Progresu Preparasaun Sensus Agrikultura 2018

Estrela inativaEstrela inativaEstrela inativaEstrela inativaEstrela inativa
 

Fotografia/Elsio Jong/Info-MAP

Dili- Ministériu Agrikultura e Peskas servisu hamutuk ho Lina Ministériais no Ajensia FAO sei hala’o sensus Agrikultura iha tinan ida ne’e hodi hatene konaba potensialidade setor agrikultura iha rai laran.

Objetivu principal husi Sensus Agrikultura ne’e atu bele hasae produsaun ho kualidade no hamenus kiak. Liu husi Sensus Agrikultura ne’e atu bele hatene lolos konaba dadus ou data iha ita nia rai, tanba ita nia rai iha setor oi-oin hanesan Agrikultura, Pekuaria, Florestas, Peskas no seluk tan. hateten Secretariu Jeral MAP César José da Cruz, iha enkontru tekniku entre MAP, Diresaun Estatistica Ministerio das Finansas, Lina Minesterias sira no Ajensia FAO hodi fahe informasaun kona ba Progresu preparasaun sensus agrikultura 2o18 iha Edifisiu Estatistica KaiKoli Dili, loron Kuarta (18/04)

Nia hatutan, ita sidauk halo sensus ida lolos atu hatene ita nia potensialidade, entaun liu husi sensus Agrikultutura ida ne’e ita bele hatene lolos konaba ita nia potensialidade ne’ebe maka ita iha, hanesan rai ne’ebe produtivu no la produtivu, ema hela iha ne’ebe, mota bo’ot iha ne’ebe, Ailaran, foho tutun no buat sira seluk atu iha dadus ne’ebe lolos.

César akresenta, Tanba Dadus ne’e maka MAP servisu hamutuk ho Diresaun Estatistica husi Ministériu das Finanças, FAO no mos Lina Ministériais sira seluk deside hodi hala’o sensus agrikultura iha tinan ida ne’e no oras ne’e dadauk iha hela faze preparasaun kestionariu atu hodi ba terenu hasoru ita nia Komunidade no Agrikultor sira atu bele fo informasaun lolos konaba sira nia rai no animal sira ne’ebe maka sira hakiak tamba durante ne’e ita iha dadus duni maibe seidauk lolos tamba Sensus Agrikultura importante tebes atu hatene konaba area hirak ne’e.

 

 Sensus Agrikultura laos Timor de’it maka hala’o maibe Nasaun sira seluk mos hala’o hotu. Tanba ne’e maka MAP hanoin hodi servisu hamutuk ho lina Ministeriais sira no Ajensia FAO atu bele fo apoiu tekniku balu mai husi rai liur atu bele ajuda ita hodi hala’o servisu ne’e ho diak liu tan.

Fiar katak liu husi Sensus ida ne’e sei lori dadus ne’ebe maka diak mai ita hodi benefisia diak liu tan ita nia Governo, liu-liu ba tekniku sira atu hasa’e produtividade iha setor hotu-hotu.

 

Iha fatin hanesan Diretor Jeral Estatistika Elias dos Santos Ferreira ne,ebe mos sai hanesan atual Prezidente Ezekutivu Sensus Agrikultura hatutan tan katak, Ami halo ona diskusaun klean entre Diresaun Estatistika no Minitério Agrikultura e peskas no husi parte tekniku prepara hotu ona kuisioner no kuisioner refere finaliza hotu ona. Kuisioner ne’e iha oin rua, ida ba Uma kain no ida fali ba Komunidade.

Pilotu ou Pre-test ba sensu agrikultura halao ona iha Munisipiu tolu mak hanesan: Manatutu, Aileu no Liquiça. Iha pilotu ne’e ami uza kuisioner hodi intrevista maibe hare mos ba Nasaun moderno entaun ami mos uza CAPI ou tablet atu nune’e bele fasil liu hodi halo intervista.

Iha Sensus Agrikultura ita tenki sukat rai ne’ebe uza ba natar no to’os. Ba natar la iha difikuldade maibe to’os maka difikuldade uituan tanba to’os balu iha foho leten no ho distansia ne’ebe do’ok entaun ita tenki lao ba sukat, ida ne’e maka obstakulu ne’ebe ami hasoru iha terenu. Maibe ho obstakulu sira ne’e hotu sei hadia diak liu tan ita nia servisu iha futuru. (Tyfa/Reny)

Parseiru ho

© 2023 Ministeriu Agrikultura no Peskas. All Rights Reserved. Designed by IT MAP

Search

Login