Dili-Ministériu Agríkultura e Pescas (MAP) liu husi Diresaun Nasional da Irigasaun e Jestaun Bee hamutuk ho Ajensia JICA halao Workshop kona-ba jestaun partisipatoriu irigasaun durante loron 3 hahu husi loron Tersa, 25/4 - 27/4 2023 iha Salaun MAP, Comoro - Dili.
Iha entrevista Diretór Nasional Irigasaun e Jestaun Bee Martinho Laurentinho Soares esplika katak, Workshop ida ne’e relasaun ho Projetu ida ne’ebe hetan apoiu husi Ajensia JICA servisu hamutuk ho Ministeriu Agrikultura hodi hadia Sistema irigasaun atu hasa’e produsaun no produtividade hare iha irigasaun rua mak hanesan Irigasaun Maliana 1 Munisipiu Bobonaru no Irigasaun Bulutu iha Manatutu ne’ebe fornese mos bee ba area Baucau.
Antes ne’e Governu Japaun apoio osan ba hadia irigasaun maibe depois sira hare produsaun no produtividade ladun di’ak nune’e sira mai fali liu husi Ajensia JICA kria fali projetu ida ho naran Fos Rai hodi hadia fali envolvimentu agrikultor sira, hadia jestaun bee irigasaun, jere bee ho di’ak atu agrikultores sira labele hadau malu no labele istori malu tanba bee, melora kultivasaun hare no oinsa produsaun hare husi agrikultor bele asesu ba merkadu, oinsa atu fahe produtu ba fatin hotu-hotu ne’ebe presiza no oinsa envolve mos parte governu ne’ebe atu sosa produtu hare.
Nia informa, Projetu ne’e fofoun planu ba tinan 5 husi 2016 - 2021 maibe estende tan ba tinan 2, Tinan ne’e hotu ona kompleta tinan 7 fulan 3, Tanba ne’e JICA halo planu hodi konvida fali munisipiu haat seluk ne’ebe laiha relasaun ho projetu hanesan Covalima, Manufahi, Viqueque, Lautem inklui Rejiaun autónum Oe-Cusse RAEOA nia reprejentatante mai hamutuk iha fatin ida ne’e hodi fahe esperensia no koñesementu kona ba atividade sira ne’ebe implementa ona iha skema irigasaun Bulutu no irigasaun Maliana 1 ne’e.
Ita hakarak ba oin maske projetu JICA ne’e hotu ona, munisipiu seluk bele mos aprende husi saida maka ema Jepaun sira mai hanorin hela ita hodi hadia agrikultor sira nia produsaun no bele faan sira nia produtu ba merkadu.
Nia hatutan, Antes implementa programa ne’e produsaun hare hetan 1-2 tonelada /hektare maibe depois de implementa programa ne’e iha irigasaun Bulutu ho irigasaun maliana 1 produtividade sa’e to’o 6 tonelada/hektare no iha fatin balu bele hakbesik ba 8 - 10 tonelada/hektare.
Ba oin karik bele ita mos bele konvida munisipiu seluk bele mai aprende iha fatin rua ne’ebe sira nia jestaun la’o di’ak ne’e.
Iha Fatin hanesan Expert Jestaun Partisipatoriu Irigasaun JICA, Kazufumi Taira esplika katak, Objetivu workshop ne’e atu fahe fila fali esperensia no koñesementu kona ba atividade sira ne’ebe implementa iha skema irigasaun Bulutu no irigasaun Maliana 1 ne’ebe ami introdus jestaun partisipatoriu irigasaun atu ajuda agrikultor sira liu husi asosiasaun utilizador bee atu oinsa maka bele halo jestaun ne’ebe di’ak ba irigasaun hodi nune’e bele fahe bee hanesan entre agrikultor sira, nune’e ami konvida ofisial irigasaun munisipiu lima mai hamutuk iha workshop ne’e.
Nia akresenta, depois de rehabilitasaun fasilidade irigasaun husi JICA skema irigasaun maliana 1 no bulutu ne’e kompletu no di’ak, maibe iha tinan balu nia laran fasilidade sira ne’e komesa estragus, jestaun distribuisaun bee entre agrikultor sira ladun la’o ho di’ak, mosu desputa bee entre agrikultor sira no asosiasaun utilizador bee la funsiona ho di’ak, nune’e liu husi implemeta projetu ida ne’e ita hadia fila fali, halo fali ativasaun asosiasaun hodi bele halo jestaun no manutensaun di’ak ba fasilidade irigasaun nomos jestaun distribusaun bee ne’ebe di’ak nune’e ajuda agrikultor sira hasa’e produsaun.//(RAC)
