Notisia

Joven Ainaro Kria Grupu Movimentu Agrikultura Produzivu

 Fotografia/Elsio Jong/INFO-MAP

Inisiu kria grupu ne’e atu priense tempu mamuk iha covid19 nia laran hodi kuda modo maíbe tempu la’o ba oin joven sira ne’e hakarak kontinua grupu ne’e nune’e ba oin sira hakarak rekopera ekonomia uma laran ho kuda modo no faan ba parseiru sira ne’ebé mak iha ona no ba oin hakarak hatama sira nia produtu sira ba loja agrikultura iha Dili laran.

Cristovino Valente de Araújo nu’udár xefe grupu joventude Movimentu Agrikultura Produzivu (MAP) iha Munisipiu Ainaro, haktuir katak,  grupu ne’e estabelese ona iha fulan fevereiru tinan ida ne’e ho objetivu atu reforma agraria hodi halo transformasaun agrikola ida ne’ebe mak prosperu no dignu no mós promeve rai ne’ebé maka mamuk. Oinsá mak fó formasaun ba komunidade kona-ba sira hortikultura nian no hasa’e kresimentu ekonomia liu-liu iha kualidade no kuntidade prudutu agrikola nian.

Nia hatutan Hanesan  joven ne’ebe maka akaba ona estudu no iha situsaun covid19 ne’e sira koko hari’i grupu joventude ida ne’e ho nia membru hamutuk nain 9, “ ami hahú hari’i grupu ne’e hodi kuda modo ami hetan apoiu husi diresaun servisu agrikultura Ainaro no modo sira ne’ebé maka ami kuda ne’e halo kontratu ho kolejiu feto ho mane iha Ainaro no modo seluk ne’e ami mós faan ba komunidade iha kasa no ikus ami hetan rezultadu di’ak” tenik xefe juventude ne’e.

Fotografia/Elsio Jong/INFO-MAP

Ba oin sira iha planu atu hatama sira nia produtu hanesan modo ho variedade oin-oin ba loja agrikultura inklui loja sira seluk iha Dili laran. Rai ne’ebé maka grupu joven uza hodi halo atividade kuda modo ne’e rai ne’ebé kontratu ho rain, ho durasaun tinan 10 no husi rezultadu atividade kuda modo ne’e sira oferese 25% ba rai nain.

Ba oin grupu ne’e mós sei involve feto iha  atividade ne’e maiabé sei halo linã koordenasaun ho MAP nasional atu bele apoiu sira ho ekipamentu hortikultura nia nune’e bele hafasil sira nia atvidade.

Lucio Romeo Ribeiro nu’udar Diretór Dirasaun Servisu Agrikultura Munisipiu (DSAM) hateten ajuda ne’ebé maka DSAM fó ba joven movimentu agrikultura MAP produzivu  Ainaro mak hanesan modo musan no ekipamentu kuda modo. Diretór ne’e hatutan katak nia apresia hanoin di’ak ne’ebé kria husi joven Ainaro nune’e governu liu husi Ministeriu Agrikultura no Peska,  DSAM tenke suporta hodi nune’e joven sira ne’e bele kontinua lao ba oin atu ajinte mehi ne’ebe sira iha. (E”S)

 

Rua : Av. Nicolao Lobato Comoro
Dili ,Timor-Leste

Kontaktu ami : 

Telp: +670 330 3333
E-mail: Este endereço de email está sendo protegido de spambots. Você precisa do JavaScript ativado para vê-lo.
Website: http://maf.gov.tl

Parseiru ho

© 2017 Ministeriu Agrikultura no Peskas. All Rights Reserved. Designed by IT MAP

Search

Login