Notisia

Joven hamutuk 58 Fila Husi Israel

Fotografia/Elsio Jong/INFO-MAP

Dili- Joven hamutuk (58) limanulu resin- hitu kompostu husi mane 38 no feto 19 fila hikas husi Nasaun Arava Israel hafoin remata sira nia formasaun iha area Agrikultura no Hortikultura durante fulan sanolu resin ida.

Programa ida ne’e MAP koopera ho Governo Israel. Haruka ona Joven sira ne’ebe maka finalista husi Universidade eskola Agríkola ne’ebé maka iha koiñesimentu konaba Agrikultura. Grupu ida ne’e ba daha’at nian. Esplika Ministro Agrikultura e Peskas (MAP) Joaquim José Gusmão Martins, hafoin remata enkontru ho Finalista sira iha Loron Quinta (25/07) iha Salaun MAP Comoro.

Nia akresenta, nia mós ba ona iha Israel no konsege koalia ona ho Governu Israel no mós Ministériu Negosiu Estranjeiru hodi husu atu hasa’e tan ita nia kuota. Entaun tinan ida ne’e ita konsege hasa’e tan ita nia kuota to ema hitunulu resin, ne’e duni fim de Jullu sira sei aranka tan ba Israel. No periode ida ne’e tan hamutuk Grupu ba dala lima nian ona.

Nia hatutan, Joven sira iha ne’eba aprende barak liu konaba Agrikultura moderno. 25% sira aprende konaba siensia oinsa maka atu hare konaba produsaun ne’ebé sira iha ba to’o iha merkadu, no 75% sira pratika iha to’os laran. Grupu balun ne’ebé maka fila mai iha tinan kotuk nian, balun komesa ona kria grupu iha Likisa ne’eba hodi kuda pateka, depoizde kolleta sira hatama balun ba iha Super merkadu sira hanesan Leader no kmanek.

Fotografia/Elsio Jong/INFO-MAP

Nia informa, Asistensia husi MAP nian, tinan ida ne’e la iha orsamentu ba transferensia publika, tanba ne’e maka seidauk bele fo asistensia publika, maibé tinan oin ita komesa ona atu identifika didiak joven sira ne’e, tanba joven maka potensia bo’ot ba Agrikultura. Entaun metode oinsa maka atu ita dada fila fali jovem sira ba iha vida Agrikultura.

Iha fatin hanesan, Team Leader Francisco dos Santos, fo sai konaba atividades sira ne’ebé maka sira hala’o iha Israel mak hanesan atividade extra kurikuler no kurikuler nian. Extra kurikuler maka hanesan ami tama iha teoria 25% no 75% sei utiliza ba iha pratika ninian.

“Atividade seluk ne’ebe maka ami halo fora husi formasaun nian maka hanesan ami vizita fatin santuariu sira no mos halo ligasaun ba iha atividade sira ne’ebe maka liga ba iha Agrikultura no hortikultura nian. Ami nia durasaun ba formasaun durante fulan sanolu resin ida, ami aranka ba iha Fulan Juñu no fila fali iha jullu.” Tenik Farncisco

Fotografia/Elsio Jong/INFO-MAP

Planu ne’ebé mak agora dadauk ami iha, ami mós hakarak implementa saída maka ami aprende ona iha Israel. Materia ne’ebé ami aprende maka liga liu ba iha Area Agrikultura no Hortikultura nian. Tanba ne’e ami mós iha planu hakarak atu loke mós organizasaun balun atu bele envolve mós komunidade sira oinsa maka atu bele sosializa sira ou fo hanoin ba sira atu bele reduz ita nia sistema tradisonal balun ba iha metode agrikultura modernu.

Iha nia parte nia senti orgullu tebes ho oportunidade ida ne’e, tanba ne’e nia hakarak hato’o obrigadu wain tebes ba iha MAP, Ministériu Negosiu Estrajeiru no mós Ministériu Interior liu husi sira nia servisu integradu bele haruka ona sira joven lubuk ida hodi bele ba aprende matenek balun konaba Agrikultura nian iha Isreal. (Tyfa)

Rua : Av. Nicolao Lobato Comoro
Dili ,Timor-Leste

Kontaktu ami : 

Telp: +670 330 3333
E-mail: Este endereço de email está sendo protegido de spambots. Você precisa do JavaScript ativado para vê-lo.
Website: http://maf.gov.tl

Parseiru ho

© 2017 Ministeriu Agrikultura no Peskas. All Rights Reserved. Designed by IT MAP

Search

Login