Likisa- Ministério Agrikultura Pecuaria Pescas e Floresta (MAPPF) liu hosi Dirasaun Nasionál de Planeamentu Espasial Do Mar, Capturação e Gestão dos Recursos Aquaticos hala’o seremonia estabelesementu programa tara bandu iha Area Protejida Marina Samba Sembilan ho komunidade sira objetivu atu bele kuida rekursu Tasi nian no tasi laran. Atividade ne’e hala’o iha loron Tersa (05/09) iha Suco Mota Ulun Posto Administrativu Bazartete.
Iha Entrevista Sekretario Estadu Peskas, Domingos da Conceição dos Santos hateten katak, atividade tara bandu ba area protejidas mariñas ninian iha area Samba sembilang, area ne’ebe maka normalmente atu proteje biodiversidade sira iha tasi laran no tasi ninin nune’e bele prezerva rekursu ikan sira, hodi bele fo rendimentu ne’ebe maka diak ba nia komunidade sira ne’ebe maka halo atividade Peska iha tasi ninin nomos tasi laran.
“Ida ne’e politiku do Governu atraves kontribuisaun husi ajensia internasionál sira, atividade ida ne’e atu bele jere ita nia area kosteira ne’e ho diak, laos atu kaer de’it ikan maibe mos oinsa atu hakiak mos ikan, hanesan mos budu tasi sira sai mos hanesan rikusoin ba ita nia komunidade sira, tanbe ne’e ita presiza halo dezenvolvimentu hodi bele fo retornu ba ita nia komunidade, nune’e dezenvolvimentu iha area ekonomia bele sae bebeik maske lao neneik.” Katak Domingos
Nia informa, atividade ne’e distribui mos Ró ho unidade 8 ba Peskadór sira, planu atu sosa ekipamentus hirak ne’e hahú kedas iha tinan 2021 mai to’o agora, iha tinan 2022 Ró refere atribui na balu ba peskador balun iha Dili no Ataúro no foin lalais ne’e atribui tan balu ba iha Munisipio Baucau no agora kontinua mai iha Likisa, portanto identifikasaun ba grupu sira ne’e antes tiha ona, proposta tama antes, normalmente parte tekniku sira halo maka halo levantamentu antes atu atribuisaun Ro hirak ne’e.
Iha fatin hanesan xefe Suuo Ulmera, Martinho Corea hatutan katak, agradese tebes ba Governo liu husi MAPPF bele destribui ona Ro ba Peskador sira hodi bele buka moris iha parte tasi ninian, tanba ne’e iha mos seremonia tarabandu ida atu komunidade sira bele kuidadu rekursu sira iha tasi ninin no mos tasi laran.
Nia mos husu ba peskador sira ne’ebe maka hetan ona Ro refere atu utiliza didiak sasan hirak ne’e atu bele sai hanesan nain rasik ba sasan hirak ne’e jere ho didiak hodi bele buka moris ida ne’ebe maka diak iha familia.
Nune’e mos Benefisiario Albino Gama Gonçalves hato’o nia sentido agradesemento wain ba Governo tanba bele apoiu ona Ro ne’e ba nia hodi bele buka moris, tanba iha tinan 2019 nia mos hetan tiha dezastre iha tasi laran hodi estragus hotu nia Ro hodi nia labele kontinua buka nia moris, masibe agora nia sente kontente tanba bele hetan ona apoiu husi Governo hodi bele kontinua buka nia moris iha area tasi nian. (Tyfa)
