Dili- Food and Agriculture Organization (FAO) servisu hamutuk ho USAID no Ministério Agríkultura e Pescas (MAP) halo lansamentu ba projetu transforma Sistema Ai-han hodi hadia seguransa Ai-han no rezilénsia ba krize sira iha Timor Leste. serímonia ne’e ofisialmente lansa husi Prezidente da Repúblika José Ramos Horta iha loron Tersa (31/01/22) iha Salaun City8 Manleuna.
Projetu refere hetan apoiu orsamentu husi USAID no implementa liu husi kolaborasaun entre Organizasaun Nasões Unidas ba alimentasaun agríkultura (FAO) no MAP, projeitu ne’e rasik sei hahú iha fulan Outobru tinan 2022 to’o fulan Setembro 2024, perkore ba Municipio sira mak hanesan:Aileu, Ainaro, Baucau, Bobonaro, Covalima, Ermera, Manatutu, Manufahi, Laútem no Viqueque.
Prezidente da Republika Jose Ramos Horta ne’ebé mak partisipa iha atividade lansamentu ne’e, hato’o mos nia agradese wain ba Administrasaun Americana liu husi USAID ne’ebé mak sempre kontinua fo apoiu mai Timor-Leste iha prosesu dezenvolvimentu ba tinan ruanulu nia laran, programa ida ne’e sei ezekuta diak no bele iha impaktu ba seguransa Alimentar liu liu ba povu iha zona rural.
Nia mos salienta, tinan rua nulu nia laran ona, la iha governu ida maka tau Agríkultura no seguransa aihan hanesan prioridade ba numeru dahuluk, ita labele iha nasaun forte se ita la iha 100% ba seguransa aihan, ita la iha Nasaun forte ida se ita la iha totalmente 100% soberanu iha Agrikultura be’e mos no mos nutrisaun.
hau mos husu ba parseiru Internasional sira favor hotu hotu konsentra ba iha setór Agrikultura, be’e mos no saneamnetu lalika lakon tempu ho buat seluk, konsentra lai ba iha dezenvolvimentu rural. Dehan Ramos Horta
Iha fatin hanesan Reprezenta Ministru MAP Elidio de Araújo Em hateten iha nia diskursu katak, MAP agradese tebes tamba bele asiste tan lansamentu projetu ida ho naran “Transforma Sistema Agro-Ai-Han iha Timor-Leste Hodi Hadiak Seguransa Ai-Han no Reziliensia Hasoru Krize” ne’ebé ajuda husi Governu Amerikanu ba iha area Agricutura nian ne’ebé sei implementa husi organizasaun ba alimentasaun no Agricultura (FAO) Timor-Leste ho Ministerio da Agricultura e Pescas.
Nia hatutan, Seguransa ai-han nu’udar prioridade a’as liu iha politika MAP nian hodi garantia ema hotu iha asesu ba nesesidade baziku ida nee. Hare ba dadus ne’ebé hasai husi membru KONSSANTIL ho FAO Timor-Leste katak sei iha mais ou menus 36% husi total populasaun ne’ebé hasoru Inseguransa Ai-Han Krónika iha teritóriu Timor laran tomak, maka figura ida neé tenke iha ona ita nia atensaun ba iha prioridade programa governo nian. MAP iha ona esforsu oin-oin hodi bele eradika numero ho prosetanjem boot ida ne.
Nia akresenta, Governu Amerikanu, USAID no koperasaun ho agensia sira seluk ajuda no implementa ona politika MAP liu husi ninia projetu sira maka hanesan hasaé produsaun no kualidade kafé, dezenvolve area hortikultura liu-liu projetu DAC (Dezemvolvimentu Agricultura Komunitaria ), Avansa Agrikultura, OSRO iha area konservasaun Agrikultura no sira seluk. Agrikultór sira sente duni benefisiu husi projeitu sira neé tamba tulun no hasae duni sira rendimentu familia nian. Espera ajuda sira neé sei kontinua hodi tulun toós nain sira nebe kbit laiha.
Nune’e mos reprezentante USAID Gillian Caldwell hateten katak, Lansamentu ne’e foka liu ba iha seguransa alimentar iha Timor, atu nune projeitu ida ne’e sei foka liu ba iha nutrisaun inan nian no nutrisaun oan nian liu-liu ida ne’ebe maka nia impaktu bo’ot ba iha Dezenvolvimentu wainhira sira sai adulto, durante tinan ruanulu nia laran servisu hamutuk ho Governo Timor hodi hare ba iha asunto oioin liu-liu foka liu ba iha seguransa aihan.
Nia dehan, Projeitu ida ne’e mos laos haree de’it ba iha produsaun de alimentar I aprosimasaun ne’ebe maka iha hare mos ba iha mudansa klimatika ne’ebe maka akontese ohin loron, mudansa klimatika sira ne’e maka hanesan karbodiosidu, iha aprosimasaun ne’ebe maka uza mos sei aprosimasaun ne’ebe maka sei responde mos mudansa klimatika ne’ebe akontese, tanba mudansa klimatika ninia efeitu mos ba iha ita nia rai. Sira sente kontente tebes ho koperasaun servisu ida ne’e, projeitu ne’e total orsamentu ne’ebe maka apoiu husi Governu Estadus Unidos da América hamutuk milliaun ha’at, e estadus Unidos da Amérika investe ona liu milliaun tolu resin ba atividade iha Timor Leste. (Tyfa)
