«

»

May 02

Hasae produsaun Batar liu husi Prosesu Melhoramentu (Komunikadu Imprensa )

Atu hetan variedade batar nebe ho kualidade diak presija halo melhoramentu. Tamba ne’e Ministério de Agricultura e Pescas liu husi Direcção Nacional de Agricultura e Horticultura ho Direcção Nacional Pesquiza e Servicos Especializados halo ona melhoramentu ba batar. Desenvolvimentu linhas foun hirak ne’e tuir klima Timor nian ho ninia objective maka atu hamosu/hetan variedade foun hodi sai hanesan variedade batar laos hibrida no hibrida tuir preferensias ema barak nian.
Batar nebe uja ba halo melhormentu mai husi koleksaun lokais hamutuk 150 nebe reprezenta zonas ekologikas Timor Leste nian ho germaplasma exotikas husi regiaun tropikais hanesan Instituto Internasional ba Agricultura Tropikais (IITA) Ibadan/Kenya, Thailandia, Indonesia, Cambodia, Vietnam, Guatemala, nomos regiaun temperadas hanesan Korea do Sul, China no Magolia.
Director Nacional Agricultura e Hoticultura, Eng. Gil Rangel da Cruz hateten, “Politika Ministério de Agricultura e Pescas (MAP) maka atu asegura siguransa aihan, tamba ne’e presija hare kestaun produsaun no produktividade aihoris prinsipal hanesan hare, batar fore, aifarina, fehuk, modo no seluk-seluk tan. MAP introdus ba agricultor sira teknologia foun inklui utilizasaun fini ho kualidade diak no produsaun as. Ba hare ho batar, MAP nia targetu mak 25% agricultor sira tenki utiliza fini diak no to’o tinan 2015 mais ou menos bele atinji 50%. Kapasidade MAP nian foin mak fornece fini diak aserkade 6% husi targetu 25%. Iha tinan 2004. MAP esforsu no servisu hamutuk ho Agencia Pesquisa Batar nian hanesan International Corn Fundation (ICF) husi Koreia do Sul no halo ona pesquisa ba batar ho naran development of locally adapted corn in East Timor”.
Técnico Ministério de Agricultura e Pescas halao ona melhoramentu ba batar hahu iha tinan 2004 no iha tinan 2007 desenvolve ona variedade foun ho naran BATAR NAI – ho liafuan tetum. Variedade BATAR NAI ne’e desenvolve husi kruzeiro variedade Arjuna husi Indonesia no Suwan 5 husi Thailandia. Ministério de Agricultura e Pescas produz nafatin batar NAI no distribui ona ba Agricultor sira iha teritoriu Timor Leste hahu iha tinan 2007. Variedade NAI nebe desenvolve husi Timor Leste agora dau – daun hetan desenvolvimentu makas iha Provincia Ace – Indonesia.
Técnico melhoramentu ba batar husi Ministério de Agricultura e Pescas nian, Eng. Claudino Ninas Nabais, Ph.D. hateten: “Siklus primeiru BATAR NAI ba udan ben makas hetan ona melhoramentu husi metudu seleksaun masal (mass selection) iha tinan 2010-2011. Seleksaun masal ne’e uja bazeia ba seleksaun presaun (pressure selection) husi individu, konsege halo kombinasaun genetika husi linhas lokais no exotikas hamutuk besik rihun tolu iha Centro Pesquisa Loes-Distrito Liquisa iha tinan 2011. Sr. Claudino realsa tan katak: iha tinan 2011 ne’e melhoramentu ba batar alende halo iha Centro Pesquisa Loes hanesan reprezenta ba rai tetuk nian, halo mos iha Distrito Aileu nebe reprezenta ba rai as ka foho nian”.
Tinan 2011 ba epoka permeiru, técnico Ministério de Agricultura e Pescas halo kontinuasaun ba melhoramentu batar iha Centro Pesquisa Loes no konsege kruza 1600 linhas foun nebe hetan kolheita iha Fulan Marsu 2011. Epoka segundu hahu halo Iha Fulan Julho 2011 ho luan area 0,5 hektares hodi kuda fali linhas 1600 no halo kolheita iha loron 30 de Setembro 2011.
Iha epoka segundu, Ministério de Agricultura e Pescas hakarak fahe esperensia técnico konaba prosesu melhoramentu batar ba estudantes Universidade Nacional Timor Loro Sa’e (UNTL), Departemento Agronomia, hamutuk 120 estudantes. Ida ne’e ho esperansa katak, bele aumenta konhesimentu estudante sira nian laos deit husi teoria maibe presija mos iha pratika. Tamba ne’e UNTL hakarak servisu hamutuk ho MAP hodi fahe esperensia ba malu, liu-liu iha areia pesquisa nian.
‘Informasaun audisional bele kontaktu: Domingos Mendes Feliciano, Tel; 7828025’