Manatuto- (11/05/2023),  komunidade husi Suco Umaboco entrega rai mamuk ektares rua ba Ministério Agríkultura e Pescas (MAP) atu bele hala’o atividade sira iha area agrikultura no hortikultura nian. Seremonia entrega rai ne’e hala’o iha Suku Umaboco Posto Administrativu Barique.

Ministru MAP, Pedros dos Reis hato’o agradese wain ba komunidade Natarbora tanba bele oferese ona rai ektares 2 ba MAP hodi aumenta tan espasu atu MAP bele halo servisu,  tanba Ministerio mos servisu hamutuk ho Diretór Munisipiu, Autoridade Munisipiu sira, hodi haree ba futuru saida mak atu implementa atu nune'e rai ne'e la bele husik mamuk de’it.

Iha fatin hanesan Xefe suku, Umaboco Feliciano Baptista iha esperansa katak ho rai ne'ebe maka sira entrega ba MAP ba futuru sei dezenvolve seitór Agrikultura liu-liu sei lao diak iha postu Administrativu Barique.

Nia mos husu ba MAP,  rai ne'ebe maka entrega ona la bele husik mamuk tenki halo ona atividade ruma,  nune’e komunidade agrikultór sira bele kontente.  

Nune'e mos Komunidade Uma Boco, Manuel da Costa informa katak, rai ne'ebe mak sira oferese ona ba MAP atu hadia ou halo moru protesaun nune'e komunidade Postu Barique sira bele utiliza rai ne'e hodi hala’o atividade  agrikultura sira ho diak. (Ebby)