«

Nov 22

MAP Lansa Fos Lokal Ba Segundu Epoka

Ministériu Agrikultura e Peskas (MAP) hala’o parseiru Dezenvovimentu ho JICA ne’ebe maka durante ne’e ajuda mos ita nia Agrikultura sira liu-liu iha Munisipio Bobonaro hodi halo produsaun konaba fos lokal.

Relasiona ho atividades ne’e Ministro Agrikultura e Peskas (MAP) Estanislau Aleixo da Silva hala’o tan lansamentu ba segundu epoka nian ne’ebe maka produs husi Centru Atendementu Agrikola Kuda-Ulun Bobonaro (CAAKUB). Lansamentu ne’e hala’o iha loron Sexta (17/11) iha Resinto MAP Comoro Dili.

Tuir Ministro Agrikultura e Peskas (MAP) Estanislau Aleixo da Silva hateten katak iha nia parte nia sente kontente tebes wainhira hare atividades sira ne’ebe maka ita nia Agrikultura sira halo, klaru ke’e servisu barak maka ita nia Agrikultura sira presiza hala’o, no ita hotu-hotu mos tenki fo liman ba malu atu nune’e ho Apoiu ne’ebe maka Governo fo bele utiliza halo didiak.

“Hau ohin kontenti tebes wainhira hau hare Centru de servisu Agrikola ne’ebe maka hahu hari’i iha primeiru Governo depois iha tempu balu ne’ebe maka sira paradu tiha, e depoia iha tinan 2015 ami loke fila fali no ohin loron mos sira halo atividades barak tebes iha Maliana Munisipiu Bobonaro. Sira maka sosa hare prosesa fa’an no fo apoiu diak mos ba Agrikultura sira. Ida ne’e hatudu katak wainhira ita hakarak no ita fiar ita nia a’an ita mos bele halo buat diak ba ita nia rai.” Tenik Estanislau

Nia sublinha, Agrikultura ne’e importante tebes tanba ita nia populasaun barak maka depende ba Agrikultura, ita nia populasaun besik 70% sei depende direita ou indereita ba Agrikultura, hanesan sira ne’ebe maka moris iha Sidade ne’e klaru katak iha mos sira nia servisu hanesan Funsionariu ou servisu seluk tan. Maibe ba sira ne’ebe maka iha kampo ou terenu ne’e dependente duni ba vida Agrikultura.

Estanislau hateten, MAP sei serbisu makas liu tan iha tinan lima oin mai, oinsa Maka atu hare ba apoiu iha agrikultura sira liu-liu atu bele aumenta produsaun Alimentar iha ita nia rai laran, laos ne’e de’it maibe hare mos konaba diversifika konaba produsan ai han iha ita nia rai laran.

Entretantu Chefe Reprezentativu JICA MASAFUMI NAGAISHI hateten katak, Programa ou projeitu ida ne’e atu promove ita nia fos lokal iha Timor. Tanba liu husi ekipa de projeitu JICA servisu hamutuk ho Ministériu Agrikultura e Peskas suporta ita nia Associasaun Agrikultura sira liu hanesan iha Maliana (CAAKUB) sira hahu atu promove ita nia fos lokal tanba Timor oan barak maka gosta konsumu ita nia fos tanba sira dehan ita nia fos lokal ne’e iha nutrisaun ne’ebe maka a’as no nia sabor ne’e gostu tebes.

“Programa ou projeitu ne’e halai liu ba kooperasaun tekniku hanesan mos hau temi iha hau nia diskursu katak, Governo Japaun Liu husi JICA halo rehabilitasaun ba Irrigasaun bo’ot tolu hanesan Maliana, Laclo no Bluto no ida ne’e hanesan mos kooperasaun tekniku oinsa servisu ho Agrikultor sira hodi hasa’e ita nia foos rai ne’e ne’ebe nia durasaun ne’e ba tinan lima.” Hateten reprezentativu ne’e.Tyfa