Ermera-02-08-2023, Ministério Agrikultura Pecuaria Pescas e Floresta (MAPPF) liu husi projetu Coffe and Agrofloresty Livelinhood Improvement Projects (CALIP) hamutuk ho Embaixadór Japaun vizita sentru viveros Café ne’ebe maka implementa iha Suco Fatukeru no hare mos plantasaun café iha apido no lispat Munisipiu Ermera.
Project Manager CALIP, Lourenço Borges Fontes iha entrevista esplika katak, vizita ne’e atu hare atividade ne’ebe CALIP implementa ona iha terenu no mos atividade balun ne’ebe maka halo iha sentru produsaun ba plantas industriais maka hanesan café, Cenke, fehuk Midar, Ai-farina, Ai-nanas no seluk tan ne’ebe maka halo iha Suku Fatukeru, tanba ne’e maka ohin Embaixadór mai hare direta atividade ne’ebe maka halo ona, tanba atividade ne’e hetan apoiu orsamentu hosi sira.
“Vizita ne’e kontinua kedas ba Aldeia Apido hodi hare fatin ne’ebe maka atu estabelese centru peskiza ba café, ita mos esplika ba Embaixadór atu hare katak sasan ne’ebe maka ita implementa ne’e tuir duni saida maka ita hot-hotu hakarak. ita mos mai to’o iha grupu cafekultór sira, tanba implementasaun atividade hot-hotu ikus liu mai to’o grupu cafékultór sira hodi hare direita atividade ne’ebe maka sira implementa ne’e tuir duni saida maka ita planeia tiha ona. Nune’e Embaixadór mos sente kontente tebes ho ita nia atividade ne’ebe maka ita implementa ona, ba futuru sira mos sei fo apoiu nafatin ba atividade ne’ebe maka ita implementa ona.” Akresenta project Manager
Iha fatin hanesan, Embaxadór Japaun Tetsuya Kimura hateten katak, visita iha fatin implementasaun ba projeto CALIP katak, implementasaun ba projetu ne’e kapas no lao diak tebes, tamba implementa direta iha komunidade sira nia toos no hetan partisipasaun masimu husi komunidade sira, Nia mos iha esperansa bo’ot ba oin bele iha produsaun nebe as no diak. tanba husi produasan ne’ebe maka diak bele hasa’e rendimentu moris to’os no kafe nian. Tamba tuir mai sei iha diskusan ne’ebe klean hamutuk ho Banku Desenvolvimentu Aziatiku (ADB) hodi hare liu ba produsaun kafe iha merkado no kafe iha futuru.
Nune’e mos Diretór Nasional Café Plantas Industria, Donato Salsinha hateten, vizita husi Embaixadór Japaun no mos reprezentante husi ADB mai hare Desenvolvimentu projetu CALIP neébe hala’o iha Munisipiu lima (5) hanesan Ermera, Aileu, Ainaro, Likisa no mos Manufahi, tanba munisipio hirak ne’e maka sai potensial ba café, koordenasaun mos diak tebes ho cafékultór sira, tanba neé maka ita lori Embaixadór mai atu hare direita atividade neébe maka implementa ona.
Nia informa, Projetu ne’é realiza tanba hetan apoiu orsamentu husi Governo Japaun, nia objetivu atu apoiu ba ema kbiit laek sira, orsamentu neé husi banku asiatiku maka administra liu husi Ministerio Agrikultura Pecuaria Pescas e Floresta husi Diresaun Nasional Café Plantas Industriais hamutuk ho ita nia Projetu CALIP maka halao atividade sira neé. grupu ualu nulu (80) neé hatudu sira nia progresu servisu ne’ebe diak tebes. (Eby Magno)
