«

Aug 01

Jovem 50 tuir formasaun iha AICAT-Israel

Dili – Ministeriu Agrikultura e Peskas (MAP) servisu hamutuk ho Governo (AICAT)-Israel haruka tan Jovem 50 ba Israel. Ne’e hanesan terseiro grupu, husi primeiro no segundo  nebe konsege tuir formasaun iha AICAT kona ba area Agrikultura no Hortikultura  no  fila hikas mai Timor Leste ho susessu. Formasaun nee sei halao durante tinan ida iha Israel.

Relasiona ho asuntu ne’e MAP entrga simbolikamente dokumentus ba jovem refere ne’ebe maka atu aranka ba Israel iha Fuluan Agostu nia laran, seremonia entrega Simbolikamente hala’o iha loron Segunda (17/07/17) iha Salun MAP Comoro Dili, simbolikamente dokumentus refere fahe diretamente husi Ministru Agrukultura e Peskas (MAP) Estanislau Alexo da Silva.

Hafoin entrega dokumentus ba estudante 50 ne’e, Ministru MAP Estanislau Aleixo da Silva hateten iha nia diskursu katak numeru ba formasaun ne’e sempre aumenta, iha primeiru grupu jovem hamutuk 20, segundu grupu iha jovem 30 no ba terseiru grupu ida ne’e iha tan jovem 50. Ba terseiru grupu ida ne’e feto hamutuk 16 no mane 34 maka sei ba tuir formasaun konaba Agrikultura nian iha AICAT-Israel.

“Iha semana kotuk hau hala’o enkontru hamutuk ho sira segundu grupu nian jovem hamutuk 30 wainhira sira fila husi Israel, hau hare sira kontente tebes tanba sira mai ho kondisaun diak mai ho normal buat ida mos la akontese ba sira.” Tenik Estanislau

Ministru Estanislau fo parabens mos ba joven feto 16 ne’ebe maka atu aranka, tanba feto sira mos iha inisiativa hakarak atu ba aprende servisu Agrikultura nian iha Israel, nia dehan feto sira ba laos hala’o servisu ne’ebe maka kaman, maibe hala’o servisu ne’ebe maka todan tebes, tanba sira servisu iha area Agrikultura no hortiukltura nian, entaun sira mos kaer trator hodi fila rai dader to lorokraik.

Iha fatin hanesan Diretor Nasional Formasaun Teknika Agrikola (DNFTA) Hipolito da Costa hatutan katak, ida ne’e hanesan terseiru grupu nian, ne’ebe maka total jove 50, mai husi varias instituisaun sira hanesan husi eskola teknika agrikola sira, no mos graduado ou finalista sira husi Universidade Nasional Timor Lorosa’e (UNTL) no mos Universidade Oriental Timor Lorosa’e (UNITAL).

“Hau hanoin ida ne’e hanesan oportunidade diak ida mai ita tamba Governo Liu-liu Ministerio mos fo atensaun makas ba prosesu kapasitasaun ba ita nia joventude sira hodi nune aban bainrua joventude sira mos bele kontribui ba dezemvolvimentu ita nia pais ida ne’e, tamba ne’e ita orgolho tamba Ministerio organiza oinsa atu involve inan aman sira, liu-liu familia husi hau nia alin sira atu sai sasin ba prosesu ne’e tomak, tamba prosesu ne responsabilidade ita hotu nian ne’e duni iha okaziaun ne’e ami mos husu ba inan aman husi hau nia alin sira nudar sasin ba ita hotu tamba proseso dezemvolvimento ba ita nia rai presija kontribusaun husi seitor hotu-hotu liu-liu ba iha area agrikultura nian.”hateten Hipolito

 Entretantu pontu vokal MCAE Cipriana Soares hateten katak, Ministeriu da agrikultura e Pescas establese kooperasaun ba embaixada Israel iha singapura hodi fasilita foinsae Timor oan feto no mane atu partisipa iha formasaun durante tinan ida iha institusaun Arafah Internasional Center for Agriculture Training, centru treinamentu ba agrikola iha Arafah israel. Hafoin establese kooperasaun ida ne’e MAP hetan ona oportunidade ba dala tolu, hodi haruka joven sira liu-liu alin sira husi eskola tekniku agrikola nebe seidauk iha oportunidade hetan servisu no kontinua estudu no mos estudante Universidade Timor Lorosae (UNTL) no Universidade Oriental (UNITAL) hodi tuir formasaun refere.

Nia akresenta, Objetivu maka investe kapasitasaun ba alumni eskola tekniku agrikola sira ne’ebe seidauk hetan servisu no kontinua estudu no prepara tekniku agrikultura nian tuir area ida-idak atu hetan esperensia no abilidade profesional hodi bele hamrik mesak iha iha futuru. Produs tekniku sira ne’ebe kualifikadu ho iha integridade iha ambitu kadernizasaun teknologias agrikolas no dezemvolve ejistensia dezemvolvimentu agrikultura iha rai laran no objetivu ikus maka prepara rekursu humanu ho kualidade no kuantidade atu hatan ba los demanda emprejarial ba agronegosio ou agrocomersio hodi dezemvolve agrikultura ne’ebe sustentavel no prospero.