratiku Timor-Leste, apresia tebes ba Senior Official Meeting ba dala 12 no Ministerial Meeting ba dala 6, husi CTI, kona ba Coral reefs, Fishers and Food Security (CTI-CFF) no special hato’o ba governu Papua Nova Guinea, ne’ebe fasilita no fo asistensia ba delagasaun hosi Timor-Leste hodi atende enkontru importante ida ne’e.

Liu hosi statementu official ne’ebe aprezenta hosi governu Timor-Leste, Ministru Estanislau da Silva, hato’o katak, Timor-Leste hetan graca boot tanba riku ho rekursu natureza, uniku ba landscape no biodiversidade.

“Ami iha coastline 735km no 72,000km square hosi zona ekonomiku esklusivu ba bioverisidade maritima. Rekursu natureza sei presiza dezenvolve liutan tanba factor investimentu sei limiti, teknologia, konyesementu no rekursu humanus mos sei menus”. Tenik Estanislau da Silva.

Ministru Estanislau reafirma katak, governu Timor-Leste durante ne’e servisu maka’as ba dezenvolvimentu ekonomia ne’ebe siknifikante, hahu hosi restorasaun independensia iha Maiu 2002. Esforsu ne’e governu sei kontinua halo hodi atinji dezenvolvementu sustentavel ne’ebe inklusivu, tuir visaun strategia dezenvolvimentu hodi atinji nasaun ne’ebe ho nian capital mediu ba tinan 2030, katak sei kombate probeza.

Iha statementu official ne’ebe Ministru Estanislau aprezenta iha loron 3/11, iha Port Moresby, Papua New Guinea, esplika klaru katak sektor pescas regula ho diak, tuir Lei, regulamentu no diploma ministerial ne’ebe vigora, maske iha lei balun ne’ebe presiza kompleta ho forte liutan, hodi bele proteze rekursu tasi nian. Maibe industria pescas iha Timor-leste sei fraku no seguransa fronteira tasi sei hetan limitasaun, liu-liu iha parte norte. Ho nune’e, rekursu estadu ba iha sektor pescas, iha ona targetu hodi tau atensaun ba atividade ilegal haensan pratika pescas illegal.

“Presiza iha planu strategia hamutuk hodi halo asaun hasoru pescas illegal, ne’ebe la kontrola no laiha relatoriu iha Arafura Timor Sea”. Esplika Estanislau da Silva.

Liu hosi Ministerial Meeting ba dala 6, governu Timor-Leste liu hosi MAP, mos esplika katak Timor-Leste sei servisu hamutuk ho nasaun vijinhu sira hanesan Australia no Indonesia, ho objetivu hodi kontrola no kombate atividade pescas illegal iha tasi Timor.

Timor-Leste mos dezenvolve ona strategia hodi hasae seguransa aihan, oinsa atu hare vitamina no proteina ba aihan ne’ebe produs.

“Proteze rekurus tasi no dezenvolve industria pescas, komesa hala’o ona hosi baze, hodi proteze ambiente ne’ebe balansu, hodi nune’e bele seguru aihan, capital no kampu de servisu”. Tuir statementu official.

Governu Timor-Leste iha ona komitmentu hodi kria no hametin relasaun servisu ne’ebe diak ho parseiru dezenvolvimentu, liu hosi servisu bilateral no multilateral ba iha aspektu dezenvolvimentu ekonomia.

Timor-Leste rasik sai ona membru hosi konvensaun internasional hanesan Kyoto Protocol. Iha nivel rejional, Timor-leste pro-ativu involve iha Projetu Arafura and Timor Sea (ATSEA), Coral Triangle Initiative on Coral Reefs, Fisheries and Food Security (CTI-CFF), Asia-Pacific Fishery Commission (APFIC), Partnership in Environmental Management for Seas of East Asia (PEMSEA) no Regional Plan of Action (RPOA).

Liu hosi Ministerial Meeting ne’ebe partisipa hosi nasaun 6 hanesan Indonesia, Malaysia, Papua New Guinea, Filipina, Solomon Island no Timor-Leste. Ministru MAP no MECAE, Estanislau da Silva, halo statementu katak, governu Timor-Leste iha komitmentu hodi adopta planu asaun rejional CTI-CFF, hodi hatama iha planu asaun nasional.

“Ami prontu hodi asina statementu liu hosi enkontru ministerial ba dala 6 ida ne’e. iha fleksibilidade hodi respeita no konkorda hodi adopta agenda ba dala 6, liu hosi Forum CTI-CFF ne’ebe determina hamutuk ona”. Afirma Estanislau da Silva ba delegasaun tomak hosi nasaun 6.

Liu hosi MInisteria Meeting nasuan hamutuk 6, asina akordu ba planu asaun rejional. Hosi Timor-Leste rasik, mak Ministru Agricultura e Pescas no Ministru Koordenador ba Asuntu Ekonomiku, Estanislau da Silva. Hosi Papua Nova Guinea Ministru Enviromentu no mudansa klimatika, John Pundari, hosi Salomon Island, Ministru Mudansa klimatika, Samuel Manetoali, hosi Malaysia Ministru Siencia no Teknolojia, Datuk Seri Madius Tangjau, hosi Indonesia Sekretariu Jeral Pescas no Filipina Vice Ministru ba Pescas.

Tuir agenda ba tinan 2017 sei kontinua halo Senior Official Meeting iha Filipina, hodi hare fila fali progresu hosi membru CTI-CFF ninian servisu iha baze durante tinan ida nian.