Ainaro- Ministério Agrikultura e Pescas (MAP) Liu Hosi Diresaun Nasionál Peskiza Estatistica (DNPE) servisu hamutuk ho Ajensia Agricultural Innovations For Communities (AI-COM) no Programa Hasa’e Produtividade Agríkultura Sustentavel (HAPAS) hamutuk ho Peskizador sira iha Estasaun Peskiza Ululefa-Maubisse ho agrikulór sira hala’o teste ba variedade koto no koko sabor husi koto ne’ebe maka durante ne’e peskizador sira halo peskiza ba. Atividade ne’e hala’o iha loron Kuarta-feira (15/02/23) iha Estasaun Peskiza Ululefa-Maubisse.
Iha intervista Diretór DNPE Deolindo de Oliveira Esplika Katak, objetivu ba atividade ne’e atu lansa mos fini koto ne’ebe maka ita nia peskizador sira hahu halo tiha ona iha tinan lima nia laran, hahu husi varideda koto ne’en nulu resin neen (66) iha peskiza ne’e ita konsege hetan koto ho variedade oin 4 ne’ebe maka sai hanesan primadona, rezultadu peskiza ne’e sai momentu diak ida atu ita fo sai ba iha komunidade sira liu-liu ba iha Agrikultór sira maibe tenke liu hosi Diresaun Nasional Agrikultura maka sei habarak no fo sai fali koto ne’e nune’e bele lansa ona ba iha komunidade.
Nia hatutan, husi diresaun Peskiza iha tempu badak bele lansa, maibe antes halo lansamentu presiza tau mos koto nia naran ba koto hirak ne’e, naran ne’e orzinalidade mai husi Maubisse antes atu lansa ita sei konsulta ho autoridade Lokal no komunidade sira atu hatene koto hirak ne’e atu tau naran oinsa? maibe la bele tau ema nia naran tau rai nia naran ou rai lulik uma lulik nia naran ne’ebe maka konñesidu iha Munisipio Ainaro.
“Ohin loron (red) kuarta feira, ita ho agrikultór sira mai iha ne'e hodi koko sabór no iha indentifikasaun agrikultór quaze sanulu resin maka deside katak, koto variedade ha’at (4)ne’e nia sabór diak tebes, agrikultór sira maka deside no rekomenda agora ita presiza lansa no presiza tau mos naran ba koto hirak ne’e. ita hahu prosesu ne’e kleur ona koto husi variedade ne’en nulu resin ne’en (66) no halo selesaun mai iha tolu nolu (30) to’o ikus mai hela hitu, husi total koto varieda hitu maka ita anula tolu no hat maka sai koto ne’ebe maka diak atu bele lansa iha tenpu besik.. ” Tenik Deolindo
Iha fatin hanesan Peskizador Responsavel Estasaun Ululefa Maubisse Armindo Moises hatutan katak, nia partisipa iha atividade Field Day (Loron Agrikultór) ne’e, atu han ou koko sabor aihan koto ne’ebe maka durante ne’e peskizador sira halo, ai-horis sira ne’e peskizador lori mai husi fatin barak, halo ona peskiza no hetan ona nia rezultadu ita mos tenki han ou koko atu aban bain rua ita lansa bele hetan satisfasaun husi ita nia Agrikultór sira.
“Tanba ne’e, Ai-horis Varidade hitu maka ita koko nia sabor husi númeru hitu (7) ne’ebe maka ita koko ou halo teste ne’e Agrikultór sira prefere liu varidade linas foun ida introdus mai husi Nasaun Olanda ne’ebe maka ho ninia kode teste label C05 ida ne’e maka Agrikultór sira prefere liu tuir fali maka ita nia koto local Atsabe depois ho linas ida ne’ebe maka mai husi Nasaun India. Katak nia
Nia mos husu ba MAP atu esforsu hodi bele halo ona lansamentu ba variedade koto ne’ebe maka peskizador sira halo ona peskiza no teste, wainhira ita halo ona lansamentu maka legalmente sai ona ita nia varidade superior Timor-Leste nian, nune’e bele distribui ba Agricultór sira hodi bele kuda iha sira nia to’os hodi bele hasa’e produsaun husi sira nia toos nomós bele alkansa objetivu jeral hasae seguransa ai-han Nasional iha Timor Leste.
Nune’e mos Agrikulór Manuel Da costa hatete katak, nia sente orgullu tebes tanba to’os nain sira mai halo selebrasaun Field Day (loron Agrikultór) ba koto nian, husi nia hakarak fo agradese tebes tanba bele selebra loron ne’e ho ekipa Nasionál sira.
“Liu husi atividade ne’e peskizador sira hotu esplika mai ami atu rekomenda ba koto ida ne’e, husi hau pesoal atu rekomenda ba Governu bele lansa ona Varidade sira ne’e ba ona komunidade tanba ohin hau rona esplikasaun husi peskizador katak varidade sira ne’e mai husi estranjeiru iha ne’en nulu resin ne’en (66) maibe halo seleksaun hetan ona nia rezultadu ha’at (4) ida ne’e mak rekomenda ba MAP atu bele halo ona lansamentu atu komunidade sira bele kuda ona.” Nia realsa
Atividade peskiza teste koko sabor ai-han koto ne’e partisipa husi Diretór DNPE, Secretario Administrador Posto Maubisse, Staff sira husi DNEP no hetan partisipasaun masimu husi komunidade sira. (Rezer Lopes)
