Notisia

DGFCPI SEI REKRUTA CORPU GUARDA FLORESTA HAMUTUK 180 PESSOAS

Fotografia/Elsio Jong/INFO-MAP
Ministériu Agríkultura No Peskas, Liu Hosi Diresaun Jerál Floresta Café E Plantas Industriais (DGFCPI) MAP, sei rekruta Corpu Guarda Floresta hamutuk 180 iha tinan ida maibé kandidatu ne’ebé mak konkore iha vaga ne’e hamutuk 1.229 pessoas no hala’o hela izame eskrita iha loron tersa-feira (22/3/22) iha Estadium Municipal Dili.
 
 
Iha Oportunidade ne’e, Diretór jerál café e Plantas Industrias, hanesan mós presidente komisaun Raimundo Mau, hateten, ezame eskrita ba kandidatu sira ne’ebé mak priense ona rekejitu ba selesaun dokumentu ba vaga Guarda Floresta no mós Jestór area Protegidas ne’ebé MAP fo sai antes ona.
 
Raimundo hatutan, Corpu Guarda Floresta sira agora rekruta ne’ e, Ministériu nia estratejia atu prepara sira ho kna’ar oin rua, kna’ar protesaun no kna’ar estensaun, kna’ar estensaun ne’e atu sai mós hanesan ema ne’ebé mak iha suku nia leet no sai mós fasilitadór ba iha sidadaun sira seluk nune’e muda sidadaun nia hanoin, atu labele estraga ai-laran no oinsa bele uza ai-laran ho maneira sustentavel nune’e ema hot-hotu bele hola parte iha kna’ar protesaun florestal.
 
“Rekruta hotu, sei Lansa ho programa kapasitasaun nune’e sira bele iha koiñesementu baziku ba sira nia kna’ar atu halo saida maka prioridade dahuluk ne’ebé sei halo, nune’e mós sei kompleta sira ho uniforma no ekipamentu baziku seluk, ne’ebé mak sira tenki utiliza, alende ne’e mós governu sei preve orsamentu atu bele iha treinamentu iha rai laran ne’ebé mak sei envolve entidade hanesan, Polisia Nasionál Timor-Leste (PNTL),atu nune’e fo preparasaun ne’ebé maka di’ak ba guarda floresta foun sira ne’ebé maka rekruta”. Tenik Raimundo
 
Tanba, area Floresta luan hira ne’e presija ema to rihun ida atus hitu resin, nune’e ema ida bele haree de’it hosi atus lima to ektare rihun ida. Maibé area floresta ne’e ektares rihun atus ualu limanulu, ida ne’e presija ema ne’ebé barak, maibé orsamentu lato’o. Neduni tau hamutuk sira uluk rekruta ona iha tinan 2021 ne’e foin iha 150 no agora aumenta tan 180 ne’e pelumenus ema ida bele haree liu hosi suku ida.
 Fotografia/Elsio Jong/INFO-MAP
“Alvu ba tinan 2025 ita nia hakarak guarda floresta ida iha suku ida, maibé agora sei selesaun ba area prioridade sira, tanba rekursu sira ne’ebé eziste iha ne’ebá atu hetan uluk kolokasaun ba kandidatu sira ne’ebé mak susesu iha prosesu ida ne’e no konsidera mós guarda floresta ne’ebé tinan kotuk rekruta ona no okupa ona suku balu ida ne’ebé pasa sei la koloka tan ba fatin ne’ebé hanesan”. tenik Presidente komisaun Raimundo
 
Raimundo hatutan liu tan, dadaun ne’e guarda floresta ida haree Postu Administrativu ida ne’e luan tebes, tanba ne’e maka ita lakonsege atu supervizona ho di’ak,area-area Floresta sira, nune’e susar atu kontrola asaun kontra bandu sira hanesan tesi Illegal no mós sunu rai tanba ema maka lato’o.
 
Total kandidatu ne’ebé tuir exame eskrita ne’e hamutuk rihun ida atus rua, rua nulu resin sia (1229) no Jestór ba area protegija sanulu resin haat (14), ne’e mai hosi Munisípiu sanulu resin rua inklui Atauro no Oecusse. Hosi totál kandidatu ne’e kompostu hosi mane 900 no feto 300 liu.
 
Nune’e Resultadu final sei aprova tuir kbi’it orsamentu tinan 2022 nian ne’ebé aprovadu ba guarda floresta atus ida ualu nulu (180) no ba Jestór area protegija nain haat (4), ba kandidatu ne’ebé pasa iha prosesu hotu sei okupa suku atus rua tolu nulu (230).

Rua : Av. Nicolao Lobato Comoro
Dili ,Timor-Leste

Kontaktu ami : 

Telp: +670 330 3333
E-mail: Este endereço de email está sendo protegido de spambots. Você precisa do JavaScript ativado para vê-lo.
Website: http://maf.gov.tl

Parseiru ho

© 2017 Ministeriu Agrikultura no Peskas. All Rights Reserved. Designed by IT MAP

Search

Login