Viqueque – (10 Maio 2023), Ministério Agrikultura e Peskas (MAP) liu Diresaun Jerál Agrikultura e Hortikultura hamutuk ho autoridade suku Afloikai  tun dereta hodi haré Natar ektares 20 iha Weleko neébe hetan estragus husi korente mota bebui, kauza husi udan boot ne'ebe akontese durante ne'e iha suku afaloikai postu administrativo Uatulari.

Diretora Jeral Agrikultura, Maria Odete do Ceu Guterres esplika, kada tinan mota weleko sempre fó ameasa ba komunidade sira- nia natar, Irigasaun no mos toos tanba la iha moru protesaun hodi satan mota ne'ebe ho volume boot.

“ Iha tinan kotuk ita halo protesaun ba irigasaun iha ne’e 300 metros maibe tanba udan boot sobu nafatin, Ba oin ita nafatin halo protesaun.Nuneé tekniku Irrigasaun sei mai halo levantentu dadus  hodi bele tau orsamentu ba ba ano fiskal tinan ida ne’e”.tenik Nia

Governu sempre iha komitmentu buka meios para atu bele proteje nafatin kanál irigasaun sira  liu-liu mota Weleko tanba  iha tempu udan sempre sobu bebeik komunidade sira nia natar  neduni tenki halo nafatin protesaun ba natar hirak ne’e.

Tuir informasaun katak, atu halo servisu hirak ne’e tekniku sira  tenki halo levantamentu dadus, halo dezeñu no  BOQ hodi apresenta fali ba governu atu bele tau ba iha proximu ano fiskal  nune'e bele halo nafatin protesaun ba ita -nia mota ida ne'e.

Iha fatin hanesan Xefe suku Afloikai Constantino Guterres hateten, sente preokupa ho korente mota ne'ebe boot iha tempo udan hodi fo ameasa ba komunidade agrikultor sira-nia natar no toos, husu ba Ministerio Agrikultuara e Peskas buka solusaun ba preokupasaun ne'e nune'e bele salva agrikultor sira nia natar.

Nia haktuir  katak iha tinan ida ne'e konsege rezolve duni bareira 300 metros maibe la sufisente, sei nafatin afeta ba iha komunidade agrikultór sira-nia natar, neduni presiza tau atensaun nafatin tanba Natar ne'ebe mak boot tebes iha Viqeuqeu. Eby