Dili, 21 setembru 2023-Ministériu Agrikultura Pekuaria, Peska no Floresta liu hosi Diresaun Nasionál Seguransa Alimentar hamutuk ho Liña ministerial sira hala’o enkontru hodi diskute kona-ba preparasaun loron ai-han mundial ne’ebé sei monu iha loron 16 outubru.
Iha entrevista diretór nasionál Seguransa Alimentar, César José da Cruz esplika, Kada tinan Timor-Leste sempre komemora loron ai-han mundial, tanba ne’e ohin hala’o enkontru hamutuk ho liñas ministeriais no mós ajensia lokál balun no Care Internasional atu bele tau hamutuk ideia nune’e ita bele selebra loron aihan mundial. ho tema ne’ebé mak kondis ho situasaun real rai laran.
“Ko’alia kona-ba mal nutrisaun ne’ebé maka sai problema mundial liu-liu iha Asean no Timor-Leste, nune’e oinsa hadia seguransa ba aihan seguru, sira ne’e hotu sai preokupasaun ba ministeriu agrikultura no mós ministeriu sira seluk ne’ebé iha hanoin hamutuk atu bele hadia mal nutrisaun ne’e”. dehan Diretór César José da Cruz, iha salaun MAPPF Comoro.
Nia hatutan, Atu reduz mal nutrisaun iha Timor-Leste ne’e iha fatór barak, primeiru haree mudansa klimatika, segundu tenke hasa’e produsaun, no mós haree ba irigasaun sira tenke di’ak tenke uza Sistema ne’ebé mak di’ak no ambiente tenki mós, infrastrutura bee tenke iha.
Iha fatin hanesan diretór Centru Nasional Logistik, (CLN), Jacinto Paijo hateten, Ai-han mundial ne’e hanesan programa mundial, tanba ne’e esperansa ema hotu nian maka hetan ai-han ne’ebé di’ak no nutritivu, maibe iha realidade seidauk iha ida-ida ho kbiit la hanesan.
Neduni governu nia servisu ba ema hotu no instituisaun, programa ida ne’e mós oinsa fó hanoin ba ema hotu kona-ba saida mak ita bele halo.
“hosi CLN nia programa mak sosa produtu lokál hodi asegura rezerva no stock hahan ba povu no nasaun. Neduni iha komemorasaun loron aihan mundial ne’e pelo menuz iha ne’e ita bele iha hanoin ruma para halo sensibilizasaun atu bele dezenvolve produtu lokál hotu ba konsumu nian hodi labele hein de’it fos”. Dehan Diretór CLN Jacinto Paijo
Tuir Diretór, Hahan hotu-hotu iha nutritivu hanesan batar, foremungu no produtu seluk ne’ebé sei iha, neduni ita-nia kna’ar atu bele promove nune’e ema hotu bele ona hatoman-an han batar, fehuk, foremungu la’os han de’it etu no ba merenda escolar sira mós presiza promove hahan produtu lokál nian. FN
