Zevonia Vieira

Dili – Premeira Dama, Izabel Fereira, hasoru malu ho Ministru Agricultura e Pescas (MAP) no Ministru Estadu Koordenador ba Asuntu Ekonomiku (MECAE), Estanislau Aleixo da Silva, iha loron 13/06/2016, iha edifisiuMAP.

Objetivu hosi sorumutu ida ne’e katak, Premeira dama aprezenta kona ba atu selebra loron 20 anos, Nobel da Paz, ne’ebe sei realiza iha loron 7-8 Outubro 2016, iha Timor-Leste.

Hosi enkontru ida ne’e Premeira Dama esplika katak estadu Timor-Leste sei konvida peritus sira ne’ebe hetan premio Nobel da Paz maka hanesan Dr.Jose Ramos Horta no Bispu Carlos Ximenes Belo, iha tinan 1996, Nobel da Medicina, Ekonomika, Fizika no seluk tan.

Premeiru Dama husu ba Ministru Estadu Koordenador ba Asuntu Ekonomiku no Ministru Agricultura e Pescas, Estanislau da Silva, atu bele partisipa iha semininariu ne’ebe refere, hodi koalia asumtu ekonomia rai laran no fahe esperiensia ho peritus ekonomiku sira hosi rai liur, liu-liu premeiadu Nobel Ekonomiku ne’ebe mak sei sai mos orador iha selebrasaun loron 20 Anos Nobel da Paz.

Ministru Estanislau da Silva, esplika ba jornalista sira katak nudar uma nain, hodi selebra loron importante ida ne’e, MAP no MECAE sei perpara rekordasaun ba bainaka sira hosi rai liur hanesan Aikamelik no caffe, ida ne’e parte ida hosi Timor-Leste promove produtu rai laran ne’ebe iha nia folin boot iha merkadoria.

Objetivu hosi selebrasaun 20 anos Nobel da Paz, ne’e katak atu hatudu ba mundu no liu-liu joven sira, oinsa kaer metin paz iha rai laran, aprende sai joven ne’ebe iha responsabilidade, aprende hosi pasadu no importante liu, mundu tomak hadok an hosi funu no violensia no iha joven iha fuan oinsa atu hadomi sira nia nasaun.

Iha tempu hanesan Premeira Dama, Izabel Fereira mos, koalia kestaun kona ba governu China, ne’ebe hakarak atu ajuda governu Timor-Leste liu hosi parte edukasaun no agricultura.

Zevonia Vieira

Dili – Ministru Estadu Koordenador ba Asuntu Ekonomiku (MECAE) no Ministru Agrikultura no Peska (MAP), Estanislau Da Silva, partisipa Forum Ekonomiku Mundial ASEAN, iha loron 1 to 2 Junhu 2016, iha Kuala Lumpur Malaysia.

Liu hosi konferensia imprensa, iha loron 4/6, iha aero Porto Nicolau Lobato, Ministru Estanislau da Silva esplika katak iha Forum Ekonomiku Mundial, governu Timor-Leste mos halo enkontru ho empresariu privadu sira hodi koalia kona ba planiamentu hodi halo investimentu mai iha Timor-Leste.

Tuir esplikasaun hosi Ministru Estadu Koordenador ba Asuntu Ekonomiku (MECAE) no MAP, Estanislau da Silva, katak prioridade ba investimentu iha Timor-Leste ho empresariu sira sei hare liu ba iha area turismu no aviasaun nian.

Governu Timor-Leste konsege halo enkontru ho kompanias balun, liu-liu ho Air Asia, ne’ebe hatudu sira nia intensaun ato semo mai Timor-Leste,

“ita implementa tok hanoin ne’ebe ita iha, no sira mos konkorda hodi hatun folin viajen nian, maibe halo ligasaun ne’ebe tama iha pakote ida hanesan Kuala Lumpur Dili, Dili Darwin, Kuala Lumpur Bali, Dili Bali no Bali Darwin. Se ida ne’e ita halo, ita sei aumenta trafiku, hatun mos folin no iha posibilidade hodi dada ema mai ita nia rain”. Tenik Estanislau da Silva

Ministru Estadu Koordenador ba Asuntu Ekonomiku (MECAE), Estanislau da Silva haforsa liutan katak, halao ona enkontru ho Ministru Turismo no agora dadauk governu Timor-Leste servisu makas, hodi hadia pakote turismo nian, tanba Turismo nudar pilar importante no turismo fatin ida ne’ebe ema hakarak halo investimentu. Maibe tenke dezenvolve programa hodi bele hetan rendimentu.

Governu Timor-Leste, liu hosi Ministeriu Estadu Koordenador ba Asuntu Ekonomiku (MECAE), servisu hamutuk ho Ministeriu dos Negócius Estrangeiros e Cooperação (MNEC), liu-liu embasada Timor-Leste iha Kuala Lumpur no embasada iha Singapore, hodi bele dudu prosesu ne’e ba oin.

Elsio Jong

Dili – Ministeriu Agricultura e Pescas (MAP), Iha politika hodi mobiliza ekonomia sufsiente no aprosimasaun ba obra agricultura extensionista. Ho razau ida ne’e MAP realiza workshop hodi aumenta extensionista sira nia kapasidade hodi bele hakbiit agricultura oinsa bele hasae ekonomia nebe’e sufsiente.

Director Jeral Agricultura e Horticultura, Deolindo da Silva, esplika objetivu hosi politika ida ne’e, katak MAP iha koperasaun entre GIZ Thailandia no GIZ Alemanha nian, hare kona ba oinsa atu hasae kapasidade extensionista sira iha area rural, no bele transfere siensia ba grupu agricultura sira kona ba ekonomia sufsiente.

Tuir Direcotr Jeral Agricultura e Horticultura, durante ne’e MAP halo koperasaun ho agensia internasional sira kona ba formasaun no pograma RDP 1, RDP 2, RDP 3 no RDP 4 no mos kona ba atividade nivel ekonomia nian, ne’ebe servisu hamutuk ho Camoes Portugal,

“Espesial liu oinsa hasae kapasidade ba ita nia extensionista sira, para bele atende ita nia agricultor sira iha treino. Agora dadauk sira sei intenta hela tamba ida ne penjajakan ida, mais buat nebe mak sira halo ne barak ne hosi Ermera,Manufahi,Maliana nomos iha seluk-seluk tan”. Tenik Deolindo da Silva

Iha parte Seluk Koordenador Junior Projetu Trilateral Cooperation, Adelia dos Reis Kebo, ne’ebe halo aprezentasaun kona ba atividade hosi projetu ne’ebe refere,

“treinamentu ne sei hala’o to loron 7 no partisipante husi area tarjetu 3, Municipio 3 Ermera,Liquisa ho Dili. Extensionista iha ne’e, presiza atu bele fahe informasaun ba malu hodi foka liu ba iha Ekonomia sufisiensia iha area suku tarjetu sira ne’e ,no mudelu aktividade sira nebe mak sei hala’o mak kona ba promosaun kadeia de valor nomos hodi habelar informasaun servisu extensionista sira nian sira hodi hasae sira nia redimentu da familia liu husi informasaun ikus nomos habelar informasaun ba extensionistasira seluk laos ba deit iha sira nia grupo ou servisu fatin deit”.Tenik Adelia dos Reis

Tuir Koordenador Junior Projetu Trilateral Cooperation, Adelia dos Reis Kebo, katak programa ne’e hetan apoiu hosi parte Ministeriu Agricultura e Pescas tanba programa ne’e nudar projetu bilateral, koperasaun hosi nasaun Thalandia, Alemanha no Timor-Leste. Kooperasaun ho agencia internasional mak hanesan TICA Internasional Cooperation Agency no German Internasional Cooperation

Workshop Treinamentu ba Treinador (TOT), hala’o iha loron 23 – 31 Maiu 2016, iha edifisiu MAP, Comoro Dili

Zevonia Vieira

Dili - Ministeriu Agricutura e Pescas (MAP) no Ministru Estadu Koordenador Ba Asuntu Ekonomiku (MECAE), realiza ona konferensia internasional ho membrus paises CPLP, kona ba asuntu tasi. Resultadu hosi reunion ida ne’e, konsege hamosu Deklarasaun Dili, ne’ebe nasaun CPLP sira hamosu liu hosi plenaria, hala’o iha loron 18/05/2016, iha Ministeriu dos Negócios Estrangeiros e Cooperação Timor-Leste (MNEC).

Resultadu hosi plenaria ida ne’e hamosu Deklarasaun Dili, ne’ebe liga ba asuntu Tasi nian. Ministru Agricultura e Pescas no Ministru Estadu Koordenador Ba Asuntu Ekonomiku (MECAE), Estanislau Aleixo da Silva, ba Media MAP esplika katak resultadu reuniaun desde domingo to 18/05/2016, asuntu importante liu mak kona ba kriasaun Portal. Portal ne’ebe Timor oferese atu halo lansamentu, kriasaun sentru investigasaun, realizasaun feria de pescas do Mar. premeira Feira ne’ebe sei halo iha Portugal iha tinan oin mai.

“Iha reuniaun ida ne’e koalia kona ba nesesidade paises CPLP nian, iha koordesaun makas kona ba asuntu tasi nian, liu-liu plataforma continental ninian, para bainhira iha diskusaun iha nivel internasional, informa ba nasoens unidas, ita iha posizaun ida ne’ebe komum sobre asuntu ne’ebe enfrenta direitamente estadus membrus CPLP ninian, tanba maioria CPLP ne’e hotu-hotu iha tasi. Tenke ho pozisaun ida ho konsertada no komum kona ba asuntus ida ne’e”. tenik Estanislau da Silva

Iha Deklarasaun Dili mos esplika katak pontu fokal ne’ebe estabelese katak tenke iha kontaktu ida ne’ebe efektivu, oinsa mak atu utuliza rekursu ne’ebe desponivel, rekursu umanu sentismus hanesan paises sira nebe’e avansadu iha area investigasaun para partilha informasaun ho fali paises sira seluk ne’ebe seidauk atinji nivel dezenvolvimentu iha area investigasaun sentifika.

Liu hosi reuniaun CPLP, pontu importane alende pescas illegal, lixu marinho mos aplika mos iha Deklarasaun Dili, tanba lixu marinho faktor ida ne’e persija tau atensaun atu ema hotu bele servisu hodi proteje ba tasi mo’os.

Ministru MAP no MECAE, Estanislau da Silva, apela ba sosiadade sivil no komunidade Timor tomak atu bele servisu hamutuk ho governu Timor-Leste hodi halo kampanha tasi mo’os no sensibilizasaun kona ba ambiente marinho, liu-liu ba lixu marinho.

Ekonomia azul mos sai parte importante ida ne’ebe, membru paises CPLP sira kria atu bele servisu hamutuk, hodi potensialidade nebe’e mak iha, hanesan biologiku no non bioligiku hanesan iha tasi ninian, hodi haforsa liutan dezenvolvimentu pais membrus CPLP atraves koperasaun sintifika, ekonomika nune’e bele halo dezenvolvimentu sustentavel benefisiu ba povu paises CPLP.

 Elsio Jong

Natarbora - Ministeriu Agricultura e Pescas (MAP), lansa teknologia konservasaun agricultura, iha Natarbora, municipiu Manatuto. MAP ho nian objetivu katak ho teknologia konservasaun agricultura oinsa atu implementa liu hosi aspeitu ekonomia.

Diretor DNPEIG, Claudino Ninas Nabais, ba media MAP esplika katak ida ne’e nudar implementasaun dahuluk iha Timor-Leste, no iha rai balun implementa ona.

“hare husi ita nia materiais lokais ka aihoris ne’ebé lokalmente ita bele hetan, dezeña tia pesquisa ne’e ita impelementa iha to’os nain sira nia let. Dala barak ita hanoin katak pesquisa ne’e pesquisador sira deit mak halo maibé resultadu ne’e involvementu husi Agricultor sira no resultadu hatudu katak pesquisa ne’ebésintunika ka sederhanakan ne’e ita implementa iha agrikultor sira. Agrikultor sira bele hare katak tratamentu ida ne’e mak sira kuda kompara ho sira nian ne’e diak”. tenik Diretór DNPEIG Claudino Ninas Nabais.

Durante tinan 3 nia laran MAP hala’o servisu hodi observa parte Natarbora ne’ebe servisu hamutuk Food And Agriculture Organization (FAO). Durante tinan 3 grupu agriculture sira la konkorda ho tekniku ne’e, tanba kontra fali kostume tradisional sira ne’ebe durante ne’e sira implementa. Maibe tuir Diretor Claudino Ninas Nabais, katak ho aprosimasaun ne’ebé halo hamutuk ho sira, observa no neneik MAP no FAO konsege muda sira nia mentalidade oinsa mak sira bele simu teknolojia foun ne’e.

Claudino mós realsa liu tan katak, agicultor, Juaquim fo-foun nia kontra no dehan “ita impelemnta ida ne’e kolen lafó resultadu diak kompara ho ami nian”, mais ho aprosimasaun hare iha primeiru époka seidauk hetan resultadu, mais iha segundu époka hatudu ona resultadu katak fila rai ka la fila rai, rai bokur aumenta du’ut mos la hamos ona tamba taka ho Mulsa ka Lehe ou residu Batar Ka’in. komesa fiar ona agrikultor ne’e hatutan katak uluk hau nia liman sorin labele halo to ½ hetares mais agora bele halo to ½ ho akompañamentu aisuak balun ne’ebé mai husi rai liur fas parte ba pakote ne’e”.

Iha parte hanesan Ministru Agricultura e Pescas (MAP) no Ministru Estadu Koordenador ba Asuntu Ekonomiku (MECAE), Estanislau Aleixo da Silva, ba Media MAP esplika katak Conservasaun Agricultura ne’e mai iha ita nia rain, ne’e mak agora foin intrudus ba ita nia agrikultor sira hanesan esperiensia demonsterasaun.Tekniku ne’e utiliza barak ona iha rai seluk, Vantajen mak la presiza fila rai, kuda aihoris ne’ebé bele halo mate du’ut,  la presiza hamos du’ut no kuda tiha aihoris hanesan Koto hamutuk ho Batar bainhira sira silu batar bele lori maki ba baku aihoris hanesan koto sira ne’e habelar tia depois kuda foun no kuda direitamente deit la presiza fila rai”, tenik Ministru MAP no MECAE

Estanislau da Silva, hatutan liutan katak vantajen diak wainhira sira kuda aihoris hanesan koto sira ne’e, laos habokur rai dei,t halo mós nutrisaun ida ba rai bainhira loron manas mos laiha evaporasaun makas. Bele halo nafatin sira nia to’os, bainhira buat ida bolu hanesan materia arganika hanesan batar kain, koto kain taka hela rai hanesan konserva hela be’e rai nee halo Batar,Koto,Formungu ne’ebé sira kuda moris ho diak nafatin.

Liu hosi teknologia ida ne’e, bele iha benefesi boot ba agricultor sira. Tuir planu liu hosi MAP, sei esforsu nafatin hodi diskuti orsamentu tenke tau osan hodi hola makinas sira ne’e. MAP tenta hodi habelar makina hirak ne’e ba municipio sira seluk.

Koordenador Programa FAO, Clementino Bento, ne’ebe mak partisipa iha lansamentu ida ne’e ba jornalista sira hateten katak Programa konservasaun Agrikultura ne’e programa foun inisiativu husi Menisterio Agricultura Pescas rasik no kopera ho FAO husi parte atu suporta tekniku no publiku, oinsa atu implementa programa ne’e iha Timor, tamba programa ne’e atu hanorin agrikultor sira lasunu rai, la fila rai no kuda legum sira ne’e”. tenik Clementino Bento

Clementino Bento, esklarese liutan katak ida ne’e atu agrikultor sira bele redus gastu mak durante sira uza ho tempu wainhira udan. Liu husi programa konservasaun agrikultura katak kuda rai, lasunu rai, la fila rai, kuda ho legum fore koto no Lehe biala sira uluk iha no oinsa bele haburas fali fini sira nomos bele fo benefisiu ida katak bele konsumu nomos bele hadia rai nia bokur atu bele hasae nutrisaun iha rai laran.

Tuir FAO katak etapa premeiru ba programa ida ne’e hahu ho municipiu 4 no agora atu habelar ba municipiu 7.

“ami mós forma grupu iha ne’eba, nomos ba agrikultor ne’ebé kuda batar enatun iha etapapremeiru ami fokus iha batar maibé ne’e la taka ba aihoris sira seluk. Konservasaun agrikultura bele aplika ba batar,aiferina,fore,fehuk ou aihoris nebe mak bele kuda”.Esplika Koordenador Programa FAO, Clementino Bento

Zevonia Vieira

Ministeriu Agricultura e Pescas (MAP) no Ministeriu Estadu Koordenador ba Asuntu Ekonomiku (MECAE), halo lansamentu ba kampanha Tasi Mo’os iha tasi ibun Farol Dili, iha loron 15/5/2016.

Objetivu hosi lansamentu tasi ida ne’e katak governu Timor-Leste no pais CPLP tenke servisu hamutuk, tanba lixu marinho nudar problema global. Lixu Marinho sei fo risku boot ba animal iha tasi laran no ema nia saude.

Ministru Agricultura e Pescas (MAP) no Ministru Estadu Koordenador ba Asumtu Ekonomiku (MECAE), Estanislau Aleixo da Silva, ba media hato’o katak pais CPLP tenke organiza an, hodi pais idak-idak kontribui hodi hamos tasi,

“ohin ita halo lansamentu ofisial hamos tasi. Programa ohin ne’e hanesan pratika ida hosi resolusaun governu nian, ne’ebe foin aprova iha loron 6 Maiu, iha reuniaun konselhu ministru no mos resolusaun parlamentu nian, ne’ebe husu ba governu hodi foti medidas hamos tasi”. tenik Estanislau da Silva

Impaktu lixu marinho ba ikan, espesies seluk, saude no turismo, ne’e sai hanesan responsabilidade boot ne’ebe persija tau atensaun. Liu hosi seremonia lansamentu kampanha tasi mo’os, Ministru Estanislau Aleixo da Silva, hato’o ba ema tomak katak lixu marinho iha nia risku boot ba ita hotu, tenke iha kontinuasaun liu hosi edukasaun ne’ebe forte, kampanha forte no media iha responsabilidade hodi ajuda halo kampanha hodi eduka komunidade, no kolaborasaun entre ministerial ne’ebe relevante ho ema nia moris no ambiente.

Governu Timor-Leste liu hosi Ministeriu Agricultura e Pescas, hahu ona esforsu sevisu hamutuk ho komunidade kosteiras no peskadores, fo treinamentu oinsa atu iha konyesementu kona ba proteje tasi no la soe lixu ba tasi.

Ba jornalista Ministru Agricultura e Pescas no Ministur Estadu Koordenador Asumtu Ekonomiku, Estanislau Aleixo da Silva, esplika importansia hosi tau matan ba tasi, importante labele kee ahu ruin, labele ta ai parapa ne’ebe moris iha tasi laran, tanba buat hirak ne’e kontribui ba iha resiklazen vida marinha. Ida ne’e persija kontinuasaun hodi halo ambiente tasi diak liutan.

Iha lansamentu ne’e hala’o mos seremonia tradisional, ne’ebe reprezenta lia nain hosi mota ain Karkateu. Objetivu hosi seremonia tradisional ida ne’e atu hatudu katak ohin loron komesa kria ona tarabandu ba komunidade tomak atu bandu labele soe arbiru lixu iha tasi ibun. Tuir Lia nain hirak ne’e hateten katak wainhira komunidade balun soe lixu arbiru iha tasi ibun, sei hetan multa.

Liu hosi konferensia Internasional CPLP ne’e rasik, sei hamosu tan Deklarasaun Dili, nudar kontinuasaun hosi resolusaun ne’ebe aprova ona iha Lisboa iha tinan 2015, hodi hare fila fali saida mak bele tau iha deklarasaun, hodi nune’e bele hamosu komprimisu kada pais, no CPLP bele aprezenta iha nasoens unidas katak CPLP organizadu no iha responsabilidade ba kontrola foer iha tasi laran

Zevonia Vieira

Ministeriu Agricultura e Pescas no Ministeriu Estadu Koordenador ba Asumtu Ekonomiku, realiza konferensia CPLP , kona ba Tasi.

Iha konferensia ida ne’e sei foka kona ba lixu marinho nasaun CPLP “resposta nasionais no regional para um problema global”

Asumtu Marinho sai nudar asuntu global ne’ebe persija tau atensaun masimu, tanba bele fo impaktu ou risku boot ba espesies iha tasi laran no ema. Liu hosi konferensia internasioanl CPLP, sei fahe ideas ba malu, hodi bele halo asaun no buka solusaun oinsa proteje tasi mo’os.

Diretor Geral Pescas, Acacio Guterres, iha workshop ne’ebe realiza iha loron 15/05/2016, ba partisipantes hosi pais CPLP, membru governu no Movimentu Tasi Mo’os, hato’o katak lixu marinho nudar asumtu importante ne’ebe persija fahe informasaun ba iha nivel hotu, atu ema hatene kona ba impaktu negativu hosi tasi foer,

“informasaun importante atu ita habelar komesa ohin, komesa hosi lokal, nasional no internasional. Polusaun iha tasi akontese iha fatin hotu, tanba ita ema nia hahalok. Ita tenke kombate lixu marinho. Ministeriu Agriculutra komesa servisu maka’as, hodi hal asaun iha tinan 2 nia laran”. Tenik Diretor Jeral Pescas

Diretor Jeral Pescas, hatutan liutan katak liu hosi konferensia ida ne’e, nasaun CPLP fo ideas global ba asumtu tasi nian, atu bele halo asaun hodi proteje tasi

Iha workshop ne’ebe realiza iha edifisio sekertariadu CPLP, Peskizador / tekniku profesionl MCIA – Ambiente, Unidade Nasional do Ozono, Arsenia Vital Ximenes da Cruz, hato’o rezultadu peskizasaun kona ba fontes no tipu lixu marinho iha tasi norte Timor-Leste.

Liu hosi aprezentasaun, Arsenia da Cruz esplika katak lixu marinho mak objeto hotu tama ba ambiente tasi nian, ne’ebe la’os original ba ambiente tasi nian. Impaktu hosi lixu marinho katak sei hakait ou kesi animal tasi, lakon turismo tasi ibun, moras kulit no biocumulasaun.

Arsenia da Cruz mos hatudu dadus katak fontes lixo marinho mai hosi fontes rua mak hanesan Terrestrial 80% lixu tuir mota no be dalan, Marinho 20% lixu roo hakail no soe lixu illegal hosi roo.

Sai hanesan problema hosi peskizasaun ne’ebe Peskizador Arsenia da Cruz akumula, hatudu katak numero populasaun aumenta iha costa norte, liu-liu iha Dili, falta jestaun ba lixu, lixu fatin no soe foer fatin arbiru, inderetamentu afeita coral no biodiversidade ba tasi Timor no seidauk iha peskiza ka estudu sistematikamente ba lixu marinho ka sedauk iha programa regular.

Kauza boot hosi lixu ne’ebe tun ba tasi, tanba lixu barak mai hosi rai maran, liu hosi foho leten, tun ba mota no ikus liu ba tasi ibun. Lixu ne’ebe barak liu mak 70% plastiku , no lixu sira seluk hanesan vidru rahun, kaleng, suratahan no besi ho nian persentu kiik. Lixu hosi rai maran barak liu mai hosi mota ponte Comoro ne’ebe domina ho lixu plastiku

Arsenia da Cruz, liu hosi ninian aprezentasaun esplika katak liu hosi resultadu peskizasaun ida ne’e, bele fahe informasaun, fo ideas hodi bele fo atensaun ba proteje ambiente no oinsa promove recycle lixu plastiku, hodi nune’e lixu hirak ne’e iha valor no bele hamosu rendimentu ba komunidade

Iha parte seluk Presidente Movimentu Tasi Mo’os, Gally Soares Araujo, hato’o lia menon ba governu,liu-liu ministeriu edukasaun atu hahu hanoin oinsa hanorin alumnus sira atu soe lixu iha nia fatin, atu nune bele hamenus impaktu lixu ba rai maran no tasi, atu la fo risku boot ba joven no labarik sira iha futuru

Elsio Jong

Dili - Situasaun klimatiku iha Timor-Leste sei sai problema boot no komunidade sei afeta ba iklima ida ne’e. El nino ne’ebe akontese iha tempu naruk nia laran, sei afeta ba ai han ne’ebe agricultor sira kuda.

Ho preokupasaun hirak ne’e, Ministeriu Agricultura e Pescas, liu hosi Diresaun Nasional Seguransa Alimentar Koperasaun, aprezenta dadus ne’ebe foti iha suku 442, ne’ebe afetadu hosi El nino.

Director Nasional Seguransa Alimentar Koperasaun, Justino do Santos Silva, iha loron 22/04/2016, iha Aula enkontru MAP, esplika ba parseiru sira katak El nino ne’ebe akontese hahu hosi Novembru to Dezembru 2015, Janeiru to Fevereiru 2016, hamosu impaktu boot ba iha setor seguransa ai han,

“El nino nia impaktu negativu boot tebes, animal balun mate no moras, tanba falta ai han seguransa. Iha Marsu ami hatun ekipa 1 ba kampu, foti dadus iha 442 Suco. Ida ne afetadu tebes, liu-liu munucipio sira ne’ebe afetadu mak Lautem,Viquque,Baucau,Manatuto no mos Covalima”.Tenik Justino do Santos Silva

Justino hatutan liutan katak fulan 3 tuir mai, hahu hosi Abril to Junhu sei hetan hamlaha tanba impaktu hosi El nino. Badan Metedologia Australia no Indonesia esplika katak El nino bele afeta to Novembru. Problema seluktan ne’ebe bele mos mak La linha.

“ho problema hirak ne’e, MAP konvida agensia sira, hodi bele aprezenta resultadu ba governu. Depois ba oin kontaktu fila fali agencia sira, hodi bele responde obsatklu ne’ebe mosu, hodi kopera ho rede ministerial”. Esplika Justino

Tuir dadus ne’ebe aprezenta hosi Diresaun Nasional Seguransa Alimentar Koperasaun, hatudu katak numero Umakain ne’ebe hetan impaktu husi bailoron naruk iha Timor laran tomak total 72.9% (121,958). Area ne’ebe hetan onaInseguransa Ai-han hosi fulan Dezembru, Janeiro no Fevereiru total 40.6%, populasaun total 345,366. Area ne’ebe sei afeita Inseguransa Ai han hahu hosi Fulan Abril, Maio no Juñu 45.9%, total Populasaun 378,669 .

Mudansa klimatika, ne’e afeta mos ba animal sira, ne’ebe labele moris tanba la iha bee no ai han, ba animal sira hodi konsume. Animal sira ne’ebe mate iha teritorio laran tomak, mak karau Timortotal 10,877, vaka total 4,834, Fahi total 3,021, Manu total 17,525

Ministru Agricultura e Pescas no Ministru Estadu Koordenador ba Asuntu Ekonomiku, Estanislau Aleixo da Silva, esplika katak MAP hala’o reuniaun ho parseriu dezenvolvimentu de kordensaun, hodi koalia kona El nino,

“Agora ne’e frekuensia El nino akontese barak, tamba iha mudansa klimatika ne makas. Nia impaktu mak bailoron naruk. Hau hare aprezentasaun, ita nia Agrikultor sira depende liu ba sira nia moris liu-liu ba Batar. Produsaun batar la dun diak tanba balun mate , Koto, Fehuk ou Aifarina tamba udan Ben ladun mai”.tenik Estanislau da Silva

Ministru Estanislau da Silva realsa liutan katak objeitvu hosi reuniaun ida ne’e, atu identifika apoiu saida mak parseiru sira perpara hodi responde ba situasun grave ida ne’e.

“Apoiu saida maka sira bele fo, bainhira ita persija iha area agricultura. Maske agora dadauk parte agricultura iha Fini ne’ebe sufisiente, hodi nune’e bainhira agricultor sira persija fini, ami bele fo apoiu ba sira, liu-liu sei kuda fila fali”. Esplika Estanislau da Silva

Politika MAP nian, hodi responde ba mudansa klimatiku, mak agora dadauk MAP hala’o ona oinsa aumenta produsaun Hare nian, produs Fini barak liu. Ba Media MAP, Ministru Estanislau Aleixo da Silva, hateten katak komunidade labele depende deit ba hahan hanesan Fos,

“ita nia populasaun barak liu mak halai natar, no uza bee barak no sulin saugati deit, irigasaun ne’e saugati deit ne’e ami hare’e. Tenke hare’e hodi halo produsaun fini, hodi garante katak bainhira ita nia populasaun kuda ai han, ne’ebe mak mate, ita bele fo fali fini ba sira hodi halo produsaun fini foun”. Konfirma Estanislau da Silva

Liu hosi MAP, lansa ona mos variedade 7 hanesan Foremungu, Fehuk Midar, no Koto. MAP lansa produsaun ho 156 toneladas milletares. Liu hosi program fini ne’e, atu bele servisu hamutuk ho agricultor sira iha Timor laran tomak

Elsio Jong

Ermera - Ministeriu Agricultura e Pescas inagura agrometrologia ne’ebe mak komunidade sira persija, liu-liu ba iha area agricultura e pescas. Fungsaun hosi agrometrologia ne’e rasik, atu bele hatene kondisaun hosi udan ben, anin no rai.

Liu hosi inagurasan ne’ebe inagura iha Gleno, Munisipiu Ermera, Sekretariu Jeral Ministeriu Agricultura e Pescas, Cesar da Cruz, esplika katak agrometrologia nian fungsaun diak tebes, hodi bele kuda ai han ne’ebe mak bele adapta ba iha kondisaun rai no bee,

“ita hetan Agrometrologia nebe mak automatiku, Kompora husi nebe mak menisteriu hari ne sei manual. Ita hein katak husi Instituisaun nebe maka relevanta, hatene kona ba temperature udan no anin bele tama iha website governu nian, nebe hosi Menisteriu Agricultura e Pescas iha, no ema hotu bele asesu”. Tenik Sekretariu Jeral MAP

Cesar da Crus realsa liutan katak agricultor sira mos persija hatene kona ba kondisaun rai nian, udan ben no loron manas, anin no mos temperature hosi soul rai nian. Informasaun hirak ne’e sei liu hosi estansionista sira, tanba sira mak hakbesik an liu ba iha agricultor sira, no sira mak fahe informasaun tanba mayoria komunidade iha rural sedauk bele asesu.

Xefe Departementu Agrometrologia e Statistika, Jose Quintaun, iha loron lansamentu esplika ba Media MAP katak iha tinan 2004, MAP estabelese ona stasaun 1, iha tinan 2008 estabelese stasaun 1. Iha tinan ida ne’e, automatika medics station iha Gleno.

“tinan ida ne’e ita inagura iha Gleno, ita hetan ona ajuda hosi Global Climate Change Alliance (GCCA), atu apoiu resultadu mak ami desidi katak iha Gleno, ita tau tipu automatika ho ninian Sistema transfer uza 3G no sim card mak Timor Telcom. Tanba ida ne’e mak, ami aselera hodi estabelese no halo lansamentu”. Tenik Jose Quintaun

Benefisiu hosi agrometrologia ba agricultura katak sei estabelese informasaun, no agricultor sira bele hetan informasaun hosi estasaun direita,

Xefe Departementu Agrometrologia e Statistika, Jose Quintaun, klarifika katak ho agrometrologia ida ne’e, agricultor sira bele asesu informasaun liu hosi internet ka telephone ne’ebe uza 3G. Maibe Departementu Agrometrologia mos sei produs nafatin informasaun liu hosi bulletin, hodi nune’e komunidade bele asesu informasaun jeral kona ba situasaun agrometrologia iha Timor.

Presidente Asosiasaun Feto Ermera, Maria da Costa Espostu, partisipa mos iha loron inagurasaun. Maria da Costa Espostu agradese tebes ho esforsu governu nian, liu hosi Ministeriu Agricultura e Pescas, tanba bele kria kondisaun ne’ebe bele fo benefisiu ba komunidade, hodi bele komprende kona ba situasaun iha seitor agricultura. Maibe Maria rasik iha preokupasaun kona ba oinsa atu publika informasuan,

“Oinsa mak ami bele hatene aban udan boot, tempu oin mai rai maran. Ita labele kuda ai han ida ne’e no ai han seluk. Tanba ami persija kontinuasuan hodi sosializa no informasaun ne’ebe klean liutan”. Tenik Maria da Costa

Apoiu ba projetu Agrometrologia ida ne’e, hetan apoiu hosi Uniaun Europea no Embasada Portugal ne’ebe durante ne’e kopera diak ho Ministeriu Agricultura e Pescas

Asala Ribeiro

Dili - Nudar nasaun ida, ne’ebe vinjinhu ho nasaun besik ho Australia no Indonesia, asumtu fronteira rai, tasi no lalehan ne’e importante tebes.

Iha loron 20-22 Abril 2016, hala’o enkontru kona ba Monitoring, Controling and Surveillance (MCS), sub Regional Arafura no Timor Sear, bad ala 6, iha Hotel Ramelau Dili Timor-Leste.

Iha sorumutu ida ne’e, Xefe Departemento Monitorizasaun, Kontrolu no Supervisaun ba Pesca,Pedro Antero Mario Rodriguês,hateten katak Ministério Agricultura e Peskas (MAP) liu-husi Diresaun Jeral ba Pesca nian, atu responde ba preokupasaun publiku nian, kona-ba atividade Peska Ilegal. MAP liu-husi Diresaun Jeral Peskas nian, hala’o enkontru hamutuk ho nasaun 4 (ha’at) mak hanesan Australia, Indonesia, Papua New Guinea no Timor-Leste.

“Enkontru ne’e Timo-Leste mak hanesan uma-nain ba dala rua, hodi tau hanoin hamutuk no fahe informasaun ba malu oinsa mak bele kombate atividade peska ilegal. Tanba, durante ne’e movimentu peska ilegal iha ita nia maritime livremente sai nu’udar problema nasional no ameasa ba futuru Timor-Leste”.tenik Pedro Rodrigues

Pedro Rodrigues hatutan liutan katak iha enkontru ne’e mos, atu review ba planu asaun 2015 nian no fahe informasaun ba malu katak saida mak halo ona, saida mak sedauk halo no atu identifika problema saida mak husi nasaun ida-idak infrenta. Enkontru ne’e halo hodi fahe informasaun ba malu tuir esperiensia husi nasaun ida-idak nian, nomos enkontru ne’e sempre hala’o iha tinan-tinan, hanesan sub rejional ne’ebé agora Timor-leste mak sai uma-nain ba dala rua, hodi lidera enkontru ida ne’e.

Tuir Xefe Departemento Monitorizasaun, Kontrolu no Supervisaun ba Pesca, nia hanoin katak kontribuisaun husi nasaun sira ne’e, konaba esperiensia husi nasaun ida-idak nian, oinsa mak atu bele kaer ka prende roh, Roh hira ona mak kaer, se kaer karik atu kaer oinsa nomos halo inspesaun ba roh bo’ot sira ne’e, hodi oinsa minimiza eru bo’ot hanesan akontese iha tinan kotuk, atu labele akontese tan, atu nune’e iha futuru ita nia servisu bele halo diak liu tan.

Ministerio Agricultura e Pescas (MAP), mantein nafatin Lei Peska nian ne’ebé iha, atu hala’o markasaun ba Roh sira ne’e, antes atu hetan Licensa, primeiru mak halo inspesaun ba roh sira ne’e bazea mos ba kapasidade ne’ebé iha, se karik roh ne’ebé bo’ot oinsa bele halo inspesaun, ida ne’e mak sei sai difikuldade ba ita, saliente Pedro Rodrigues

Timor-Leste hahu ona halo prevensaun mak kria sistema ne’ebé estabelese ona, liu-husi Community Report Base system katak komunidade sempre relata kona-ba atividade peska ilegal maibe problema falta kapasidade rekursu,

“Ita nia problema mak ne’e, kuandu ita nia komunidade sira relata mai maibe ita nia difikuldade mak laiha kapasidade atu atende ba iha parte ne’ebé tuir informasaun relata mai. Sira informa katak iha atividade peska illegal maibe ita informa ba sira ita laiha kapasidade, ida ne’e mak ita nia problema bo’ot”. Pedro Rodrigues esplika.

Dadus tinan 2015 nian hatudu katak kazu atividade peska illegal hamutuk 15. Iha tinan 2016 hamutuk 7, ne’ebé mak komunidade sira hato’o, katak iha atividade peska illegal, maibe Timor-Leste sei hasoru nafatin problema oinsa mak atu response ba ida ne’e.

Tuir Pedro Rodrigues katak, MAP esforsu an nafatin atu kombate peska illegal ne’e, maibe ida ne’e laos parte peska nian deit. Ida ne’e involve Ministerio relevante sira, nomos presija kontribuisaun husi parte hotu.