Vice Ministru MAP Halo Munitorizasaun ba Café Iha Munisipiu Haat

Estrela inativaEstrela inativaEstrela inativaEstrela inativaEstrela inativa
 

Manatutu-Ministério Agríkultura e Peskas (MAP) liu hosi Dirasaun Jeral Floresta Café e Plantas Industria asina ona akordu ho Cooperativa Café Timor (CCT) Assosiasaun Café Timor (ACT) hodi halo rehabilitasaun no espansaun café iha Munisipiu sira hanesan Manatutu, Manufahi, Ainaro, Aileu, Likisa, Ermera no Bobonaro.

Relasiona ho asuntu ne’e Vice Ministru MAP Abilio Xavier de Araújo halo monitorizasaun ba cafekultor sira nia area hodi haree no observa direta iha terenu. Atividade ne’e hala’o iha loron 11–19/04 iha Munisipiu haat mak hanesan Manatutu, Manufahi, Ainaro no Aileu.

Iha entrevista Vice Ministru MAP Abilio Xavier de Araújo hateten katak, Objetivu husi vizita ida ne’e atu hare diretamente rehabilitasaun kafé iha inisiu tinan 2023. Tanba orsamentu ratifikativu ne’ebé maka aprova husi Parlmentu Nasionál iha tinan 2022 nian konsentra mos ba iha tesi kafé. Tanba ne’e maka Ministeriu iha konfiansa hodi fo fiar ba kompañia rua hanesan ACT no CCT hodi halo rehabilitasaun ba cafe hamutuk 8 mil hektares iha munisípiu ne’ebe maka kafé ezizte.

“Ohin ita tama iha postu Turiskai, Suku Beremana, ha’u kontente tanba iha fatin ida ne’e postu antigu nian maibe bele haree ita nia joven no ita nia komunidade sira  iha inisiativa bo’ot hodi konsentra ba hadia plantasaun kafé, ida ne’e hanesan pasu diak ida hodi bele dezenvolve tan cafe iha futuru atu bele hadia ekonomia uma laran.” Tenik Vice Ministru MAP

Nia informa, iha monitorizasaun ne’e iha sinais balu ne’ebe hatudu diak tebes no balu mos presiza hadia hanesan tenki halibur cafe kain ne’ebe tesi ona bele butuk hamutuk iha fatin ida, halo terras atu bele konserva rai ten sira bainhira udan tun labele lori rai sira ba mota ou tasi no hamos kafe oan sira ne’ebe maka la fo produsaun fuan iha to’os ou kintal.

Iha fatin hanesan cafekultor iha Postu Administrativu Laclubar Belarmino Soares Lopes hato’o obrigado ba programa VIII Governu Konstitusional tanba diak tebes no iha Postu Administrativu Laclubar pela primeira ves halo tesi kafe ou hetan rehabilitasaun ba Café.

“Depois de rehabilitasaun ba café, tinan tolu maka foin bele kolleta fali, maibe hau sente kontente tanba kuandu halo ona rehabilitasaun, kafe nia produsaun sae makas tebes no ami mos hetan subsidiu Osan husi governu ne’ebe ajuda los ami nia nesesidade uma laran nian no balun hau uza hodi hadia fali hau nia kafe hanesan halo teras no selu-seluk tan.” Katak nia

Nune’e mos Administrador Postu Administrativu Laclubar Francisco M. Soares hato’o agradese barak tebes ba Vice Ministru MAP ne’ebe bele hakat too iha sira nia fatin hodi hare diretamente programa poda kafe iha postu ida ne’e, durante ne’e atividade la’o hela hamutuk ho kompañia sira ne’ebé orienta agrikultor sira oinsá atu poda kafé tuir orientasaun MAP nian.

“Ami nia klima ha’u hanoin bele favorese ba kafé tanba ne’e ho programa hanesan ne’e ami kontente tebes tanba maioria agrikultor sira nia rendimentu barak liu mos mai husi kafé nian, sei iha tan tua ne’ebe koñesidu ho tua Laklubar, iha mos ai-fuan sira bainhira ita la’o iha tenpu hanesan ne’e barak pertense ba produtu Laklubar nian, ne’ebé husu liu-liu ba MAP presiza tau matan oinsá atu bele haree asuntu sira hanesan ne’e.” katak Francisco

Nune’e mos Prezidente ACT Evangelino M. Soares esplika katak, Asosiasaun halo parseria ho MAP iha tinan 2022 kontinua to’o ohin loron. Nia objetivu dahuluk mak hadia kualidade no hasa’e produsaun cafe. Ho tulun husi oitavu governu konstitusional ne’ebé lidera husi jenerál Taur Matan Ruak ne’ebé fo fiar ba Asosiasaun hanesan Timor oan ba dahuluk ho osan montante ne’ebé bo’ot ho tempu ne’ebé limitadu maibe asosiasaun esforsu maka’as kumpre ordem ne’ebé mai husi oitavu governu ne’e hodi halo servisu ba rehabilitasaun cafe iha munisípiu hitu (7) ne’e.

Nia akresenta, Montante orsamentu ba rehabilitasaun kafe hamutuk 6,4 milloens mak preve atu bele tulun setor kafé iha teritóriu tomak. Asosiasaun asina kontratu ho MAP iha loron 09 Setembru 2022 no liu husi kooperasaun ho MAP ne’e lori duni projetu too to’os na’in sira no dadaun halo ona pagamentu dahuluk 40% ba kafekultor sira iha teritóriu tomak. (Tyfa)

 

Parseiru ho

© 2023 Ministeriu Agrikultura no Peskas. All Rights Reserved. Designed by IT MAP

Search

Login