Baucau-Ministério Agríkultura e Pescas (MAP) liu hosi Dirasaun Jeral Agríkultura kolleita hare iha demo-area hamutuk 120 hektares ne’ebe maka utiliza adubus organiku (POC Nasa, Super Nasa no Hormonik) ba Segundo epoka nian. Atividade ne’e hala’o (29/12/22) iha irigasaun Sobabere, Suco Caibada, Posto Administrativu Baucau Vila.
Iha entrevista Diretora Jeral Agríkultura Maria Odete do Céu Guterres esplika katak objetivu husi kolleta hare iha irigasaun Sobabere ne’e ho nia area pontensialidade 520 hektares maibe ohin halo kolleta ba iha 240 hektares ba segundu epoka ninia
“Ita hatene katak irigasaun Sobabere iha problema uituan, hau rasik ho senhor Vice lao to’o iha mota ulun ne’eba kuaze kilometru 2 ami hare katak husi ita nia operadores irigasaun ninia konsege halo normalizasaun no konsege hatama be’e ba iha ne’e. Hanesan ita hatene katak area ida ne’e tinan hira nia laran ita la utiliza tanba ita iha problema irigasaun no depois hadia tiha irigasaun normaliza fali be’e bele tama ona ba natar ne’e nune’e ohin loron ita bele halo kolleta ba iha segundu epoka ninian". Haktuir DJ Odete
Agora ita halo hela esforsu atu responde ita nia ezizensia ita hatene katak ho ita nia populasaun 1.3 miloens ita nia konsumu Nasionál ne’e 130 mil toneladas fos, tinan ida ne’e ita atinji 85 mil toneladas fos ita presiza importa tan 60 mil toneladas. maibe se ita halo esforsu, iha kontribusaun diak husi ita nia agrikultór sira, tinan-tinan governu halo nia estratezia, halo nia politika para hasae produsaun maibe laiha partisipasaun agrikultór sira mos ita labele halo buat barak, tanba ne’e maka iha servisu entreligadu iha servisu parte irigasaun, parte servisu produsaun alimentar no mos parte importante maka parte estensaun ninian
Tanba ne’e maka Governu halo nafatin esforsu oinsa maka ita bele hasae ita nia produsaun liu husi ezemplu ita aplika POC NAsa iha fatin hotu-hotu, iha kanal irigasaun 9, tinan ida ne’e ita hakarak to’o kanal irigasaun bot 12 iha teritoriu tomak atu nune’e tinan-tinan se ita aumenta 40 hektares, ita mos bele garante ona katak tinan ida ita nia produsaun ba konsumu nasional to’o, ida ne’e maka ita nia mehi ita atu atinzi
Iha fatin hanesan Reprezentante Prezidente Autoridade Munisipio Baucau Agostinho Gueterres hateten katak, hodi naran autoridade Baucau nian apresia tebes ba Servisu Ministeriu Agricultura e Pescas nian liu-liu Dirasaun servisu agricultura ho ita nia komunidade liliu ho ita nia autoridade lokal, Grupu agricultura sira ne’ebe maka iha inisiativa diak atu hasae ita nia produsaun hare iha munisipiu Baucau Espesialmente iha irigasaun sobabere
”Atividade ba segundu epoka ne’e lao tanba apoiu husi ita nia autoridade lokal sira liliu husi Dirasaun Agrikultura MAP nian ne’ebe apoio material sira hanesan eksa permanente iha ne’e para fo apoio ba ita nia grupu agrikultór sira ne’e maka segundu epoka ne’e bele lao tanba ne’e em nome autoridade apresia tebes no hato’o natafatin ba MAP atu fo apoio nafatin tanba area ida area ida potensial tebes”
Nune’e mos Xefe do Grupu Mandiri Nazario Maria Tavares, akresenta katak, maske atividade ida ne’e ministru la marka prezensa maibe DJ marka ona prezensa sira sente orgulhu tebes. Difikuldade bot ba sira maka irigasaun tanba kotu dala 3 to’o ikus iha fulan Junhu maka be’e tama. Sira mos husu atu hadia irigasaun no dalan ba irigasaun ne’e tenke ateru halo diak hotu, Tanba povo laos hakarak tane liman deit maibe buat sira ne’ebe maka governu fo ne’e fasilita los ba sira nia nesesidade. (Rommy)
