Dili-Ministério Agríkultura e peskas (MAP) liu husi Dirasaun Jeral Floresta Café e Plantas Industriais asina akordu ho Asosiasaun Café Timor (ACT) hodi hare oinsa atu rehabilitasaun ba café iha Timor Leste, atividade ne’e hala’o iha loron Sexta (09/09/22) iha Salaun MAP Comoro.
Tuir Ministro MAP Pedro dos Reis esplika katak, objetivu husi asina akordu ida ne’e atu kontinua de’it ba ita nia orsamentu ratifikativu balun ne’ebe husi Consellu Ministru aprova ona iha Parlamentu Nasionál (PN) MAP kontinua aselera nia servisu. Orientasaun klaru katak tenki servisu hamutuk ho ita nia parseru sira liga ba iha rehabilitasaun Café tanba ne’e maka ohin liu husi prosesu naruk asina ona akordu ho ACT hodi halo akompanhamentu rehabilitasaun ba Café ne’ebe maka sei halo iha tempu badak.
Orsamentu ne’ebe maka MAP aloka ba iha ACT hamutuk 129 mill, ne’e ba iha akompanhamento, tanba Assosiasaun hotu hotu ne’e iha ACT nia okos, rehabilitasaun ne’e sei halo iha munsipio hitu (7) hanesan; Aileu, Ainaro, Bobonaro, Ermera, Liquiça Manatuto no Manufahi. Ita esforca molok to fulan Dezembro tenki rehabilita hotu ona, se karik la biban ita mos sei bele estende tan. Akordu ne’e ami asina ami mos sei halo lansamentu ba iha Bazartete Munispio Liquiça.
Iha fatin hanesan Prezidente ACT Evanjelinho Monteiro, hateten katak, ida ne’e hanesan oportunidade ida ba Asosisaun atu bele kopera hamutuk ho MAP atu servisu ba iha setór Café iha Munisipio sira ne’ebe maka Ministru mensiona ona.
Hanesan Assosiasaun Industria Café sira hotu ne’ebe maka hamahon a’an iha Assosiasaun Café Timor nia okos, depois membru ida-idak maka sei organiza nia grupu ne’ebe maka organizadu hodi oinsa atu bele implementa rehabilitasaun café ne’e ho diak.
Orsamentu ratifikativu Estadu Timor Leste liu husi oitavu Governo Primeiro Ministro autoriza ba setór Café ba rehabilitasaun Café ninian sufisiente no bo’ot, no ami espera katak ami sei halo atividade ida ne’ebe maka diak hodi responde ba orsamentu hirak ne’e.
Entretantu Orsamento transferensia Públiku ne’ebe aprovado ona iha orsamento ratifikativu ho objetivu atu aumenta produsaun annual Café no aumenta rendimentu ba agrikultores hamutuk USD 2,882,670 orsamentu ne’e fahe ba atividades tolu (3) maka hanesan tuir mai ne’e:
- Akompañamentu husi tekniku ACT $ 129,870 ($ 17.55/ha)
- Insentivu ba membru grupu kafeíkultores (rehabilitasaun/espansaun café) $ 2,516,000 ($ 340/ha). Orsamentu ne’e tenke 100% to’o iha benefisiariu/kafeíkultor nia liman.
- Operador tesi café $ 236, 800 ($ 32/ha).
Objetivu husi akordu ne’e atu estabelese servisu kooperasaun entre MAP ho ACT hodi implementa planu utulizasaun orsamentu ratifikativu, espesialmente atu halo rehabilitasaun ba plantasaun café tuan no espansaun café ba area ne’ebe iha ona mahon café ho sentidu atu aumenta produsaun annual café no aumenta rendimentu ba agrkultores iha area plantasaun tuan no espansaun café 7,400 ha iha Munisipio hitu (7) maka hanesan: Aileu 900 ha, Ainaro 900 ha, Bobonaro 200 ha, Ermera 2,800 ha, Liquiça 1200 ha, Manatuto 200 ha no Manufahi 1200 ha. Área plantasaun café tuan 7,400 ha sei hetan hotu rehabilitasaun ou espansaun café. (Tyfa)
VISITA IHA KANAL YOUTUBE (MAP-NEWS)
https://www.youtube.com/watch?v=FbVCHvwTp3Y&t=6s
