Notisia

HAPAS Destribui Fundus Ki’ik Ba Grupu Benefisiariu 33 Iha Oecusse

Fotografia/Elis Soares/INFO-MAP

Oecusse-Programa Hasa’e Produtividade Agríkultura Sustentável (HAPAS) fo Apoiu Fundus ki’ik ba Grupu Benefisiariu  hamutuk 33 ne’ebé kompostu husi Suku ne’en maka hanesan Usi-Takeno, Usi-Tasae, Banafi, Bobometo, Malelat no Naimeko. nebe’e lokaliza iha Basia Hidrografika Tono-Oecusse.

Sekretáriu Jerál MAP César José da Cruz esplika katak, objetivu prinsipál husi programa HAPAS mak atu bele hasa’e produsaun, liu-liu oinsa mak atu bele lori produtus agríkola sira ba merkadu ou rendimentu iha area  merkadu nian.

Apoiu ne’e  la’os atu hare de’it ba iha produsaun, maíbé atu hare mós nia kualidade ba iha merkadu, ida ne’e mak importante  ba komunidade sira liu husi projeitu HAPAS, ne’ebe maka hetan apoiu orsamentu husi BANKU  MUNDIAL no sistema ne’e liu husi Governu servisu hamutuk  ho Ministériu Agrikultura e Peskas ba iha Basias Hidrografikas 4 komposto husi Raumoco - Lautem, Loes -  (Liquica, Ermera no Bobonaro) Belulik – ( Ainaro no Covalima) no mos Tono – Oecusse. Hatutan sekretáriu Estadu MAP hafoin remata serimónia entrega fundus ki’ik ba grupu agríkola iha segunda-feira (13/01/20) iha Sub Regional - Oesilo.

Nia hatutan, Programa ne’e ita trasa atu komunidade hirak ne’ebe mak hela besik iha Basia Hidrografiku ne’e atu bele sai hanesan benefisiariu, agora programa hala’o ne’e atu hahu ona sira-nia moris idak-idak. Atu garante programa ne’e primeiru atu hateten katak iha Basia Hidrografika hat  ne’e ami iha prezidente Konsellu ne’ebé maka servisu hamutuk ho MAP nune’e mós iha Reziaun RAEOA ne rasik nomos Autoridade lokál sira hotu ne’ebé mak iha Basia Hidrografikas hirak ne’e atu bele garante prosesu tomak to’o sira susesu.

Iha fatin hanesan, Tuir Ofisial Fundus ki’ik programa HAPAS, Humberto Moniz salienta, Atividades ba distribuisaun Fundus ki’ik ba Grupu Benefisiariu sira hamutuk Grupu 33, Grupu Benefisiariu hirak ne’e sei hala’o sira nia atividades iha area tolu, mak hanesan Pecuaria (hakiak Karau ho Bibi), Plantas Industriais (Kuda sabraka no ai Mahoni) no produsaun alimentar (Kuda fore keli,fore mungu no Batar)

“Orsamentu ba atividades refere total USD. 31,478.93 (Rihun tolu nulu resin ida, atus hat hitu nulu resin ualu no sentavus sia nulu resin tolu). Molok grupu benefisiariu sira hetan fundus hirak ne’e, nia prosesu ne’e iha faze primeiru ami mai halo sosializasaun  hafoin ami hanorin sira oinsa atu hakerek proposta, depoisde ami hanorin, sira mós hakerek hafoin submete ba iha ami nia unidade implementasaun projeitu(PIU) no Rejiaun/ Municipiu. Bainhira sira atu tama ba iha faze segundu nian, ami mós sei halo monitorizasaun ba iha sira nia atividades ne’ebé  maka sira halo, se karik sira susesu iha atividades etata primeiru ne’e maka foin ami halo tan transferensia orsamentu ba segundu faze nian.” Tenik Humberto

Fotografia/Elis Soares/INFO-MAP

Nia informa, Husi fundus ne’ebe maka sira iha nia rezultadu ba grupu refere sei la muda ba grupu seluk, se karik sira susesu iha sira nia atividades hafoin Ministériu tau mós ba planu atu hare ba Suku seluk.

Entretantu, xefe Grupu Biote, Ricardo Sufa  nia senti kontenti tebes ho apoiu fundus ne’ebé maka sira hetan, tanba proposta ne’ebé ami hatama ne’e kona ba hakiak animal, fundus ne’ebé ami simu husi Governu liu Ministériu Agrikultura e Pescas atu bele aumenta buat ne’ebe maka ami iha atu nune’e  bele hasa’e tan ami nia produsaun ne’ebe ami iha ona .

Xefe grupu ne’e mós iha   esperansa ba futuru katak, buat nebe mak ami hetan husi Governu liu hosi programa SAPIP ne’e tenki kontinua nafatin, atu nune’e aban bainrua bele mós fó hanoin ba ita nia jerasaun foun sira katak produtu nebe’e maka ita iha, hetan apoiu husi Governu no liu hosi Programa SAPIP nian.

Partisipa iha Atividades refere, Diretora Jerál Agrikultura e Hortikultura,  Diretór Jerál Pekuaria e Veterenaria, Presidenti Konsellu Basias Hidrografika,  Diretora Nasionál Finansas MAP, Ekipa Programa SAPIP, reprejentante gabinete ministru ho Funsionariu Map Rejiaun Oecusse. (Tyfa)

Rua : Av. Nicolao Lobato Comoro
Dili ,Timor-Leste

Kontaktu ami : 

Telp: +670 330 3333
E-mail: Este endereço de email está sendo protegido de spambots. Você precisa do JavaScript ativado para vê-lo.
Website: http://maf.gov.tl

Parseiru ho

© 2017 Ministeriu Agrikultura no Peskas. All Rights Reserved. Designed by IT MAP

Search

Login