Bobonaro,(31/1/2025), Governu liu husi Ministério Agrikultura Pekuária Peska no Floresta (MAPPF) esforsu atu hasa’e produsaun hare iha rai laran, ne’eduni Ministério husi programa Sustainable Agriculture Productivity Improvement Project (SAPIP) lansa tan makina kultivasaun hare dahuluk uza teknolijia modernu hanesan makina kuda hare ba natar ektare 4 iha Aldeia Samaklot suku Ritabou Postu Administrativu Maliana Villa.
Ministru Agrikultura Pekuária Peska no Floresta, Marcos “MAMETA” da Cruz iha entrevista katak, Ministério fahe makína teknolójia foun iha tinan kotuk no dadaun ne’e lansa ona makina kultivasaun hare ho objetivu atu ajuda natar na’in sira hodi reduz oras servisu, makina hirak ne’e sosa ho orsamentu Banku mundial nian liu husi Programa SAPIP ne’ebé mak jere husi MAPPF.
Ministru hatutan, Makina kultivasaun hare hamutuk unidade 23 ba kada grupu hetan makina ida no, maibé la’os makina kuda hare nian de’it iha mós makina kari hare musan, makina koa hare kada grupu 2 hetan ida, Ministério mós fahe makina hanesan Tratór liman no makina seluk tan ba grupu sira durante ne’e, nune’e bele reduz kustu ba servisu iha natar, Orsamentu ne’ebé mak sosa ekipamentu hirak ne’e husi Banku Mundial ho totál $. 361.000,00 ba grupu 23 iha Munisípiu Bobonaro.
Iha fatin hanesan Presidenti Komisaun D Assuntu Ekonomia iha Parlamentu Nasionál, Ricardo Baptista, agradese ba MAPPF tanba bele introduz ona teknolójia modernu ba natar na’in sira liu-liu ba grupu sira ne’ebé mak hetan ona ajuda husi Ministério Agrikultura, liu husi apoiu hirak ne’e bele hasa’e produsaun rai-laran tanba durante ne’e ema barak koalia dehan produsaun rai-laran liu-liu fos mai husi rai liur ne’eduni ho oportunidade ida ne’e bele uza teknolójia foun sira ne’e bele hasa’e produsaun no hakma’an mós servisu iha kampu. “ha’u mós hato’o parabens ba joven sira iha Maliana tanba iha joven balun sei hakarak atu servisu iha natar hodi kuda hare maibé ho situasaun real ne’ebé mak ita haree katak joven barak buka servisu ba fali rai liur, ba buka servisu seluk ne’e atu bele aumenta esperiensia maibé diak liu mak halo natar hodi kuda hare”. Tenik Nia
Alende ne’e Xefe Grupu Tane Produtu lokál iha Suku Ritabou Yohanes Fernandes hato’o agradese no aprseisa ba servisu Ministério Agrikultura liu husi SAPIP apoiu ona ekipamentu modernu mai iha grupu agrikultór sira oinsa mak atu bele hakma’an servisu grupu iha natar laran inklui reduz gastu ba servisu nian.
Partisipa iha serímonia lansamentu ne’e husi, Reprejentante PAM Sekretário asuntu Sosial, Presidenti CCLN, Komdante PNTL Bobonaro, Inspetór Gerál MAPPF, Diretór nasionál DNPE, DNEFA no komunidade sira iha suku Samaklot Ritabou. Ekipa DMEA
